2
Dxal-laꞌ guchálajuꞌ da caꞌ dxuse̱de na dxiꞌu da naca li.
2 Benneꞌ gula chee̱ xudauꞌ:
Dxal-laꞌ xelaque̱ꞌ benneꞌ dxelenná béꞌe cuine̱ꞌ.
Dxal-laꞌ xelaque̱ꞌ benneꞌ du lazreꞌ.
Dxal-laꞌ xelaque̱ꞌ benneꞌ dxuluzéajniꞌi cuine̱ꞌ.
Dxal-laꞌ xelaque̱ꞌ li lazreꞌ ca dxleajlí lazre̱ꞌ Cristo,
ne ca zaj nazríꞌine̱ꞌ Le̱ꞌ,
ne ca naca xel-la zren lazreꞌ chee̱ꞌ.
3 Cáꞌanqueze nuꞌula gula caꞌ chee̱ xudauꞌ:
Dxal-laꞌ dxelapa ba láꞌana Dios ca naca xúgute̱ da dxelune̱ꞌ.
Quebe dxal-laꞌ xelaque̱ꞌ benneꞌ dxulutupe̱ꞌ dizraꞌ bizruj.
Quebe dxal-laꞌ xelaque̱ꞌ benneꞌ dxeléꞌaje̱ꞌ da xuzuzre na le̱ꞌ.
Dxal-laꞌ xulusé̱dene̱ꞌ da naca xrlataje̱
4 chee̱ gaca xulusé̱dene̱ꞌ nuꞌula cuideꞌ caꞌ
chee̱ xelezríꞌine̱ꞌ benneꞌ chee̱ꞌ caꞌ,
ne zríꞌine̱ꞌ caꞌ,
5 ne chee̱ xelenná beꞌe cuine̱ꞌ,
ne xelaqueꞌ du lazreꞌ,
ne xulupe̱ꞌe̱ lizre̱ꞌ,
ne xuluzúe̱ꞌ dizraꞌ chee̱ benneꞌ chee̱ꞌ.
Caní dxal-laꞌ xelune̱ꞌ chee̱ quebe nu nne̱ꞌ schanníꞌ chee̱ xrtizraꞌ Dios.
6 Cáꞌanqueze bsizre bi cuideꞌ caꞌ chee̱ xelenná beꞌe cuínabeꞌ.
7 Ca naca da xrlátaje dxunuꞌ lueꞌ dxal-laꞌ guléꞌe na benneꞌ caꞌ ca dxal-laꞌ xelune̱ꞌ.
Gate dxusé̱denuꞌ benneꞌ caꞌ dxal-laꞌ gacuꞌ li lazreꞌ,
ne du lazreꞌ.
8 Dxal-laꞌ guchálajuꞌ da naca li lazreꞌ chee̱ quebe nu sequeꞌ si tizra le̱ na.
Che gunuꞌ caní,
naꞌ che nu benneꞌ nnie̱ꞌ chee̱le,
weduéꞌequezne̱ꞌ,
laweꞌ da quebe sua tu da cale̱la da dxunle.
9 Bzéajniꞌi benneꞌ caꞌ zaj nadaꞌu chee̱ xuluzúe̱ꞌ dizraꞌ chee̱ xrane̱ꞌ ca naca xúgute̱ da xelé̱ xrane̱ꞌ le̱ꞌ.
Dxal-laꞌ xelune̱ꞌ da xelexezaca ba lazreꞌ xrane̱ꞌ,
ne quebe xelexenné̱ꞌ lau xrane̱ꞌ.
10 Quebe dxal-laꞌ xelebane̱ꞌ da naca chee̱ xrane̱ꞌ,
san dxal-laꞌ xelaque̱ꞌ li lazreꞌ,
chee̱ xeleléꞌe benneꞌ ca da dxelún benneꞌ caní,
naꞌ xelenné̱ꞌ chaweꞌ chee̱ xrtizraꞌ Dios,
Benneꞌ weselá chee̱dxu.
11 Dios ba bléꞌene̱ꞌ ca naca da chaweꞌ chee̱ꞌ chee̱ xelelá xúgute̱ bénneache.
12 Da xrlátaje chee̱ Dios dxuse̱de na dxiꞌu chee̱ québedxa gundxu da cale̱la,
ne ca naca xel-la dxezá lazreꞌ da cale̱la,
san chee̱ nna beꞌe cuínadxu,
ne gácadxu du lazreꞌ,
ne gápadxu ba láꞌana Dios lu xe̱zr la xu nigá
13 dxácate̱ ne dxebézadxu zra xeláꞌ Dios szren,
ne weselá chee̱dxu Jesucristo nen xel-la szren chee̱ꞌ,
da naꞌ dxebeza lázredxu.
14 Le̱ꞌ bzua cuine̱ꞌ lu naꞌ benneꞌ caꞌ belútie̱ꞌ Le̱ꞌ waláz chee̱dxu dxiꞌu chee̱ bselé̱ꞌ dxiꞌu lu xúgute̱ da zrinnaj,
naꞌ bcaꞌana chawe̱ꞌ dxiꞌu chee̱ gácadxu bi cheé̱queze̱ꞌ,
ne chee̱ gundxu da xrlátaje du lázredxu.
15 Da caní dxal-laꞌ gusé̱denuꞌ benneꞌ caꞌ.
Gudil-la benneꞌ caꞌ,
ne bsizre-ne̱ꞌ dute̱ xel-la dxenná bea chiuꞌ.
Quebe bi da cale̱la gunuꞌ chee̱ quebe nu si tizra lueꞌ.