Ca dxal-laꞌ xelún benneꞌ zaj nuchaga naꞌ
3
Cáꞌanqueze leꞌe,
nuꞌula nuchaga naꞌle,
le guzúa dizraꞌ chee̱ benneꞌ chee̱le,
naꞌ che núlale zua benneꞌ biu chee̱le quebe dxéajle̱ꞌe̱ xrtizra Dios,
xexúnbeꞌe̱ naca na da li gate léꞌene̱ꞌ da xrlátaje da dxun zruꞌule̱ꞌ,
ne quebe gun na ba xen bi guchalaj zruꞌule̱ꞌ,
2 laweꞌ da léꞌezene̱ꞌ da xrlátaje dxune̱ꞌ laweꞌ da naque̱ꞌ xrlátaje,
ne dxape̱ꞌ le̱ꞌ ba láꞌana.
3 Ca lechítaje̱ chee̱ tu nuꞌula quebe dxal-laꞌ gaca na cúzreze ca xel-laꞌ dxupáꞌa xicha xíchaje̱ꞌ,
ne lechítaje̱ da naca na oro,
ne zra lane̱ꞌ da zácale̱ꞌe̱.
4 Lechítaje̱ chee̱ꞌ dxal-laꞌ gaca na lu xichaj lázrdaweꞌ,
da naca na tu da xrtan da quebe te chee̱ na.
Da xrtan nigá naca na tu beꞌ dxexruj lazreꞌ,
ne zren lazreꞌ,
da naꞌ zácale̱ꞌe̱ na lau Dios.
5 Cáꞌanqueze guca lechítaje̱ chee̱ nuꞌula caꞌ gulaque̱ꞌ bi chee̱ Dios gate nate.
Nuꞌula caꞌ buluxrén lazre̱ꞌ Dios,
ne buluzúe̱ꞌ dizraꞌ chee̱ benneꞌ chee̱ꞌ.
6 Cáꞌanqueze guca Sara,
bzue̱ꞌ dizraꞌ chee̱ Abraham,
naꞌ guzre̱ꞌ le̱ꞌ:
“Xran.”
Leꞌe wácaquezle ca guca Sara naꞌ che gunle da xrlátaje,
ne quebe bi guchebe lázrele.
7 Cáꞌanqueze leꞌe,
benneꞌ biu,
zúale̱le nuꞌula,
le gaca dxexruj lazreꞌ nen zrúꞌulale.
Le gapa ba láꞌana zrúꞌulale laweꞌ da quebe zaj naque̱ꞌ benneꞌ wal-la ca leꞌe,
ne cáꞌanqueze zaj nape̱ꞌ xel-laꞌ nabán ca da nunna Dios leꞌe dute̱ xel-laꞌ chaweꞌ chee̱ꞌ.
Dxal-laꞌ gunle caní chee̱ quebe bi guzaga na leꞌe gate guchálajle̱le Dios.
Benneꞌ dxeledée̱ꞌ xel-laꞌ ziꞌ laweꞌ da dxelune̱ꞌ da chaweꞌ
8 Naꞌa:
Le gaca tuze
Le xexache lazreꞌ ljwézrele,
ne le zriꞌi ljwézrele.
Le gaca benneꞌ zriꞌi lazreꞌ,
ne zren lazreꞌ.
9 Quebe gunle da cale̱la chee̱ benneꞌ dxune̱ꞌ chee̱le da cale̱la,
ne quebe gucháchale̱le benneꞌ dxulucháchale̱ne̱ꞌ leꞌe.
Le gun da chaweꞌ chee̱ benneꞌ caꞌ laweꞌ da gunné̱ꞌ Dios leꞌe chee̱ sile da chaweꞌ.
10 Caní naca na laweꞌ da dxenná xiche láꞌazxa:
Benneꞌ dxaca lazre̱ꞌ gaca tu da ba neza chee̱ꞌ,
ne sue̱ꞌ xel-laꞌ dxebé
dxal-laꞌ guxúe̱ꞌ luzreꞌ chee̱ quebe nne̱ꞌ dizraꞌ schanniꞌ,
ne guxúe̱ꞌ dxuꞌe̱ chee̱ quebe nne̱ na da we̱n lazreꞌ.
11 Dxal-laꞌ gusane̱ꞌ ca da cale̱la be̱ne̱ꞌ,
ne québedxa gune̱ꞌ na,
chee̱ gune̱ꞌ da chaweꞌ.
