Ca naca chee̱ benneꞌ caꞌ dxulusé̱dene̱ꞌ da we̱n lazreꞌ
2
Cáꞌanqueze gulezráꞌ ládujla benneꞌ Israel benneꞌ we̱n lazreꞌ caꞌ,
benneꞌ belún cuine̱ꞌ ca benneꞌ dxelenné̱ꞌ waláz chee̱ Dios.
Cáꞌanqueze welezráꞌ ládujla leꞌe benneꞌ we̱n lazreꞌ,
benneꞌ xelún cuine̱ꞌ ca benneꞌ dxulusé̱dene̱ꞌ bénneache dizraꞌ chee̱ Dios.
Benneꞌ caní wuluzéajniꞌine̱ꞌ bénneache bagácheze ca naca dizraꞌ we̱n lazreꞌ da guxrinnaj na,
naꞌ caní xeledábague̱ꞌ Xránadxu,
Bénneaꞌ bselé̱ꞌ dxiꞌu,
naꞌ laweꞌ da dxulusé̱dene̱ꞌ da caní xelebía xiꞌ zé̱queze̱ꞌ.
2 Benneꞌ zan chjácale̱ne̱ꞌ ca da sban dxulusé̱de benneꞌ caꞌ,
naꞌ ne̱ chee̱ benneꞌ caní xelenné̱ bénneache schanniꞌ chee̱ dizraꞌ li chee̱ xel-laꞌ weselá.
3 Laweꞌ da dxelezá lazre̱ꞌ xelezíꞌe̱ dumí,
xelebéaje̱ꞌ leꞌe dumí ne̱ chee̱ da we̱n lazreꞌ da dxuluzéajniꞌine̱ꞌ leꞌe.
Dios ba nucueze̱ꞌ da guzría xi na benneꞌ caní,
laweꞌ da ba guchugue̱ꞌ gate nate ca da gaca chee̱ benneꞌ caꞌ.
4 Dios quebe bnite lawe̱ꞌ chee̱ gubáz chee̱ xabáa caꞌ belún dul-la.
Bdee̱ꞌ gubáz chee̱ xabáa caꞌ lu lataj ba xaꞌ,
ne bzre̱ꞌe̱ le̱ꞌ lu da chul-la,
ne bcheaje̱ꞌ le̱ꞌ du xia naga zaj nadxéaje̱ꞌ ca zrin zra chugu Dios ca da gaca chee̱ gubáz chee̱ xabáa caꞌ.
5 Cáꞌanqueze Dios quebe bnite lawe̱ꞌ chee̱ benneꞌ caꞌ gulezráꞌ gate nate.
Gusel-le̱ꞌ nisa xiuj da bzria xi na benneꞌ caꞌ belune̱ꞌ da cale̱la.
Bselé̱ꞌ Noé,
bénneaꞌ bchálaje̱ꞌ ca naca da xrlátaje da dxal-laꞌ xelún bénneache.
Bselé̱ꞌ gázreze benneꞌ.
6 Cáꞌanqueze guchugu Dios chee̱ xe̱zre Sodoma,
ne xe̱zre Gomorra chee̱ xelebía xi na.
Bzézxie̱ꞌ dxúpate̱ xe̱zre caꞌ,
naꞌ belexegáꞌanate̱ na de.
Caní dxuluzéajniꞌi na benneꞌ caꞌ xelune̱ꞌ da cale̱la,
benneꞌ xelezré̱ꞌe̱ te naꞌ.
7 Dios bselé̱ꞌ Lot lu xe̱zre Sodoma naꞌ laweꞌ da guque̱ꞌ tu benneꞌ xrlátaje,
ne bexíajele̱ꞌe̱ne̱ꞌ gate bléꞌene̱ꞌ ca naca da sban da dxelún benneꞌ caꞌ dxelune̱ꞌ da cale̱la.
8 Benneꞌ xrlátaje nigá guzúe̱ꞌ ládujla benneꞌ caꞌ,
naꞌ tu zra tu zra guzúa ba xaꞌ lázrdawe̱ꞌ ca dxenné̱ꞌe̱,
ne dxenne̱ꞌ ca da cale̱la da dxelún benneꞌ caꞌ.
9 Nézqueze Xránadxu guselé̱ꞌ benneꞌ zaj naca bi chee̱ꞌ che bi da dxusaca zi na le̱ꞌ,
naꞌ guzráqueze̱ꞌ benneꞌ caꞌ dxelune̱ꞌ da cale̱la,
ca tu lizre xia,
ca zrin zra chugue̱ꞌ chee̱ꞌ chjaque̱ꞌ lataj ba xaꞌ.
10 Dios xudée̱ꞌ xel-laꞌ ziꞌ zrendxa benneꞌ caꞌ dxelune̱ꞌ cáte̱ze da sban da dxelezá lazre̱ꞌ,
ne dxuluzúe̱ꞌ chaláꞌala xel-laꞌ dxenná bea chee̱ Xránadxu.
Benneꞌ caní zaj naque̱ꞌ lazreꞌ dxugu dxelune̱ꞌ da sban,
ne dxulucáꞌana szren cuine̱ꞌ.
Quebe dxelezrebe̱ꞌ dxelenné̱ꞌ schanniꞌ chee̱ gubáz chee̱ xabáa caꞌ.
