Ca xelaca bénneache lu zra bze̱be
3
Cáꞌanqueze dxal-laꞌ nézele lu zra bze̱be niꞌ gaca na ste̱be chee̱ bénneache.
2 Bénneache caꞌ xelaque̱ꞌ:
Benneꞌ xelezríꞌize cuina,
ne xelezríꞌine̱ꞌ dumí.
Xulucáꞌana szren cuine̱ꞌ,
ne xulucáꞌana cuine̱ꞌ ca benneꞌ blau caꞌ.
Xelenné̱ꞌ schanniꞌ chee̱ Dios,
ne quebe xuluzúe̱ꞌ dizraꞌ chee̱ xra xrne̱ꞌe̱.
Xelaque̱ꞌ benneꞌ quebe dxelezí le̱,
ne benneꞌ quebe dxelapa ba láꞌana Dios.
3 Quebe xelaque̱ꞌ zriꞌi lazreꞌ,
ne quebe xelexexache lazre̱ꞌ ljwezre̱ꞌ.
Xelenné̱ꞌ chee̱ ljwezre̱ꞌ,
ne quebe xelenná beꞌe cuine̱ꞌ.
Xelaque̱ꞌ benneꞌ snia caꞌ,
ne xuluzúe̱ꞌ chaláꞌala da naca xrlátaje.
4 Quebe xelaque̱ꞌ li lazreꞌ nen ljwezre̱ꞌ.
Xelaque̱ꞌ benneꞌ dxelexube.
Xeléquene̱ꞌ zaj naque̱ꞌ benneꞌ szrente̱.
Xelexezaca ba lázredxene̱ꞌ da caꞌ dxeledánene̱ꞌ quézcala da naca chee̱ Dios.
5 Lácala xululéꞌe cuine̱ꞌ ca benneꞌ zaj naque̱ꞌ chee̱ Dios,
quebe súale̱ le̱ꞌ xel-la waca chee̱ Dios.
Quebe gunuꞌ tu zrén benneꞌ caꞌ.
6 Ca zaj naca benneꞌ caní zaj naca benneꞌ caꞌ zjaque̱ꞌ tu tu xuꞌu,
ne dxelezí xe̱ꞌe̱ nuꞌula quebe zaj zie̱ꞌ du lazreꞌ,
ne zaj zua da dxagu na zria lázrdawe̱ꞌ da naca chee̱ xtul-leꞌ.
Xel-la dxelezá lazreꞌ chee̱ nuꞌula caní nazrube xu na le̱ꞌ.
7 Lácala tu dxulusé̱dezqueze̱ꞌ chee̱ xel-la li,
cabataꞌ dxeléajniꞌiquezne̱ꞌ na.
8 Ca belún Janes ne Jambres,
benneꞌ wazráꞌ caꞌ,
benneꞌ caꞌ guledábague̱ꞌ Moisés,
cáꞌanqueze dxelún benneꞌ caní,
dxeledábague̱ꞌ xel-la li.
Zaj nazrinnaj xichaj lázrdawe̱ꞌ,
ne belexecuase̱ꞌ lu xel-la dxeajlí lazreꞌ chee̱ Dios.
9 Quebe bi xelezruéꞌe benneꞌ caní,
laweꞌ da xeleque béꞌequeze xúgute̱ bénneache zaj naque̱ꞌ benneꞌ xálaze,
ca gulaca benneꞌ chupa caꞌ guledábague̱ꞌ Moisés.
Da bze̱be da dxusebaga Pablo Timoteo
10 Ba benuꞌ:
Ca da bzéajniꞌidaꞌ bénneache,
ne bléꞌequeznuꞌ ca bé̱nquezaꞌ.
Nézenuꞌ da dxaca lazraꞌ gunaꞌ,
ne ca dxeajlí lazraꞌ Cristo.
Bchaga lawaꞌ da guzxacaꞌ,
ne nazríꞌidaꞌ xúgute̱ bénneache.
Nézenuꞌ ca naca xel-la zren lazreꞌ chiaꞌ.
11 Bléꞌenuꞌ ca guláu ziꞌ xuzre̱ꞌ nedaꞌ,
ne ca gudéaꞌ xel-la ziꞌ.
Nézenuꞌ xúgute̱ da guzracaꞌ lu xe̱zre Antioquía,
ne xe̱zre Iconio,
ne xe̱zre Listra.
Guláu ziꞌ xuzre benneꞌ caꞌ nedaꞌ,
naꞌ Xránadxu bselé̱ꞌ nedaꞌ lu xúgute̱ da caꞌ.
12 Xúgute̱ benneꞌ caꞌ,
benneꞌ dxelaca lazre̱ꞌ xelúnqueze̱ꞌ ca da dxenná Jesucristo,
weláu ziꞌ xúzrequeze bénneache le̱ꞌ.
13 Benneꞌ caꞌ dxelune̱ꞌ da cale̱la,
ne benneꞌ dxelezí xe̱ꞌe̱ welúndxaqueze̱ꞌ da cale̱la.
Xelezí xe̱ꞌe̱ bénneache,
naꞌ benneꞌ xula xelezí xe̱ꞌe̱ benneꞌ caní.
14 Lueꞌ,
guzé̱ chacha ca da ba naxéajniꞌinuꞌ,
da naꞌ nuxrén lazruꞌ.
Nézqueznuꞌ nu bse̱de lueꞌ,
15 naꞌ ne nácateuꞌ bídauꞌte̱ ba núnbeꞌu da dxenná lu xiche láꞌazxa,
da dxezeque na guzéajniꞌi na lueꞌ,
chee̱ lauꞌ laweꞌ da dxeajlí lazruꞌ Jesucristo.
16 Xúgute̱ da naxúaj na lu xiche láꞌazxa naca na da bzéajniꞌi Dios benneꞌ caꞌ zaj naque̱ꞌ bi chee̱ Le̱ꞌ,
ne naca na da dxuzéajniꞌi na dxiꞌu,
ne da dxedil-la na benneꞌ dxelune̱ꞌ da cale̱la,
ne da dxusizre na dxiꞌu,
ne da dxuléꞌe na dxiꞌu ca dxal-laꞌ gundxu da xrlátaje,
17 chee̱ gaca du lazreꞌ bi chee̱ Dios,
naꞌ gácabeꞌ bi naze̱de xanne chee̱ gunbeꞌ xúgute̱ da xrlátaje.