Ca dxal-laꞌ xelaca benneꞌ caꞌ dxulusé̱dene̱ꞌ bi caꞌ chee̱ Cristo
3
Da líqueze naca da nigá:
Che nu benneꞌ dxezá lazre̱ꞌ gaque̱ꞌ benneꞌ gusé̱dene̱ꞌ bi caꞌ chee̱ Cristo,
tu zrin xrlátaje dxaca lazre̱ꞌ gune̱ꞌ.
2 Tu benneꞌ dxusé̱dene̱ꞌ bi caꞌ chee̱ Cristo:
Dxal-laꞌ gaque̱ꞌ benneꞌ quebe bi zua da dxunite na le̱ꞌ.
Dxal-laꞌ súale̱ne̱ꞌ tuze nuꞌula.
Dxal-laꞌ gaque̱ꞌ benneꞌ dxuzéajniꞌi cuine̱ꞌ,
ne benneꞌ dxenná beꞌe cuine̱ꞌ,
ne benneꞌ nape̱ꞌ ba láꞌana.
Dxal-laꞌ siꞌ lu ne̱ꞌe̱ benneꞌ xelezrine̱ꞌ lizre̱ꞌ.
Dxal-laꞌ gaque̱ꞌ benneꞌ dxaca dxusé̱dene̱ꞌ bénneache.
3 Quebe dxal-laꞌ xéꞌaje̱ꞌ da guzuzre na le̱ꞌ,
ne quebe gutil-le̱ꞌ nu benneꞌ,
ne quebe sa lazre̱ꞌ dumí.
Dxal-laꞌ gaque̱ꞌ benneꞌ dxexruj lazreꞌ,
ne zren lazreꞌ.
4 Dxal-laꞌ nézene̱ꞌ nna beꞌene̱ꞌ benneꞌ zaj zre̱ꞌe̱ lizre̱ꞌ,
ne guléꞌene̱ꞌ zríꞌine̱ꞌ caꞌ xelácabeꞌ wezúa dizraꞌ,
ne xelápabeꞌ ba láꞌana xra xrnabeꞌ.
5 Che nu benneꞌ quebe nézene̱ꞌ ájala nna beꞌene̱ꞌ benneꞌ zaj zre̱ꞌe̱ lizre̱ꞌ,
¿ájazra gune̱ꞌ gusé̱dene̱ꞌ bi caꞌ chee̱ Dios?
6 Benneꞌ dxusé̱dene̱ꞌ bi caꞌ chee̱ Cristo quebe dxal-laꞌ gaque̱ꞌ benneꞌ za dxúnbeate̱ dizraꞌ chee̱ Cristo,
chee̱ quebe gucáꞌana szren cuine̱ꞌ,
chee̱ quebe cuía xiꞌe̱ ca guzría xiꞌ da xriwe̱ꞌ.
7 Cáꞌanqueze dxal-laꞌ gaque̱ꞌ benneꞌ nape̱ꞌ ba láꞌana láwela benneꞌ quebe zaj naque̱ꞌ chee̱ Cristo,
chee̱ quebe gataꞌ lataj nu guzúa le̱ꞌ chaláꞌala,
naꞌ chee̱ quebe chuꞌe̱ lu naꞌ da xriwe̱ꞌ.
Ca dxal-laꞌ xelaca benneꞌ dxelácale̱ne̱ꞌ bi caꞌ chee̱ Cristo
8 Cáꞌanqueze benneꞌ caꞌ dxelácale̱ne̱ꞌ bi caꞌ chee̱ Cristo:
Dxal-laꞌ xelaque̱ꞌ benneꞌ zaj nape̱ꞌ ba láꞌana,
ne benneꞌ li lazreꞌ.
Quebe dxal-laꞌ xeléꞌaje̱ꞌ da guzuzre na le̱ꞌ,
ne quebe xelaque̱ꞌ benneꞌ dxulucudee̱ꞌ.
9 Dxal-laꞌ xelapa xánnie̱ꞌ da zácale̱ꞌe̱ chee̱ da dxeajlí lázredxu,
ne quebe bi sua da gagu na zría chee̱ꞌ lu xichaj lázrdawe̱ꞌ.
10 Dxal-laꞌ guxúe xánnele ca dxeledé̱ꞌ.
Te naꞌ,
che quebe bi zua da dxagu na zria chee̱ꞌ,
waca xelácale̱ne̱ꞌ bi caꞌ chee̱ Cristo.
11 Zruꞌula benneꞌ caní:
Dxal-laꞌ xelaque̱ꞌ benneꞌ zaj nape̱ꞌ ba láꞌana,
ne quebe xelaque̱ꞌ wetupa dizraꞌ bizruj.
Dxal-laꞌ xelaque̱ꞌ du lazreꞌ,
ne li lazreꞌ ca naca xúgute̱ da dxelune̱ꞌ.
12 Tu benneꞌ dxácale̱ne̱ꞌ bi caꞌ chee̱ Cristo dxal-laꞌ súale̱ne̱ꞌ tuze nuꞌula,
ne dxal-laꞌ nézene̱ꞌ nna beꞌene̱ꞌ zríꞌine̱ꞌ caꞌ,
ne benneꞌ zaj zre̱ꞌe̱ lizre̱ꞌ.
13 Benneꞌ caꞌ dxelácale̱ne̱ꞌ bi caꞌ chee̱ Cristo,
che dxelune̱ꞌ cháwedauꞌ zrin chee̱ꞌ,
welezruéꞌene̱ꞌ xel-la ba láꞌana,
naꞌ xelezéquedxene̱ꞌ xuluchálaje̱ꞌ du lazre̱ꞌ ca dxeajlí lázredxu Jesucristo.
Tu da bleꞌe Dios dxiꞌu ca naca da zéajle̱dxu
14 Dxebeza lazraꞌ xídazequezaꞌ xedajnnáꞌa lueꞌ,
naꞌ dxuzúajaꞌ chiuꞌ da nigá
15 chee̱ chéajniꞌinuꞌ che dxezredaꞌ,
ca dxal-laꞌ gunuꞌ ládujla benneꞌ caꞌ zaj nababe̱ꞌ chee̱ Dios,
benneꞌ caꞌ ba bláwizra Dios ban,
ne zaj nuxru chache̱ꞌ da li,
ne dxuluxúe xánnie̱ꞌ na.
16 Da li tu da zrente̱ naca da nigá bleꞌe Dios dxiꞌu ca naca da zéajle̱dxu:
Dios ble̱ꞌe̱ nigá,
ne guque̱ꞌ bénneache.
Beꞌ Láꞌazxa bléꞌene̱ꞌ naque̱ꞌ xlátaje̱.
Beleléꞌe gubáz chee̱ xabáa caꞌ Le̱ꞌ.
Benneꞌ dute̱ xe̱zr la xu belenne̱ꞌ ca naca chee̱ꞌ.
Guleajlí lazreꞌ benneꞌ zaj zre̱ꞌe̱ dute̱ xe̱zr la xu nigá Le̱ꞌ.
Dios beziꞌe̱ Le̱ꞌ xabáa.