Ca naca chee̱ lúzredxu
3
Benneꞌ bíchaꞌdauꞌ,
quebe dxal-laꞌ gun cuínale benneꞌ dxuluse̱de dizraꞌ chee̱ Dios,
laweꞌ da nézele ca gun Dios,
guchiꞌa xánnedxe̱ꞌ chee̱ da dxundxu dxiꞌu,
dxuchálajdxu xrtizre̱ꞌ.
2 Xúgute̱dxu dxúnle̱ꞌe̱dxu da cale̱la.
Che nu benneꞌ quebe bi da cale̱la dxune̱ꞌ ca naca da dxuchálaje̱ꞌ,
naque̱ꞌ benneꞌ li lazreꞌ,
naꞌ wazéquene̱ꞌ nna beꞌene̱ꞌ ca nácaqueze be̱laꞌ dxen chee̱ꞌ.
3 Gate dxugúꞌudxu xia dxuꞌa bzrinaꞌ chee̱ gunbaꞌ da dxaca lazrdxu,
wazéquedxu nna beꞌedxu dute̱baꞌ.
4 Le naꞌ xque ca naca chee̱ da caꞌ dxeledán laweꞌ nísadauꞌ.
Lácala zaj naca na da zriꞌa,
naꞌ beꞌ da dxuzriga na le̱ na dxácale̱ꞌe̱ na,
benneꞌ dxusé̱ꞌe̱ na dxuchínene̱ꞌ tu xágadauze,
naꞌ dxenná beꞌene̱ꞌ na chee̱ cheaj na naga dxaca lazreꞌ le̱ꞌ.
5 Cáꞌanqueze naca chee̱ lúzredxu.
Naca na tu da dauze da naca chee̱ be̱laꞌ dxen chee̱dxu,
naꞌ da zrente̱ da dxenná na.
Tu xíꞌdauze waca guzezxe na tu xiꞌa zren.
6 Lúzredxu naca na ca tu xiꞌ.
Lúzredxu naca na ca tu xe̱zr la xu sban da zua lu be̱laꞌ dxen chee̱dxu,
ne dxuxrinnaj na du ca nácadxu.
Zúale̱ ca tu xiꞌ lúzredxu da zaꞌ lataj ba xaꞌ,
ne naca na ca tu da dxegúꞌu na xiꞌ ca naca xúgute̱ da dxundxu.
7 Wazequeꞌ nu benneꞌ nna béꞌene̱ꞌ xúgute̱ be̱ xixreꞌ caꞌ,
ne be̱ zaj zua xrila,
ne be̱ snia caꞌ,
ne be̱ zaj zraꞌ lu nísadauꞌ,
ne ba gunná béꞌene̱ꞌ-baꞌ.
8 Quebe nu benneꞌ dxezéquene̱ꞌ nna béꞌene̱ꞌ dute̱ da dxenná luzre̱ꞌ.
Naca na tu da cale̱la da quebe dxue na lataj nu nna beꞌe le̱ na,
ne naca na ca tu be̱ snia,
be̱ dxútebaꞌ bénneache caꞌ.
9 Nen lúzredxu níqueze dxue láꞌanadxu Xradxu Dios,
ne nen le̱ na dxenné̱quezdxu da cale̱la chee̱ bénneache,
benneꞌ caꞌ nun Dios naꞌ luꞌa le saca Lé̱queze̱ꞌ.
10 Lu dxúꞌadxu náꞌqueze dxeledxúaj da xrlátaje ne da cale̱la.
Benneꞌ bíchaꞌdauꞌ,
da nigá quebe dxal-laꞌ gaca na caꞌ.
11 ¿Waca galaj nisa chaweꞌ ne nisa slaꞌ lu tuze beaj?
12 Benneꞌ bíchaꞌdauꞌ,
¿waca tu xaga higo cuía na da zixre chee̱ xaga olivo?
¿Waca tu lba uva cuía na da zixre chee̱ xaga higo?
Cáꞌanqueze,
tu beaj quebe gaca gunna na nisa xeneꞌ,
ne nisa zri lazreꞌ.
Xel-laꞌ sina da naca li lazreꞌ
13 Che zua tu benneꞌ ládujla leꞌe naque̱ꞌ benneꞌ sina,
ne dxéajniꞌine̱ꞌ,
dxal-laꞌ guléꞌene̱ꞌ na ne̱ chee̱ da chaweꞌ da dxune̱ꞌ dute̱ xel-laꞌ dxexruj lazreꞌ chee̱ꞌ da dxunezruj xel-laꞌ sina le̱ꞌ.
14 Che zua lu lázrdaule xel-laꞌ zreꞌe lazreꞌ ne xel-laꞌ xa lazreꞌ,
quebe dxal-laꞌ gucáꞌana szren cuínale ca naca xel-laꞌ sina chee̱le laweꞌ da caní nne̱le da we̱n lazreꞌ chee̱ da naca da li.
15 Xel-laꞌ sina caní quebe naca na chee̱ Dios.
Naca na chee̱ xe̱zr la xu nigá,
ne chee̱ bénneache,
ne za na lu naꞌ da xriwe̱ꞌ.
16 Naga zua xel-laꞌ zreꞌe lazreꞌ ne xel-laꞌ xa lazreꞌ,
naꞌ zaj zraꞌ benneꞌ wechacha caꞌ,
ne dxelune̱ꞌ xúgute̱ da cale̱la.
17 Benneꞌ zaj nape̱ꞌ xel-laꞌ sina da dxunna Dios zaj naque̱ꞌ du lazreꞌ,
ne zren lazreꞌ,
ne dxeꞌene lazreꞌ,
ne dxexruj lazreꞌ.
Dxelexache lazreꞌ ljwezre̱ꞌ,
ne dxelune̱ꞌ da chaweꞌ.
Zaj naque̱ꞌ li lazreꞌ ne quebe dxelune̱ꞌ cúzreze da chaweꞌ.
18 Benneꞌ dxelebeche zrie̱ꞌ da ba xaꞌ dxelune̱ꞌ tu zrin da naca ca tu binne da dxunna na da chaweꞌ.