DIZRAꞌ GUDXUPEꞌ DA BZUAJ SAN PABLO CHEE̱ TIMOTEO
Pablo dxugape̱ꞌ diuzre Timoteo
1
Nedaꞌ,
Pablo,
nacaꞌ gubáz chee̱ Jesucristo laweꞌ da guca lazreꞌ Dios gacaꞌ caní,
chee̱ cuꞌa lban ca naca xel-la nabán da guche̱be lazreꞌ Dios gunne̱ꞌ chee̱ benneꞌ caꞌ zaj naque̱ꞌ bi chee̱ Jesucristo.
2 Dxuzúajaꞌ da nigá chiuꞌ lueꞌ Timoteo,
bi chiaꞌ nazríꞌi lazraꞌ,
naꞌ dxenabaꞌ Xradxu Dios,
ne Xránadxu Jesucristo gune̱ꞌ da chaweꞌ chiuꞌ,
ne xexache lazre̱ꞌ lueꞌ,
ne gunne̱ꞌ chiuꞌ xel-la dxebeza zri lazreꞌ.
Pablo dxusízrene̱ꞌ Timoteo chee̱ gunbeꞌ zrin chee̱ Cristo
3 Te zra ne chizrela gate dxuchálajle̱naꞌ Dios,
ne dxeajsá lazraꞌ lueꞌ,
dxápequezaꞌ Dios:
Xcalenuꞌ,
Bénneaꞌ dxunaꞌ zrin chee̱ꞌ,
ne quebe bi zua da dxagu na zria lu xichaj lázrdawaꞌ.
Dxunaꞌ zrin naꞌ ca belúnqueze xra xrtawaꞌ caꞌ.
4 Dxeajsá lázrquezaꞌ ca gudxezruꞌ gate naꞌ bezáꞌa naga zuꞌ,
ne dxaca lázrele̱ꞌa xeléꞌedaꞌ lueꞌ chee̱ gápale̱ꞌa xel-la dxebé.
5 Cáꞌanqueze dxeajsá lazraꞌ xel-la dxeajlí lazreꞌ li da napuꞌ.
Xrnaꞌu gula,
Loida,
ne xrnaꞌu,
Eunice gulape̱ꞌ xel-la dxeajlí lazreꞌ caní,
naꞌ nuxrén lazraꞌ lueꞌ nápaquezuꞌ na.
6 Chee̱ le̱ naꞌ dxuzéajniꞌidaꞌ lueꞌ guchínenuꞌ ca da be̱nna Dios lueꞌ gate naꞌ bzeaꞌ naꞌa xichjuꞌ,
ne gunabaꞌ gun Dios da chaweꞌ chiuꞌ.
7 Beꞌ Láꞌazxa be̱nna Dios dxiꞌu quebe dxune̱ꞌ dxiꞌu bi zra chebe,
san dxunne̱ꞌ dxiꞌu xel-la wal-la,
ne xel-la zriꞌi lazreꞌ,
ne dxune̱ꞌ dxiꞌu benneꞌ dxenná beꞌe cuina.
8 Chee̱ le̱ naꞌ quebe gapa stuꞌ ca naca chee̱ Xránadxu,
ne cáꞌanqueze ca naca chiaꞌ nedaꞌ,
xuꞌa lizre xia nigá laweꞌ da dxunaꞌ zrin chee̱ Cristo,
san bchaga lau lueꞌ xel-la ziꞌ da dxeledé benneꞌ caꞌ dxuluchálaje̱ꞌ dizraꞌ chaweꞌ chee̱ Jesús,
naꞌ Dios gutípaqueze̱ꞌ lazruꞌ.
9 Dios bselé̱ꞌ dxiꞌu,
ne bláwizre̱ꞌ dxiꞌu chee̱ guzúa cuínadxu lu naꞌ Le̱ꞌ,
quegá laweꞌ da be̱ndxu tu da xrlátaje,
san laweꞌ da guca lázrequeze Le̱ꞌ gaca na caní,
ne laweꞌ da bzriꞌine̱ꞌ dxiꞌu,
nazrágadxu chee̱ Cristo.
Dios bzriꞌine̱ꞌ dxiꞌu gate quebe ne gunte̱ꞌ xe̱zr la xu nigá,
10 naꞌ bléꞌene̱ꞌ xel-la zriꞌi lazreꞌ nigá naꞌa,
laweꞌ da gusel-le̱ꞌ Jesucristo,
weselá chee̱dxu,
naꞌ bzria xiꞌe̱ xel-la dxenná bea chee̱ xel-la gute,
ne bléꞌene̱ꞌ bénneache ca gaca xelezíꞌ lu ne̱ꞌe̱ xel-la nabán chadía chacanna,
ca dxennáqueze dizraꞌ chaweꞌ da dxuchálajdxu.
11 Dios bzue̱ꞌ nedaꞌ chee̱ guchálajaꞌ ca naca dizraꞌ chaweꞌ nigá,
ne be̱ne̱ꞌ nedaꞌ benneꞌ gubáz chee̱ꞌ chee̱ gusé̱dedaꞌ benneꞌ quebe zaj naque̱ꞌ judío.
12 Chee̱ le̱ naꞌ dxedéaꞌ xel-la ziꞌ caní.
Quebe dxapa stuꞌa ne̱ chee̱ da nigá,
laweꞌ da núnbeꞌa Bénneaꞌ nuxrén lazraꞌ,
ne nezdaꞌ nape̱ꞌ xel-la waca cuꞌu chawe̱ꞌ da nuzúaꞌ lu ne̱ꞌe̱ ca zrindxa zra naꞌ.
13 Be̱xru tipa ca naca dizraꞌ da bsé̱dedaꞌ lueꞌ,
ne quebe gusanuꞌ xel-la dxeajlí lazreꞌ,
ne xel-la zriꞌi lazreꞌ da nápadxu laweꞌ da nácadxu bi chee̱ Jesucristo.
14 Ne̱ chee̱ xel-la waca chee̱ Beꞌ Láꞌazxa,
Bénneaꞌ zue̱ꞌ xichaj lázrdaudxu,
be̱xru tipa da naꞌ nuzúa Dios lu naꞌu.
15 Ba nézenuꞌ ca belún xúgute̱ bi bíchedxu zaj zre̱ꞌe̱ naga nababa Asia.
Gulebéaj xíchaje̱ꞌ nedaꞌ.
Cáꞌanqueze Figelo,
ne Hermógenes belune̱ꞌ tu zren benneꞌ caꞌ.
16 Dxenabaꞌ Xránadxu xexache lazre̱ꞌ benneꞌ zaj zre̱ꞌe̱ lizre Onesíforo.
Gúcale̱ le̱ꞌ nedaꞌ zaneꞌ lásaqueze,
ne quebe gudapa stue̱ꞌ chiaꞌ nedaꞌ,
xuꞌa lizre xia.
17 Gate ble̱ꞌe̱ xe̱zre Roma,
bexílaje̱ꞌ nedaꞌ,
naꞌ bezrélene̱ꞌ nedaꞌ.
18 Dxenabaꞌ Xránadxu xexache lazre̱ꞌ le̱ꞌ lu zra náꞌ gate xeláꞌ Le̱ꞌ.
Ba nézenuꞌ ca gúcale̱le̱ꞌe̱ne̱ꞌ dxiꞌu lu xe̱zre Efeso.