6
Benneꞌ zaj nadaꞌu dxal-laꞌ xelápale̱ꞌe̱ ba láꞌana xrane̱ꞌ caꞌ chee̱ quebe nu nne̱ schanniꞌ chee̱ Dios,
ne chee̱ da dxusé̱dedxu.
2 Che benneꞌ zaj nadaꞌu,
zaj zraꞌ xrane̱ꞌ caꞌ dxeleajlí lazre̱ꞌ Cristo,
quebe dxal-laꞌ xuluzúe̱ꞌ le̱ꞌ chaláꞌala laweꞌ da zaj naque̱ꞌ benneꞌ biche̱ꞌ,
san dxal-laꞌ xelune̱ꞌ zrin da nácadxa xrlátaje chee̱ xrane̱ꞌ caꞌ dxeleziꞌe̱ ba neza zrin naꞌ,
laweꞌ da dxeleajlí lazre̱ꞌ Cristo,
ne zaj naque̱ꞌ benneꞌ biche̱ꞌ zaj nazriꞌine̱ꞌ.
Bzéajniꞌi benneꞌ caꞌ da nigá ne bsizre le̱ꞌ.
Da cale̱la da dxuluse̱de benneꞌ, ne xel-la gunníꞌa li
3 Che nu benneꞌ dxusé̱dene̱ꞌ da zaj naca cale̱la da quebe zaj naca na tuze ca da bse̱de Xránadxu Jesucristo,
ne ca da dxuse̱de da dxéajle̱dxu chee̱ Dios,
4 benneꞌ nigá dxucáꞌana szren cuine̱ꞌ,
ne quebe bi nézene̱ꞌ.
Dxezá lázrele̱ꞌe̱ gutil-le̱ꞌ benneꞌ dizraꞌ ca naca chee̱ tu tu dizraꞌ caꞌ.
Benneꞌ dxelún caní:
Dxelaque̱ꞌ benneꞌ xre lazreꞌ,
ne dxeledil-le̱ꞌ,
ne dxulucháchale̱ ljwezre̱ꞌ,
ne dxeléquene̱ꞌ dxun le saꞌ ljwezre̱ꞌ da cale̱la,
5 ne tu lize dxulutil-la dizraꞌ ljwezre̱ꞌ,
ne zaj naque̱ꞌ benneꞌ zaj nazrinnaj lu xichaj lázrdawe̱ꞌ,
ne quebe zaj nunbeꞌe̱ da li.
Dxeléquene̱ꞌ zrin dxundxu chee̱ Cristo naca na tu da waca xuluchínene̱ꞌ chee̱ xelaque̱ꞌ benneꞌ gunníꞌa.
Quebe gunuꞌ tuze benneꞌ caní.
6 Da li da zéajle̱dxu chee̱ Cristo naca na tu da gunníꞌa zren,
naꞌ caní nácaqueze chee̱ tuze bénneaꞌ dxezaca ba lazre̱ꞌ ca da nape̱ꞌ.
7 Quebe bi núadxu gate gúlajdxu lu xe̱zr la xu nigá,
ne quebe bi xexúadxu gate xezáꞌadxu nigá,
8 san che de̱ da gágudxu,
ne zra lánadxu,
dxal-laꞌ xezaca ba lázredxu nen da caꞌ.
9 Benneꞌ caꞌ dxelaca lazre̱ꞌ xelaque̱ꞌ gunníꞌa,
cheajlecházie̱ꞌ lu naꞌ da xriwe̱ꞌ,
naꞌ cheajlechuꞌe̱ lu xralaj chee̱ le̱ na,
chee̱ xelezá lazre̱ꞌ da xálaze,
da dxulucáꞌana ditaj na bénneache,
ne dxelegúꞌu na bénneache lu da ba xaꞌ naga xelebía xiꞌe̱.
10 Benneꞌ nazriꞌine̱ꞌ dumí dxune̱ꞌ xúgute̱ da cale̱la,
naꞌ zaj zraꞌ bal-la benneꞌ gulezá lazre̱ꞌ na,
naꞌ bulusane̱ꞌ xel-la dxeleajlí lazreꞌ chee̱ꞌ,
naꞌ ba gulezíꞌ lataj xel-la dxudía lu lázrdawe̱ꞌ.
Da dxusizre Pablo Timoteo
11 Lueꞌ,
we̱n zrin chee̱ Dios,
gucuasa lu da caní.
