DIZRAꞌ DA BZUAJ SAN PABLO CHEE̱ TITO
Pablo dxugape̱ꞌ Tito diuzre
1
Nedaꞌ,
Pablo,
nacaꞌ we̱n zrin chee̱ Dios,
ne gubáz chee̱ Jesucristo chee̱ guzéajniꞌidaꞌ benneꞌ caꞌ ba gucáꞌa Dios chee̱ xeleajlí lazre̱ꞌ Cristo,
ne xelúnbeꞌe̱ da naca li lazreꞌ chee̱ da naca chee̱ Dios,
2 ne chee̱ xelebeza lazre̱ꞌ xel-la nabán chadía chacanna,
da guche̱be lazreꞌ Dios gunne̱ꞌ chee̱dxu gate za gunte̱ꞌ xe̱zr la xu nigá.
Dios quebe dxun lazre̱ꞌ,
3 naꞌ naꞌa,
ca ba bzrin zra chee̱ na,
ba bzéajniꞌine̱ꞌ dxiꞌu ca naca xrtizre̱ꞌ ne̱ chee̱ da bxrizeꞌ Dios nedaꞌ cuꞌa lban chee̱ na.
Dios nácaqueze̱ꞌ weselá chee̱dxu.
4 Dxuzúajaꞌ da nigá chiuꞌ,
Tito.
Nacuꞌ ca zríꞌinequezaꞌ laweꞌ da dxeajlí lázredxu Cristo.
Dxenabaꞌ lau Xradxu Dios,
ne lau Xránadxu Jesucristo,
Benneꞌ weselá chee̱dxu,
gune̱ꞌ chiuꞌ da cháwedauꞌ,
ne xexache lazre̱ꞌ lueꞌ,
ne gunne̱ꞌ lueꞌ xel-la dxebeza zri lazreꞌ.
Zrin da dxun Tito lu xe̱zr la xu Creta
5 Bcáꞌanaꞌ lueꞌ lu xe̱zr la xu Creta da naxechaj nisa chee̱ gucáꞌana chawuꞌ da quebe begáꞌana chaweꞌ ládujla bíchedu caꞌ,
ne chee̱ gunnituꞌ benneꞌ gula chee̱ xudauꞌ tu tu xé̱zredu caꞌ,
cáte̱ze bxrísedaꞌ lueꞌ gunuꞌ.
6 Tu benneꞌ gula chee̱ xudauꞌ:
Dxal-laꞌ gaqueꞌ benneꞌ quebe bi zua da gagu na chie̱ꞌ.
Dxal-laꞌ súale̱ne̱ꞌ tuze nuꞌula.
Zríꞌine̱ꞌ dxal-laꞌ xelácabeꞌ bi ba dxéajlí lázrebeꞌ Cristo.
Quebe bi da zrinnaj dxelún zríꞌine̱ꞌ caꞌ,
ne quebe gaca nu gagu zria chee̱ da dxelunbeꞌ.
7 Laweꞌ da xuꞌu lu ne̱ꞌe̱ zrin chee̱ Dios,
tu benneꞌ dxuxúe̱ꞌ benneꞌ zaj nababe̱ꞌ chee̱ Cristo:
Dxal-laꞌ gaque̱ꞌ benneꞌ quebe bi zua da gagu na zria chee̱ꞌ.
Quebe dxal-laꞌ gaque̱ꞌ benneꞌ dxucáꞌana szren cuine̱ꞌ.
Quebe dxal-laꞌ gaque̱ꞌ benneꞌ xichaj zraꞌa.
Quebe dxal-laꞌ gaque̱ꞌ benneꞌ dxéꞌaje̱ꞌ da dxuzuzre na le̱ꞌ.
Quebe dxal-laꞌ gaque̱ꞌ benneꞌ dxedíl-lale̱ne̱ꞌ bénneache.
Quebe dxal-laꞌ gaque̱ꞌ benneꞌ dxucúdee̱ꞌ.
8 Dxal-laꞌ súate̱ze̱ꞌ siꞌ lu ne̱ꞌe̱ benneꞌ zjaque̱ꞌ lizre̱ꞌ.
Dxal-laꞌ gune̱ꞌ da naca cháwedauꞌ.