Dxal-laꞌ cueche zrie̱ꞌ da ba xaꞌ,
ne gaque̱ꞌ benneꞌ zren lazreꞌ.
12 Xránadxu dxuxúe̱ꞌ benneꞌ chaweꞌ caꞌ,
ne dxenne̱ꞌ ca da dxelenaba benneꞌ caꞌ.
Dxuzúe̱ꞌ chaláꞌala benneꞌ we̱n da zrinnaj caꞌ.
13 ¿Núzraqueze benneꞌ gune̱ꞌ chee̱le da zrinnaj che leꞌe cuele gunne xue gunle da chaweꞌ?
14 Lácala tele xel-laꞌ ziꞌ laweꞌ da dxunle da chaweꞌ,
gaca na da ba neza chee̱le.
Quebe nu zrébele,
ne quebe xrúsale.
15 Le gapa ba láꞌana Cristo ca Xránale lu xichaj lázrdaule.
Le súateze ban lazreꞌ xeché̱bele lau benneꞌ caꞌ dxelenabe̱ꞌ leꞌe bizr chee̱ naꞌ dxuxrén lázrele Le̱ꞌ.
Le gun na lu xel-laꞌ dxexruj lazreꞌ,
ne le gapa ba láꞌana benneꞌ caꞌ.
16 Le gun da chaweꞌ chee̱ quebe bi sua da gagu na zria lu xichaj lázrdaule,
naꞌ benneꞌ caꞌ dxelenné̱ꞌ schanniꞌ chee̱ da chaweꞌ da dxunle laweꞌ da dxéajle̱l-le chee̱ Cristo,
xelapa stuꞌe̱ ca dizraꞌ da dxelennéꞌ.
17 Zácadxa tele xel-laꞌ ziꞌ laweꞌ da dxunle da chaweꞌ cáte̱ze dxaca lazre Dios,
ne quegá tele xel-laꞌ ziꞌ laweꞌ da dxunle da cale̱la.
18 Caní naca na laweꞌ da gudé Cristo tu lásaze lu xel-laꞌ gute zi xaꞌ ne̱ chee̱ dul-la da nabágadxu.
Le̱ꞌ guque̱ꞌ benneꞌ xrlátaje,
naꞌ gudée̱ꞌ xel-laꞌ ziꞌ waláz chee̱dxu dxiꞌu,
benneꞌ we̱n da zrinnaj,
chee̱ gaca xeché̱ꞌe̱ dxiꞌu lau Dios.
Gute Cristo lu be̱l-laꞌ dxen chee̱ꞌ,
san bebánqueze̱ꞌ lu beꞌ nácaqueze̱ꞌ.
19 Cáꞌanqueze lu beꞌ nácaqueze̱ꞌ guxíaje̱ꞌ lataj chul-la naga xeajchálajle̱ne̱ꞌ beꞌ zaj nácaqueze benneꞌ caꞌ nuzaga xel-laꞌ gute lu lataj naꞌ.
20 Benneꞌ caní quebe buluzúe̱ꞌ dizraꞌ ca da bchalaj Noé gate nate,
gate naꞌ guleza Dios dute̱ xel-laꞌ zren lazreꞌ chee̱ꞌ dxácate̱ naꞌ be̱n Noé da zren naꞌ da dxedá laweꞌ nísadauꞌ.
Lu da dxedá laweꞌ nísadauꞌ gulelá xrúnuze benneꞌ ne̱ chee̱ nisa xiuj da naꞌ bzria xi na ca naca bénneache.
21 Nisa xiuj naꞌ dxuléꞌe na ca naca nisa naga dxelexedxúa benneꞌ nisa,
naꞌ lu le̱ naꞌ naladxu naꞌa.
Nisa nigá quegá le̱ naꞌ quibe na dxiꞌu,
san dxuléꞌe na dxaca lázredxu chádxedxu lau Dios,
naꞌ ladxu laweꞌ da bebán Jesucristo ládujla benneꞌ gate,
22 ne begüene̱ꞌ xabáa,
ne zue̱ꞌ chaláꞌa xabe̱la chee̱ Dios,
naꞌ dizraꞌ chee̱ Le̱ꞌ dxuluzúa gubáz chee̱ xabáa,
gubáz caꞌ zaj napeꞌ xel-laꞌ dxenná bea,
ne gubáz blau caꞌ.