Santiago dxusízrene̱ꞌ benneꞌ gunníꞌa caꞌ
5
Le xene da nigá,
leꞌe,
benneꞌ gunníꞌa.
Le cuezre ne le xewine lazreꞌ ca naca da ziꞌ da xaꞌ da léꞌele.
2 Ca naca xel-laꞌ gunníꞌa chee̱le ba zaj nuzru na,
naꞌ zra lánale zaca ba zaj nagu béadu caꞌ le̱ na.
3 Ca naca oro chee̱le ne plata chee̱le,
ba gulezén xrche̱ꞌe̱ na,
naꞌ laweꞌ da quebe bchínele da gunníꞌa chee̱le lu da xrlátaje,
da caní dxululéꞌe na nabágale zria lau Dios,
naꞌ Le̱ꞌ gudée̱ꞌ leꞌe lu da ba xaꞌ.
Caní gaca chee̱le laweꞌ da btúbele xel-laꞌ gunníꞌa chee̱ gápale na gate ba dxéxrule.
4 Quebe gudízrujle ca naca chee̱ na benneꞌ caꞌ belexelape̱ꞌ lina chee̱le,
naꞌ dxelawe̱ꞌ zria chee̱ da quebe gudízrujle,
naꞌ Xránadxu,
Bénneaꞌ nape̱ꞌ dute̱ xel-laꞌ dxenná bea,
ba benne̱ꞌ ca naca zria da dxelagu benneꞌ caꞌ chee̱le leꞌe.
5 Lu xe̱zr la xu nigá ba guzile ba neza xel-laꞌ gunníꞌa chee̱le ne xúgute̱ da zaca caꞌ,
ne guzrenle ca tu be̱zre dxánnele̱ꞌe̱,
naꞌ ba dxezrín zra xelútie̱ꞌ-baꞌ.
6 Leꞌe ba bzria xile,
ne ba bé̱tele benneꞌ quebe bi da cale̱la zaj nune̱ꞌ,
naꞌ benneꞌ caꞌ quebe guledábague̱ꞌ leꞌe.
Dxal-laꞌ gácadxu benneꞌ zren lazreꞌ ne guchálajle̱dxu Dios
7 Chee̱ le̱ naꞌ,
benneꞌ bíchaꞌdauꞌ,
le gaca zren lazreꞌ ca zrindxa zra xeláꞌ Xránadxu.
Benneꞌ dxaza dxaꞌana dxal-laꞌ cueze̱ꞌ dute̱ xel-laꞌ zren lazreꞌ chee̱ꞌ ca zrindxa zra xeláꞌ xiuj ba ne xiuj lina,
chee̱ xezíꞌ lu ne̱ꞌe̱ lina chaweꞌ chee̱ꞌ.
8 Cáꞌanqueze le gaca zren lazreꞌ,
ne quebe gute lázrele,
laweꞌ da ba zua gagu zra xeláꞌ Xránadxu.
9 Leꞌe,
benneꞌ bíchaꞌdauꞌ,
quebe gágule zria chee̱ ljwézrele,
chee̱ quebe guchiꞌa Dios chee̱ da dxunle,
laweꞌ da zua gágute̱ zra xeláꞌ Dios,
Bénneaꞌ dxuchiꞌe̱ da dxaca.
10 Leꞌe,
benneꞌ bíchaꞌdauꞌ,
le gusá lázrele ca guca chee̱ benneꞌ caꞌ gulenné̱ꞌ waláz chee̱ Dios,
gulaque̱ꞌ zren lazreꞌ lácala guledéeꞌ xel-laꞌ ziꞌ.
11 Dxennadxu guca da ba neza zren chee̱ benneꞌ caꞌ buluchaga lawe̱ꞌ xel-laꞌ ziꞌ caꞌ.
Leꞌe ba benle ca benneꞌ zren lazreꞌ guca Job,
ne ba nézele ca da chaweꞌ be̱n Dios chee̱ꞌ ca gudé naꞌ.
Xránadxu naque̱ꞌ zriꞌi lazreꞌ,
ne dxexache lazre̱ꞌ dxiꞌu.
12 Da dxundxa na ba xen,
benneꞌ bíchaꞌdauꞌ,
quebe guzétajle xabáa,
ne quebe guzétajle da zua xe̱zr la xu nigá,
ne quebe bi da xula guzétajle.
Gate nnale:
Aweꞌ,
le nnaze:
Aweꞌ,
ne gate nnale:
Cabí,
le nnaze:
Cabí,
chee̱ quebe guzría xiꞌ Dios leꞌe.
13 Che núlale dxedele lu da ziꞌ da xaꞌ,
dxal-laꞌ guchálajle̱nle Dios.
Che nu benneꞌ zue̱ꞌ xel-laꞌ dxebé,
dxal-laꞌ gul-le̱ꞌ da güe láꞌane̱ꞌ Dios.
14 Che nu benneꞌ quebe chaweꞌ zue̱ꞌ,
dxal-laꞌ nne̱ꞌ benneꞌ gula caꞌ dxuluxúe̱ꞌ bi chee̱ Cristo,
chee̱ xelenabe̱ꞌ lau Dios xexune̱ꞌ benneꞌ we̱ꞌ naꞌ,
ne xelegúꞌe̱ le̱ꞌ da za lu La Xránadxu.
15 Gate dxuluchálajle̱ne̱ꞌ Dios dute̱ xel-laꞌ dxeleajlí lazreꞌ chee̱ꞌ,
naꞌ xexaca benneꞌ we̱ꞌ naꞌ,
naꞌ Xránadxu xechise̱ꞌ le̱ꞌ,
ne che bi dul-la nune̱ꞌ,
naꞌ gunite lau Dios chee̱ bénneaꞌ.
16 Chee̱ le̱ naꞌ,
le xrúale̱pe lau ljwézrele tule xetule dul-la da nunle,
ne le guchálajle̱ Dios chee̱ tule xetule,
chee̱ xexune̱ꞌ leꞌe.
Da dxenaba benneꞌ xrlátaje̱ du lazre̱ꞌ lau Dios wazruéꞌene̱ꞌ na.
17 Elías,
bénneaꞌ gunné̱ꞌ waláz chee̱ Dios,
guque̱ꞌ tu bénneache ca dxiꞌu,
naꞌ gate gunabe̱ꞌ lau Dios chee̱ quebe gaca xiuj,
naꞌ quebe guca xiuj lu xe̱zr la xu dute̱ chun iza xugachaj.
18 Gudé naꞌ,
gate gunabe̱ꞌ lau Dios da xula,
naꞌ beláꞌ xiuj,
naꞌ xe̱zr la xu naꞌ be̱nna na lina.
19 Leꞌe,
benneꞌ bíchaꞌdauꞌ,
che nu benneꞌ ládujla leꞌe dxecuase̱ꞌ lu da li,
naꞌ che núlale leꞌe xeguꞌule le̱ꞌ lu xel-laꞌ li,
20 dxal-laꞌ nézele,
nútete̱ze benneꞌ xucuase̱ꞌ tu benneꞌ dul-la lu neza cale̱la da zeajle̱ne̱ꞌ,
guselé̱ꞌ bénneꞌdu xuꞌu benneꞌ dul-la naꞌ lu xel-laꞌ gute,
naꞌ xunite lau Dios dul-la zan da nabaga bénneaꞌ.