Be̱n da naca xlátaje̱,
ne bzua cuinuꞌ lu naꞌ Dios,
ne guxeajlí lazreꞌ Cristo,
ne bzriꞌi Le̱ꞌ,
ne guca zren lazreꞌ,
ne dxexruj lazreꞌ.
12 Gudíl-lale̱ da xriwe̱ꞌ,
guchínenuꞌ xel-la dxeajlí lazreꞌ chiuꞌ.
Be̱xru tipa xel-la nabán da chadía chacanna laweꞌ da bláwizra Dios lueꞌ chee̱ gapuꞌ da nigá,
naꞌ ba bléꞌenuꞌ ca dxeajlí lazruꞌ Cristo láwela zaneꞌ benneꞌ dxelexeche̱be̱ꞌ chee̱ na.
13 Naꞌa,
lau Dios,
Bénneaꞌ nuzúe̱ꞌ xel-la nabán chee̱ xúgute̱ da naca ban,
ne lau Jesucristo,
Bénneaꞌ cáꞌanqueze bléꞌene̱ꞌ da naque̱ꞌ,
ne beche̱be̱ꞌ chee̱ na lau Poncio Pilato,
dxenné̱ xuedaꞌ lueꞌ.
14 Guzúꞌ dizraꞌ ca da dxapaꞌ lueꞌ,
ne quebe guchaꞌu na.
Dxal-laꞌ gunuꞌ na chee̱ quebe nu sequeꞌ bi nne̱ chiuꞌ ca zrin zra xeláꞌ Xránadxu Jesucristo.
15 Ca zrin zra chee̱ na Dios sel-le̱ꞌ Le̱ꞌ.
Naque̱ꞌ Dios tu lichaꞌ,
naꞌ Benneꞌ Láꞌazxa dxenná beꞌe̱.
Naque̱ꞌ Wenná bea,
Benneꞌ dxenná beꞌene̱ꞌ wenná bea caꞌ,
ne naque̱ꞌ Xrana xúgute̱ benneꞌ zaj naque̱ꞌ xrana bénneache.
16 Tuze Dios quebe gatie̱ꞌ,
ne zue̱ꞌ lu xel-la naxaníꞌ naga quebe nu sequeꞌ cheaj.
Netú bénneache quebe ne léꞌene̱ꞌ Le̱ꞌ,
ne quebe nu gaca leꞌe Le̱ꞌ.
Chee̱ Le̱ꞌ naca xel-la ba láꞌana,
ne xel-la dxenná bea chadía chacanna.
¡Caꞌan gaca na!
17 Gunné̱ xue benneꞌ zaj naque̱ꞌ gunníꞌa lu xe̱zr la xu nigá chee̱ quebe xulucáꞌana szren cuine̱ꞌ,
ne quebe xuluxrén lazre̱ꞌ xel-la gunníꞌa chee̱ꞌ,
laweꞌ da quebe naca na da chadía chacanna.
Dxal-laꞌ xuluxrén lazre̱ꞌ Dios ban,
Bénneaꞌ dxúnnale̱ꞌe̱ dxiꞌu xúgute̱ da dxechínedxu chee̱ sidxu da ba neza.
18 Gunné̱ xue benneꞌ caní xelune̱ꞌ da xrlátaje,
ne xelaque̱ꞌ benneꞌ gunníꞌa lu da xrlátaje da xelune̱ꞌ,
ne bi xulunézruje̱ꞌ benneꞌ xacheꞌ caꞌ,
ne xulunézrujle̱ꞌe̱ na.
19 Caní gaca,
xelezruéꞌene̱ꞌ xel-la gunníꞌa da gaca na tu da guzúa chacha na le̱ꞌ lu zra da za zaꞌ,
ne xelape̱ꞌ xel-la nabán da zeajlí canna.
20 Lueꞌ,
Timoteo,
bxue xanne da nuzúa Dios lu naꞌu.
Quebe guzé̱ naguꞌ dizraꞌ xálaze chee̱ xe̱zr la xu nigá,
da naꞌ dxelenná bal-la benneꞌ naca na xel-la sina.
Da nigá naca na da we̱n lazreꞌ.
21 Bal-la benneꞌ gulezíꞌe̱ na,
naꞌ bulusane̱ꞌ xel-la dxeleajlí lazreꞌ chee̱ꞌ.
Dxenábedaꞌ Dios gune̱ꞌ da chaweꞌ chiuꞌ.
¡Caꞌan gaca na!