Ca naca chee̱ benneꞌ zaj nazriꞌine̱ꞌ da zaj naca chee̱ xe̱zr la xu nigá
4
¿Bizr chee̱ naꞌ dxedíl-lale ne dxeꞌ da ba xaꞌ ládujla leꞌe?
Dxaca caní laweꞌ da dxezá lázrele da zaj naca chee̱ da cale̱la,
da dxuluzúa na leꞌe lu da ba xaꞌ.
2 Leꞌe dxaca lázrele bi gápale,
naꞌ laweꞌ da quebe dxezruéꞌele na,
naꞌ dxútele benneꞌ.
Dxezá lázrele tu da sile,
naꞌ laweꞌ da quebe dxezéquele sile na,
naꞌ dxedíl-lale̱ ljwézrele,
ne dxebéquele da ba xaꞌ.
Quebe dxezile ca da dxezá lázrele laweꞌ da quebe dxenábale na lau Dios.
3 Che dxenábale na,
quebe dxezile na laweꞌ da dxenábale na cale̱la,
laweꞌ da dxedánele na chee̱ guchínele na ca da dxaca lázrele.
4 Leꞌe,
benneꞌ quebe nácale li lazreꞌ,
¿quebe nézele che nu benneꞌ dxedánnene̱ꞌ da cale̱la da de̱ lu xe̱zr la xu nigá,
benneꞌ nigá dxecuídene̱ꞌ Dios?
Nútete̱ze benneꞌ dxaca lazre̱ꞌ siꞌe̱ ba neza ca da dxaca lu xe̱zr la xu nigá naque̱ꞌ benneꞌ dxecuídene̱ꞌ Dios.
5 Chee̱ le̱ naꞌ dxenná xiche láꞌazxa:
Beꞌ da nuzúa Dios lázrdaudxu cadite dxeꞌe̱ gunne xue chee̱dxu.
6 Dios dxácale̱dxene̱ꞌ dxiꞌu lu xel-laꞌ xrlátaje chee̱ꞌ,
ca dxenná xiche láꞌazxa:
Dios dxezré̱ꞌe̱ benneꞌ caꞌ dxulucáꞌana szren cuina,
naꞌ dute̱ xel-laꞌ xrlátaje chee̱ꞌ dxácale̱ne̱ꞌ benneꞌ dxexruj lazreꞌ caꞌ.
7 Le guzúa dizraꞌ chee̱ Dios.
Le til-la da xriwe̱ꞌ,
naꞌ le̱ na xuzrunnuj na naga zrale.
8 Le biga lau Dios,
naꞌ Le̱ꞌ bigue̱ꞌ naga zúale leꞌe.
Leꞌe,
benneꞌ dul-la,
le gupáꞌa cuínale chee̱ dul-la da nabágale.
Leꞌe,
benneꞌ quebe nazriꞌile Dios du lázrele,
le gaca benneꞌ du lazreꞌ.
9 Le guzua ba xaꞌ lázreꞌle.
Le cuezre,
ne le gaca xacheꞌ lazreꞌ.
Québedxa guzrízrele,
naꞌ le cuezre.
Québedxa bele,
ne le xewine lazreꞌ.
10 Le gaca dxexruj lazreꞌ lau Xránadxu,
naꞌ Le̱ꞌ gucáꞌana szrene̱ꞌ leꞌe.
Quebe dxal-laꞌ guchíꞌadxu ca da dxun tu benneꞌ bíchedxu
11 Leꞌe,
benneꞌ bíchaꞌdauꞌ,
quebe nne̱le chee̱ ljwézrele tule xetule.
Benneꞌ dxenné̱ꞌ chee̱ tu benneꞌ bíchedxu,
u dxuchiꞌe̱ ca da dxun bénneaꞌ,
naque̱ꞌ benneꞌ dxenné̱ꞌ cale̱la chee̱ da bdxixruj beꞌe Dios,
ne dxebée̱ꞌ ca zaj naca da bdxixruj beꞌe Dios.
Che dxebéuꞌ ca zaj naca da bdxixruj beꞌe Dios,
dxun cuinuꞌ ca benneꞌ dxuchiꞌe̱ da dxaca,
ne quebe dxuzúꞌ dizraꞌ da bdxixruj beꞌe̱.
12 Zua tuze Dios,
Bénneaꞌ bdxixruj beꞌe̱ da caꞌ,
ne dxuchiꞌe̱ da dxaca,
naꞌ Lé̱queze̱ꞌ wazéquene̱ꞌ guselé̱ꞌ dxiꞌu,
ne guzría xiꞌe̱ dxiꞌu.
Lueꞌ,
¿núzraqueze nacuꞌ,
dxuchiꞌu da dxun benneꞌ xula?
Quebe nezdxu bi gaca wxre
13 Naꞌa,
le xene da nigá,
leꞌe dxennale:
Naꞌa u wxre chéajdxu tu xe̱zre ne cheajsúadxu naꞌ tu iza.
Gáꞌudxu,
ne gútedxu chee̱ gucúdedxu dumí.
14 Quebe nézele ca da gaca wxre.
¿Ájazra naca chee̱ xel-laꞌ nabán chee̱dxu?
Naca na ca tu beuj da dxebéꞌ tu chiꞌi,
naꞌ chadí dxenite na.
15 Da dxal-laꞌ guchálajle naca caní:
Che Xránadxu dxaca lazre̱ꞌ,
gaca bandxu ne gundxu da nigá u da naꞌ.
16 Leꞌe dxucáꞌana szren cuínale ca da dxuchálajle.
Xel-laꞌ dxucáꞌana szren cuina caní naca na da cale̱la.
17 Che nu benneꞌ ba nézene̱ꞌ ca da chaweꞌ da dxal-laꞌ gune̱ꞌ,
naꞌ quebe dxune̱ꞌ na,
naꞌ bágale̱ꞌe̱ dul-la.