3 Ca ba gutaꞌ xúedaꞌ lueꞌ gate naꞌ bezáꞌa naga zuꞌ,

ne bexáꞌa naga nababa xe̱zr la xu Macedonia,

begáꞌana lu xe̱zre Efeso chee̱ nne̱ xúenuꞌ benneꞌ caꞌ zaj zre̱ꞌe̱ naꞌ québedxa xulusé̱dene̱ꞌ da we̱n lazreꞌ,

4 ne québedxa xululapa ne̱ꞌe̱ dizraꞌ dxuluzaze benneꞌ caꞌ ca zaj naca zánete̱ xra xrtawe̱ꞌ caꞌ.

Dizraꞌ caní dxulutil-la na bénneache.

Quebe naca na da xelácale̱ na bénneache chee̱ xelezé̱ chache̱ꞌ ca dxeleajlí lazre̱ꞌ Dios.

Caní dxenné̱ xúedaꞌ lueꞌ xecha lasa.

5 Dxenné̱ xúedaꞌ lueꞌ gunuꞌ caní chee̱ xelezríꞌi ljwezre̱ꞌ dute̱ lázrdawe̱ꞌ,

chee̱ quebe bi sua da gagu na zria lázrdawe̱ꞌ caꞌ,

ne gaca du lazreꞌ ca dxeleajlí lazre̱ꞌ Cristo.

6 Bal-la benneꞌ caꞌ belexecuase̱ꞌ lu da caní,

naꞌ ba zaj naziꞌe̱ dizraꞌ xálaze.

7 Dxelaca lazre̱ꞌ xuluxuzájle̱ꞌe̱ da nadxixruj bea Dios,

ne quebe dxeléajniꞌine̱ꞌ da dxuluchálajqueze̱ꞌ,

ne ca naca da caꞌ dxuluxrén lazre̱ꞌ.

8 Nezdxu da nadxixruj bea na naca na xrlátaje che nu benneꞌ dxuchínene̱ꞌ na ca naca chee̱ na.

9 Dxal-laꞌ gusá lázredxu quebe bzua Dios da nadxixruj bea na chee̱ nna beꞌe na benneꞌ xrlátaje caꞌ,

san chee̱ nna beꞌe na benneꞌ caꞌ dxelune̱ꞌ da cale̱la,

ne benneꞌ caꞌ quebe dxuluzúe̱ꞌ xrtizre̱ꞌe̱,

ne benneꞌ caꞌ dxelune̱ꞌ da zrinnaj,

ne benneꞌ we̱n dul-la caꞌ,

ne benneꞌ caꞌ quebe dxelape̱ꞌ Dios ba láꞌana,

ne quebe dxelapa ba láꞌana da naca chee̱ Dios,

ne benneꞌ caꞌ dxelute xra xrnaꞌ,

ne benneꞌ caꞌ dxelutie̱ꞌ benneꞌ,

10 ne benneꞌ caꞌ dxelune̱ꞌ da sban,

ne benneꞌ biu caꞌ,

benneꞌ dxulugune̱ꞌ ljwezre biue̱ꞌ ca nuꞌula,

ne benneꞌ dxelebane̱ꞌ benneꞌ caꞌ chee̱ xelutie̱ꞌ le̱ꞌ lu naꞌ benneꞌ xula,

ne benneꞌ caꞌ dxelún lazre̱ꞌ,

ne benneꞌ caꞌ dxelexeche̱be̱ꞌ da we̱n lazreꞌ,

ne benneꞌ caꞌ dxuluchuque̱ꞌ da li.

11 Caní naca da dxuléꞌe dizraꞌ chaweꞌ da bsebaga Dios nedaꞌ.

Naque̱ꞌ Dios xabáa,

Benneꞌ szrente̱.

12 Dxapaꞌ Xránadxu Jesucristo:

Xcalenuꞌ.

