4
Lau Dios,
ne lau Xránadxu Jesucristo,
Bénneaꞌ guchiꞌe̱ chee̱ benneꞌ ban caꞌ,
ne chee̱ benneꞌ gate caꞌ gate ze̱ꞌe̱ xedajnná beꞌe̱,
dxusebagaꞌ lueꞌ
2 guchálajuꞌ dizraꞌ chee̱ Dios,
ne gunuꞌ ba xuzre guchálajuꞌ che xuluzé̱ naga bénneache,
ca xuluzé̱ nague̱ꞌ.
Bzéajniꞌi benneꞌ caꞌ dute̱ xel-la zren lazreꞌ chiuꞌ,
ne bleꞌe le̱ꞌ ca da zaj nabague̱ꞌ.
Gudil-la,
ne bsizre benneꞌ caꞌ.
3 Caní dxal-laꞌ gunuꞌ laweꞌ da wazrín zra québedxa xuluzé̱ naga bénneache chee̱ xel-la li da dxusé̱dedxu.
Ca dxelezá lázrqueze le̱ꞌ,
xulunné̱ꞌ zaneꞌ benneꞌ xulusé̱dene̱ꞌ le̱ꞌ ca da dxelaca lázreze le̱ꞌ xelenne̱ꞌ.
4 Québedxa xuluzé̱ nague̱ꞌ da li.
Wuluzé̱ nague̱ꞌ dizraꞌ da dxuluzaze bénneache.
5 Naꞌ lueꞌ,
bzéajniꞌi cuinuꞌ lu xúgute̱ da caní.
Bchaga lau xel-la ziꞌ da teuꞌ.
Bzua cuinuꞌ chee̱ guchálajuꞌ dizraꞌ chaweꞌ chee̱ Cristo,
ne be̱n zrin da nabaguꞌ chee̱ Cristo.
6 Ba bzrin zra guzúaꞌ xel-la nabán chiaꞌ lu naꞌ Dios,
laweꞌ da ba zua bagu xelutie̱ꞌ nedaꞌ.
7 Du lazraꞌ gudábagaꞌ benneꞌ caꞌ guledábague̱ꞌ da naca chee̱ Cristo.
Tu bé̱nzquezaꞌ ca naca da li chee̱ꞌ,
ne ba bexuzre be̱naꞌ da bsebaga Cristo nedaꞌ gunaꞌ.
8 Laweꞌ da be̱naꞌ da xrlátaje,
naꞌa ba dxebeza da dxexalaꞌ nedaꞌ,
da naꞌ gunna Xránadxu nedaꞌ lu zra naꞌ,
ne quegá tuzaꞌ nedaꞌ gunne̱ꞌ na.
Cáꞌanqueze gunézruje̱ꞌ na chee̱ benneꞌ caꞌ dute̱ xel-la zriꞌi lazreꞌ chee̱ꞌ dxelebeze̱ꞌ zra xelé̱ꞌe̱.
Pablo dxuléꞌene̱ꞌ Timoteo ca dxal-laꞌ gunbeꞌ
9 Be̱n ba xuzre xídazeuꞌ xedajnnáꞌu nedaꞌ.
10 Ba guleaj xichaj Demas nedaꞌ laweꞌ da dxedánedxabeꞌ da naca chee̱ xe̱zr la xu nigá,
ne ba zexíajbeꞌ Tesalónica.
Crescente ba gusel-laꞌ-beꞌ zexíajbeꞌ naga nababa Galacia,
naꞌ Tito gusel-laꞌ-beꞌ naga nababa Dalmacia.
11 Tuze Lucas zúale̱beꞌ nedaꞌ.
Bexilaj Marcos,
naꞌ guché̱ꞌ-beꞌ tu zrén le̱n lueꞌ,
laweꞌ da wazéquebeꞌ gácale̱beꞌ nedaꞌ lu zrin chee̱ Cristo.
12 Tíquico gusel-laꞌ-beꞌ lu xe̱zre Efeso.
13 Gate xiduꞌ,
gúaguꞌ gabán chiaꞌ da nucáꞌanaꞌ xe̱zre Troas lizre Carpo.
Cáꞌanqueze guꞌu xiche caꞌ bcáꞌanaꞌ ga naꞌ,
ne da dxunte̱ na ba xen guꞌu xiche caꞌ zaj naca na xide.
14 Alejandro,
benneꞌ gubizre xia bsacaꞌ zíꞌle̱ꞌe̱ nedaꞌ.
Xránadxu gunézruje̱ꞌ lazruj chee̱ꞌ ca da be̱ne̱ꞌ.
15 Bxue xanne cuinuꞌ chee̱ benneꞌ nigá laweꞌ da ba gudábagale̱ꞌe̱ dizraꞌ da dxuchálajdxu.
16 Da nedxu lasa gate beche̱baꞌ ca naca chiaꞌ lau benneꞌ xuꞌu laweꞌ caꞌ,
netú benneꞌ quebe gúcale̱ne̱ꞌ nedaꞌ.
Xúgute̱ꞌ buluzáꞌ xíchaje̱ꞌ nedaꞌ.
17 Gúcale̱ Xránadxu nedaꞌ,
ne btipe̱ꞌ lazraꞌ chee̱ guzéquedaꞌ bchálajaꞌ dizraꞌ chaweꞌ lau xúgute̱ benneꞌ caꞌ quebe zaj naque̱ꞌ judío.
Caꞌan guca bselá Xránadxu nedaꞌ lu naꞌ benneꞌ caꞌ,
ca dxun benneꞌ dxuselé̱ꞌ béadu caꞌ lu dxuꞌa be̱zre xixreꞌ,
18 naꞌ guseláqueze̱ꞌ nedaꞌ lu xúgute̱ da cale̱la,
ne guxúequeze̱ꞌ nedaꞌ ca zrin zra xezrinaꞌ xabáa naga dxenná bea Le̱ꞌ.
¡Gaca báqueze Le̱ꞌ!
¡Caꞌan gaca na!
Benneꞌ chee̱ Cristo dxulugapa diuzre ljwezre̱ꞌ
19 Dxugapaꞌ diuzre Priscila,
ne Aquilo,
ne benneꞌ zaj zraꞌ lizre Onesíforo.
20 Erasto begáꞌanabeꞌ xe̱zre Corinto,
naꞌ bcáꞌanaꞌ Trófimo lu xe̱zre Mileto laweꞌ da quebe chaweꞌ zúabeꞌ.
21 Be̱n ba xuzre xiduꞌ nigá dxácate̱ quebe ne chúꞌudxu beuꞌ zaga.
Eubulo,
ne Pudente,
ne Lino,
ne Claudia,
ne xúgute̱ bi bíchedxu zaj zre̱ꞌe̱ nigá dxulugape̱ꞌ lueꞌ diuzre.
22 Dxenabaꞌ Xránadxu Jesucristo súale̱ne̱ꞌ lueꞌ,
ne dxenabaꞌ Dios gune̱ꞌ da chaweꞌ chee̱ xúgute̱le leꞌe.
¡Caꞌan gaca na!