11 Gubáz caꞌ zaj nápadxe̱ꞌ xel-laꞌ dxenná bea,
ne xel-laꞌ szren ca benneꞌ caní,
quebe dxelenné̱ꞌ da cale̱la chee̱ benneꞌ caꞌ gate dxelawe̱ꞌ zria chee̱ꞌ lau Xránadxu.
12 Benneꞌ caní zaj naque̱ꞌ ca bea caꞌ quebe zaj naxéajniꞌibaꞌ,
be̱ dxelunbaꞌ ca da zaj nézezebaꞌ,
ne zrabaꞌ chee̱ xelé̱l-le̱ꞌ-baꞌ,
ne xelutie̱ꞌ-baꞌ.
Benneꞌ caní dxelenné̱ꞌ schanniꞌ chee̱ da quebe dxeléajniꞌine̱ꞌ,
naꞌ xelátequeze̱ꞌ ca dxelate bea caꞌ,
13 ne xeledée̱ꞌ xel-laꞌ ziꞌ ca xel-laꞌ ziꞌ buludée̱ꞌ benneꞌ xula.
Dxeléquene̱ꞌ zaj zre̱ꞌe̱ lu da ba neza gate dxelebene̱ꞌ ca da dxaca tu zra tu zra.
Zaj naque̱ꞌ ca tu da sban da dxusíꞌi na leꞌe xel-laꞌ stuꞌ gate zaj zre̱ꞌe̱ nen leꞌe lu laní chee̱le,
dxácate̱ ne dxelezúe̱ꞌ lu xel-laꞌ dxebé lu da cale̱la da dxelune̱ꞌ.
14 Dxelezá lazre̱ꞌ xúgute̱ nuꞌula dxeleléꞌene̱ꞌ,
ne quebe dxelálene̱ꞌ dxelune̱ꞌ dul-la.
Dxulusiꞌe̱ neza xula benneꞌ bíchedxu quebe zaj ze̱ chache̱ꞌ.
Dxulucúdequeze̱ꞌ,
ne zaj naque̱ꞌ benneꞌ zaj xuꞌe̱ deꞌ.
15 Zaj nanítie̱ꞌ laweꞌ da gulecuase̱ꞌ lu neza li chee̱ Dios.
Dxelune̱ꞌ ca da be̱n Balaam,
zriꞌine Beor.
Balaam nigá be̱ne̱ꞌ ba chee̱ dumí,
ne gudé̱ꞌ dxune̱ꞌ da cale̱la,
16 naꞌ bea naꞌ,
be̱ dxua xuaꞌ,
gunne̱baꞌ ca benneꞌ,
ne gudíl-labaꞌ Balaam ca naca dul-la da dxune̱ꞌ,
naꞌ guchúgubaꞌ da xala da dxun Balaam.
17 Benneꞌ caní zaj naque̱ꞌ ca tu beaj bizre,
ne ca tu beuj da dxua beꞌ bdunuꞌ.
Ba zaj naca chee̱ benneꞌ caꞌ xelexegáꞌane̱ꞌ chadía chacanna lu da chul-la.
18 Dxelenné̱ꞌ dizraꞌ da dxulucáꞌana szren na le̱ꞌ,
ne da zaj naca na dácheze.
Dxuluchínene̱ꞌ da sban caꞌ,
ne da dxezá lazreꞌ be̱laꞌ dxen chee̱ bénneache chee̱ dxulusiꞌe̱ chaláꞌala benneꞌ caꞌ za dxelexedxúajteque̱ꞌ ládujla benneꞌ caꞌ dxelune̱ꞌ da cale̱la.
19 Dxeleche̱be lazre̱ꞌ xulunézruje̱ꞌ benneꞌ caꞌ tu xel-laꞌ weselá,
san lé̱queze benneꞌ caꞌ zaj naque̱ꞌ we̱n zrin chee̱ da sban.
Tu tu bénneache naque̱ꞌ benneꞌ nadaꞌu chee̱ da dxenná beꞌe na le̱ꞌ.
20 Benneꞌ ba zaj núnbeꞌe̱ Xránadxu,
ne Weselá chee̱dxu Jesucristo,
ne ba gulelé̱ꞌ lu da sban chee̱ xe̱zr la xu nigá,
naꞌ te naꞌ che xelexexuꞌe̱ xecha lasa lu da sban naꞌ,
ne xeluꞌe̱ lataj xenná beꞌe na le̱ꞌ,
naꞌ gácadxa da ba xaꞌ chee̱ benneꞌ caꞌ ca da guca chee̱ꞌ gate nate.
21 Cháweꞌdxela gaca na chee̱ benneꞌ caní la quebe zaj núnbeꞌe̱ Cristo,
quegala gate ba belúnbeꞌe̱ Le̱ꞌ,
naꞌ xelexecuase̱ꞌ ca naca xel-laꞌ dxixruj bea láꞌazxa da guzre Dios le̱ꞌ xelune̱ꞌ.
22 Ca da guca chee̱ benneꞌ caní dxuléꞌe na naca da li dizraꞌ nigá da dxenná na:
Becuꞌ dxexágubaꞌ ca da ba bexé̱bebaꞌ,
naꞌ cuche za bexíbebaꞌ bexúꞌubaꞌ xecha lasa lu guzraꞌ chee̱baꞌ.