3 Leꞌe,

bi bíchaꞌdauꞌ,

dxal-laꞌ xé̱quezentuꞌ Dios:

Xcalenuꞌ ca naca chee̱le,

da dxal-laꞌ guntuꞌ laweꞌ da ba dxegula xel-la dxeajlí lazreꞌ chee̱le,

ne ba zúadxa xel-la nazríꞌi lazreꞌ le̱n ljwézrele tule xetule.

4 Chee̱ le̱ naꞌ dxuchálajntuꞌ ca naca chee̱le leꞌe láwela bi caꞌ chee̱ Cristo.

Dxuchálajntuꞌ ca dxuchaga laule da dxelún benneꞌ caꞌ zaj nau ziꞌ xuzre̱ꞌ leꞌe,

ne ca naca xel-la ziꞌ da dxedele,

san nácale zren lazreꞌ,

ne dxeajlí lázrele Dios.

5 Da nigá dxuléꞌe na xlátaje̱ naca Dios ca dxuchiꞌe̱ da dxelún bénneache,

dxenné̱ꞌ naca chee̱le chuꞌule naga dxenná bea Le̱ꞌ laweꞌ da dxedele xel-la ziꞌ chee̱ laꞌ xel-la dxenná bea chee̱ꞌ.

6 Xlátaje̱ naca gudé Dios benneꞌ caꞌ xel-la ziꞌ,

benneꞌ caꞌ dxuludée̱ꞌ leꞌe xel-la ziꞌ naꞌa,

7 naꞌ guzúe̱ꞌ leꞌe naga xezíꞌ lázrele chee̱ xel-la ziꞌ da dxedele naꞌa.

Xezí lázrele tu zren nen netuꞌ gate xeláꞌ Xránadxu Jesús,

ze̱ꞌe̱ xabáa nen gubáz blau caꞌ chee̱ xabáa chee̱ꞌ.

8 Ze̱ꞌe̱ nuꞌe̱ xiꞌ chee̱ gudée̱ꞌ lu da ba xaꞌ benneꞌ caꞌ quebe dxelexúnbeꞌe̱ Dios,

ne quebe dxuluzúe̱ꞌ dizraꞌ ca dxenná dizraꞌ chaweꞌ chee̱ Xránadxu Jesucristo.

9 Benneꞌ caní xelecuase̱ꞌ naga zua Xránadxu lu xel-la szren chee̱ꞌ,

ne xel-la dxenná bea chee̱ꞌ,

naꞌ xeledée̱ꞌ xel-la ziꞌ chee̱ da ba xaꞌ chadía chacanna.

10 Caní gaca gate xeláꞌ Xránadxu lu zra naꞌ chee̱ xulucáꞌana szren benneꞌ chee̱ꞌ caꞌ Le̱ꞌ,

naꞌ benneꞌ caꞌ dxeajlí lazre̱ꞌ Le̱ꞌ xelape̱ꞌ Le̱ꞌ ba láꞌana.

Leꞌe gunle benneꞌ caꞌ tu zren laweꞌ da guxéajle̱le chee̱ da beché̱bentuꞌ.

11 Chee̱ le̱ naꞌ tu dxuchálajle̱quezentuꞌ Dios ca naca chee̱le,

ne dxenábantuꞌ Le̱ꞌ gaca chee̱le sile da naꞌ bláwizre̱ꞌ leꞌe sile.

Cáꞌanqueze dxenábantuꞌ lau Dios guchínene̱ꞌ xel-la waca chee̱ꞌ chee̱ gaca gunle ca naca xúgute̱ da xrlátaje da dxezá lázrele,

ne xúgute̱ zrin dxunle ne̱ chee̱ xel-la dxeajlí lazreꞌ chee̱le.

12 Caní gunle,

gucáꞌana szrenle La Xránadxu Jesucristo,

naꞌ Le̱ꞌ gape̱ꞌ leꞌe ba láꞌana ne̱ chee̱ xel-la xrlátaje chee̱ Dios chee̱dxu,

ne chee̱ Xránadxu Jesucristo.