Dxal-laꞌ gaque̱ꞌ benneꞌ nna beꞌe cuine̱ꞌ.
Dxal-laꞌ gaque̱ꞌ benneꞌ xrlátaje.
Dxal-laꞌ gaque̱ꞌ benneꞌ nuzúa cuine̱ꞌ chee̱ Dios.
Dxal-laꞌ gaque̱ꞌ benneꞌ dxuzéajniꞌi cuine̱ꞌ.
9 Dxal-laꞌ gaque̱ꞌ benneꞌ nuzúa cuine̱ꞌ chee̱ dizraꞌ li.
Dizraꞌ li naca na da bse̱de nu benneꞌ le̱ꞌ chee̱ séquene̱ꞌ gusízrene̱ꞌ benneꞌ xubla ne̱ chee̱ da li da dxusé̱dene̱ꞌ,
ne chee̱ séquene̱ꞌ guzexruje̱ꞌ lazreꞌ benneꞌ caꞌ dxelenné̱ꞌ chee̱ da li naꞌ.
10 Caní dxal-laꞌ gune̱ꞌ laweꞌ da zrále̱ꞌe̱ benneꞌ dxelenné̱ꞌ chee̱ dizraꞌ li,
benneꞌ dxelezí xe̱ꞌe̱ benneꞌ xubla lu da xala da dxlenné̱ꞌ.
Zaneꞌ benneꞌ Israel dxelune̱ꞌ caní.
11 Dxal-laꞌ guzúa zriuꞌ benneꞌ dxelune̱ꞌ da caní laweꞌ da dxuluxrínnaje̱ꞌ xichaj lázxdau xúgute̱ benneꞌ zaj zraꞌ tu tu xuꞌu naga dxelúꞌe̱ chee̱ xulusé̱dene̱ꞌ da quebe naca xrlátaje.
Dxelune̱ꞌ caní chee̱ xelezíꞌ lu ne̱ꞌe̱ dumí.
Da nigá da dxelune̱ꞌ naca na da cale̱la.
12 Tu benneꞌ Creta naga zuꞌ,
benneꞌ gunné̱ꞌ waláz chee̱ xudauꞌ chee̱ benneꞌ caꞌ,
gunné̱ꞌ:
“Benneꞌ Creta zaj nácaqueze̱ꞌ we̱n lazreꞌ,
ne zaj naque̱ꞌ ca be̱ snia caꞌ,
ne zaj naque̱ꞌ benneꞌ wagu xrataꞌ,
ne zrawe̱de.”
13 Da li gunné̱ꞌ.
Chee̱ le̱ naꞌ gudíl-laqueze benneꞌ caꞌ chee̱ xelaque̱ꞌ li lazreꞌ ca dxeleajlí lazre̱ꞌ Cristo,
14 ne chee̱ quebe xuluzé̱ nague̱ꞌ dizraꞌ da dxuluzaze benneꞌ Israel caꞌ,
ne ca naca da nadxixruj bea caꞌ da dxelún benneꞌ caꞌ dxuluzúe̱ꞌ chaláꞌala dizraꞌ li.
15 Xúgute̱ naca na xrlátaje chee̱ benneꞌ caꞌ zaj naca xrlátaje xichaj lázrdawe̱ꞌ,
san chee̱ benneꞌ caꞌ dxelune̱ꞌ da sban,
ne québedxa dxeléajle̱ꞌe̱ chee̱ Cristo,
quebe bi de̱ da naca xrlátaje.
Zaj nazrinnaj xichaj lázrdawe̱ꞌ.
16 Benneꞌ caní dxelenné̱ꞌ zaj núnbeꞌene̱ꞌ Dios,
san da dxelune̱ꞌ dxuléꞌe na quebe naca da li da dxelenné̱ꞌ.
Zaj naque̱ꞌ benneꞌ we̱n da sban,
ne benneꞌ we̱n da cale̱la,
ne quebe xelezéquene̱ꞌ xelune̱ꞌ tu da xrlátaje.