Naque̱ꞌ Bénneaꞌ be̱nne̱ꞌ nedaꞌ xel-la waca chee̱ gunaꞌ da nigá,

laweꞌ da dxeléꞌene̱ꞌ nedaꞌ xlátaje̱,

naꞌ nuzúe̱ꞌ nedaꞌ lu zrin chee̱ꞌ.

13 Xúgute̱ da caní ba be̱ne̱ꞌ chiaꞌ lácala gunníaꞌ schanniꞌ chee̱ Cristo gate nate,

ne gudáu ziꞌ xuzraꞌ bi chee̱ꞌ caꞌ,

ne be̱n laꞌ chee̱ benneꞌ caꞌ.

Dios bexache lazre̱ꞌ nedaꞌ laweꞌ da quebe ne cheajlí lazraꞌ Cristo,

ne quebe guxéajniꞌidaꞌ da naꞌ be̱naꞌ.

14 Chee̱ le̱ naꞌ Xránadxu,

dute̱ lu xel-la zriꞌi lazreꞌ zren chee̱ꞌ bnite lawe̱ꞌ chiaꞌ,

ne be̱nne̱ꞌ nedaꞌ xel-la dxeajlí lazreꞌ,

ne xel-la zriꞌi lazreꞌ da nápadxu laweꞌ da nácadxu bi chee̱ Jesucristo.

15 Da nigá naca na da li,

naꞌ xúgute̱ bénneache dxal-laꞌ xeléajle̱ꞌe̱ chee̱ na.

Caní dxenná na:

Jesucristo ble̱ꞌe̱ lu xe̱zr la xu nigá chee̱ guselé̱ꞌ benneꞌ dul-la caꞌ,

naꞌ nedaꞌ nácadxaꞌ benneꞌ dul-la ca xúgute̱ benneꞌ caꞌ.

16 Chee̱ le̱ naꞌ Dios bexache lazre̱ꞌ nedaꞌ chee̱ guléꞌe Cristo ca szren naca xel-la zren lazreꞌ chee̱ꞌ nen nedaꞌ,

nácale̱ꞌa benneꞌ dul-la,

chee̱ gacaꞌ nedaꞌ tu da guléꞌe na lau xúgute̱ benneꞌ caꞌ xeleajlí lazre̱ꞌ Cristo,

naꞌ xelape̱ꞌ xel-la nabán chadía chacanna.

17 Chee̱ le̱ naꞌ dxal-laꞌ gápadxu ba láꞌana,

ne güe láꞌanadxu Bénneaꞌ nna béaqueze̱ꞌ chadía chacanna.

¡Cabataꞌ gatie̱ꞌ,

ne quebe gaca léꞌedxu Le̱ꞌ,

ne naque̱ꞌ Dios tu lichaꞌ,

ne sina!

¡Gaca ba Le̱ꞌ chadía chacanna!

¡Caꞌan gaca na!

18 Lueꞌ,

bi chiaꞌ,

Timoteo,

dxusebagaꞌ lueꞌ suꞌ wedil-la chee̱ tíl-lale̱nuꞌ da naca chee̱ da cale̱la,

ca da buluchalaj nédxute̱ benneꞌ caꞌ,

benneꞌ gulenné̱ꞌ waláz chee̱ Dios ca dxal-laꞌ gunuꞌ lueꞌ.

19 Be̱xru tipa xel-la dxeajlí lazreꞌ chiuꞌ,

chee̱ quebe bi sua da gulale na lu xichaj lazrdaꞌu.

Bal-la benneꞌ caꞌ quebe belune̱ꞌ caní,

naꞌ buluzúe̱ꞌ chaláꞌala xel-la dxeajlí lazreꞌ chee̱ꞌ.

20 Caní guca chee̱ Himeneo,

ne chee̱ Alejandro,

benneꞌ caꞌ bdeaꞌ nedaꞌ lu naꞌ Satanás chee̱ xulusé̱die̱ꞌ quebe xelenné̱ꞌ schanniꞌ chee̱ Dios.