Ca dxal-laꞌ guchálajle̱dxu Dios
2
Da dxundxa na ba xen dxenné̱ xúedaꞌ lueꞌ,
dxal-laꞌ nábale lau Dios gácale̱ne̱ꞌ bénneache,
ne guchálajle̱le Dios,
ne gucáꞌana szrenle Le̱ꞌ,
ne nábale Dios gunne̱ꞌ leꞌe da dxexázrjele,
ne xe̱le Dios:
Xcalenuꞌ.
Dxal-laꞌ gunle caní,
guchálajle̱le Dios da naca na chee̱ xúgute̱ bénneache.
2 Cáꞌanqueze dxal-laꞌ nábale Le̱ꞌ gácale̱ne̱ꞌ benneꞌ xichje caꞌ,
benneꞌ dxelenná beꞌene̱ꞌ bénneache,
ne benneꞌ xuꞌu laweꞌ caꞌ chee̱ chadxu chaweꞌ,
ne súadxu lu xel-la dxebeza zri lazreꞌ,
ne guzúa cuínadxu lu naꞌ Dios du lázredxu,
ne gápadxu ba láꞌana bénneache.
3 Da nigá naca na xrlátaje,
ne da dxezaca ba lazreꞌ Dios,
weselá chee̱dxu,
4 laweꞌ da dxaca lazreꞌ Le̱ꞌ xelelá xúgute̱ bénneache,
ne xelúnbeꞌe̱ da li.
5 Zua tuze Dios,
ne zua tuze wenaba chee̱ bénneache lau Dios,
Bénneaꞌ naque̱ꞌ Jesucristo,
ne cáꞌanqueze be̱n cuine̱ꞌ bénneache.
6 Jesucristo bzua cuine̱ꞌ lu xel-la gute chee̱ bexáꞌawe̱ꞌ xúgute̱ bénneache,
naꞌ bléꞌene̱ꞌ da naꞌ ca bzrin zra chee̱ na.
7 Chee̱ le̱ naꞌ bzue̱ꞌ nedaꞌ gubáz chee̱ꞌ chee̱ cuꞌa lban,
ne guléꞌedaꞌ benneꞌ caꞌ quebe zaj naque̱ꞌ judío dxal-laꞌ xeleajlí lazre̱ꞌ Cristo,
ne xelune̱ꞌ ca naca da li.
Lau Cristo dxexeche̱baꞌ,
ne quebe dxun lazraꞌ.
8 Chee̱ le̱ naꞌ dxaca lazraꞌ xuluchálajle̱ xúgute̱ bénneache Dios gátete̱ze naꞌ,
ne xelechisa ne̱ꞌe̱ dute̱ xel-la li lazreꞌ chee̱ꞌ lau Dios,
ne quebe xelezré̱ꞌe̱ ljwezre̱ꞌ,
ne quebe xeledíl-lale̱ne̱ꞌ ljwezreꞌ caꞌ.
9 Nuꞌula caꞌ dxal-laꞌ xelácue̱ꞌ da naca xlátaje̱,
ne ca naca chee̱ da dxelúe lechítaje̱ cuine̱ꞌ dxal-laꞌ gaca na xel-la dxexruj lazreꞌ,
ne xel-la du lazreꞌ,
ne quegá ca dxulupáꞌa xíchaje̱ꞌ,
ne quegá lechítaje̱ da naca na oro,
ne quegá bga caꞌ,
ne quegá zra lane̱ꞌ da zácale̱ꞌe̱ na.
10 Dxal-laꞌ xelune̱ꞌ da gácale̱ na bénneache,
ca dxal-laꞌ xelún nuꞌula caꞌ ba zaj nuzúa cuine̱ꞌ lu naꞌ Dios.
11 Nuꞌula caꞌ dute̱ lu xel-la dxexruj lazreꞌ chee̱ꞌ dxal-laꞌ xuluzé̱ nague̱ꞌ gate nu dxuse̱de xrtizra Dios,
ne quebe xelenné̱ꞌ chee̱ na.
12 Quebe dxunnaꞌ lataj nuꞌula gusé̱dene̱ꞌ benneꞌ biu caꞌ,
ne quebe nna beꞌene̱ꞌ le̱ꞌ,
san dxal-laꞌ sueꞌ zrize.
13 Caní naca na laweꞌ da be̱n Dios teca Adán,
naꞌ gudé naꞌ be̱ne̱ꞌ Eva,
nuꞌula chee̱ Adán naꞌ.
14 Adán,
quebe guzí xe̱ da xriwe̱ꞌ le̱ꞌ,
san guzí xe̱ na Eva,
nuꞌula naꞌ,
naꞌ gudé guzí xe̱ na le̱ꞌ,
naꞌ be̱ne̱ꞌ dul-la.
15 Tu nuꞌula gape̱ꞌ xel-la weselá che dxezane̱ꞌ bidu caꞌ,
ne cheajlí lazre̱ꞌ Dios,
ne nazriꞌine̱ꞌ Le̱ꞌ,
ne nuzúa cuine̱ꞌ lu naꞌ Dios,
ne gaque̱ꞌ dxexruj lazreꞌ.