3 Dxunna ba xen gúnbeale,

lu zra da za záꞌaca weleláꞌ benneꞌ xelún le̱ꞌ chee̱ da zaj naca na da láꞌazxa,

ne xelune̱ꞌ cáte̱ze da dxelezá lazre̱ꞌ,

4 ne xuluche̱be̱ꞌ bénneache:

¿Bizra guca chee̱ da guche̱be lazreꞌ Cristo,

gunné̱ꞌ:

Weláꞌa?

Xra xrtáudxu caꞌ ba gulatie̱ꞌ,

naꞌ túzqueze ca guca,

gaca na gate guzrete̱ xe̱zr la xu.

5 Benneꞌ caní quebe dxeleque beꞌene̱ꞌ gulezúa xabáa,

ne xe̱zr la xu gate nate,

Dios gunné̱ꞌ bedxúaj na lu nisa,

naꞌ guzúa chacha na lu nisa,

6 naꞌ xe̱zr la xu da zua gate nate guzría xi na ne̱ chee̱ nisa xiuj,

7 naꞌ xabáa,

ne xe̱zr la xu da zaj zua na naꞌa,

ba naca chee̱ na xelezxe na ca ba núnqueze Dios chee̱ na.

Xiꞌ naꞌ guzezxe na da caní lu zra guchiꞌa Dios,

gate xelebía xiꞌ benneꞌ caꞌ dxelune̱ꞌ da cale̱la.

8 Benneꞌ bíchaꞌdauꞌ nazriꞌite̱ lazraꞌ,

quebe gal-la lázrele da nigá:

Lau Xránadxu tu zraze naca na ca chi gaxúa iza,

naꞌ chi gaxúa iza zaj naca na ca tu zraze.

9 Quebe dxezré Xránadxu gune̱ꞌ da nache̱be lazre̱ꞌ ca dxeleque bénneache.

Naque̱ꞌ zren lazreꞌ nen dxiꞌu laweꞌ da quebe dxaca lazre̱ꞌ nu cuía xiꞌ.

Dxaca lazre̱ꞌ xelexexíaje lazreꞌ xúgute̱ bénneache.

10 Zra xeláꞌ Xránadxu zrin na gate quebe nu dxeque caꞌ,

ca zaꞌ tu gubán chizrela.

Lu zra naꞌ cuía xiꞌ xabáa da dxeléꞌedxu,

naꞌ gunle̱ꞌe̱ na schaga,

ne ca naca da dxeléꞌedxu zran xabáa xelebía xi na lu xiꞌ,

naꞌ xe̱zr la xu nigá chezxe na tu zren nen da de̱ lawe na.

11 Che ba nézele xelebía xiꞌ xúgute̱ da caní,

¿ájala dxal-laꞌ gunle?

Dxal-laꞌ gácale li lazreꞌ ne guzúa cuínale lu naꞌ Dios

12 dxácate̱ ne dxebézale zra naꞌ,

ne dxal-laꞌ gunle ca da séquele zrinte̱ zra naꞌ.

Lu zra naꞌ cuia xiꞌ xabáa lu xiꞌ,

naꞌ da zaj zria zran xabáa xelexuna na lu xiꞌ naꞌ.

13 Dxiꞌu dxebézadxu tu xabáa cube,

ne tu xe̱zr la xu cube da ba guche̱be lazreꞌ Dios naga gaca xlátaje̱ xúgute̱.

14 Chee̱ le̱ naꞌ,

benneꞌ bíchaꞌdauꞌ nazriꞌite̱ lazraꞌ,

dxácate̱ dxebézale da caní,

le gun ca da séquele chee̱ quebe bi bágale,

ne quebe bi nadxenle chee̱ dul-la lau Dios,

ne suale lu xel-laꞌ dxebeza zri lazreꞌ.

15 Le gusá lázrele naca Xránadxu zren lazreꞌ nen dxiꞌu chee̱ ladxu.

Cáꞌanqueze Pablo,

benneꞌ bíchedxu nazriꞌite̱ lázredxu,

bzuaje̱ꞌ chee̱le,

bchínene̱ꞌ ca naca xel-laꞌ sina da bnezruj Dios le̱ꞌ.

16 Lu xúgute̱ xiche da ba bzuaje̱ꞌ,

ba bchálajle̱ne̱ꞌ leꞌe ca naca chee̱ da caní,

lácala bal-la na nácale̱ꞌe̱ na ste̱be chéajniꞌidxu na,

naꞌ benneꞌ caꞌ quebe dxeléajniꞌine̱ꞌ na,

ne benneꞌ caꞌ quebe zaj zua chache̱ꞌ dxuluchuque̱ꞌ na,

ca dxuluchuque̱ꞌ xezícala xrtizra Dios,

naꞌ chee̱ le̱ naꞌ Dios guzría xiꞌe̱ benneꞌ caꞌ.

17 Chee̱ le̱ naꞌ,

benneꞌ bíchaꞌdauꞌ nazriꞌite̱ lazraꞌ,

che leꞌe ba nézele da nigá nédxula,

le guxúe cuínale chee̱ da we̱n lazreꞌ chee̱ benneꞌ caꞌ dxelune̱ꞌ da cale̱la chee̱ quebe xeleché̱ leꞌe chaláꞌala,

ne quebe nite xel-laꞌ li lazreꞌ chee̱le lau Dios.

18 Le gúnbea xanneꞌ Xránadxu,

Benneꞌ Weselá chee̱dxu,

Jesucristo,

ne le gula lu xel-laꞌ zriꞌi lazreꞌ chee̱ꞌ.

¡Gaca ba Le̱ꞌ naꞌa,

ne chadía chacanna!

¡Caꞌan gaca na!