Ca naca chee̱ benneꞌ caꞌ dxuluzúe̱ꞌ chaláꞌala xel-la dxeajlí lazreꞌ chee̱ꞌ
4
Beꞌ Láꞌazxa ba bdxixruj lie̱ꞌ wazrín zra xulusán bal-la benneꞌ xel-la dxeajlí lazreꞌ chee̱ꞌ,
naꞌ chjácale̱ne̱ꞌ beꞌ caꞌ xelezí xe̱ na le̱ꞌ,
ne xelezíꞌe̱ ca da xululéꞌe beꞌ xriwe̱ꞌ caꞌ.
2 Xuluzé̱ nague̱ꞌ ca da xuluse̱de benneꞌ we̱n lazreꞌ caꞌ,
benneꞌ dxelún láweze da xrlátaje,
ne québedxa zaj zua xel-la dxeléquebeꞌe xichaj lázrdawe̱ꞌ,
ne zaj naque̱ꞌ lázrdau zizraj,
naꞌ quebe zaj napeꞌ xel-la stuꞌ gate dxelún lazre̱ꞌ.
3 Benneꞌ caní quebe dxeluꞌe̱ latja nu guchaga naꞌ,
ne cáꞌanqueze nu xeꞌaj gagu bal-la da dxágudxu,
lácala be̱n Dios da caꞌ chee̱ xelagu benneꞌ caꞌ dxeleajlí lazre̱ꞌ Le̱ꞌ,
ne benneꞌ caꞌ zaj núnbeꞌe̱ da li,
ne xelé̱ꞌe̱ Le̱ꞌ;
Xcalenuꞌ.
4 Xúgute̱ da be̱n Dios naca na chaweꞌ,
ne quebe dxal-laꞌ bi guzúadxu chaláꞌala,
san dxal-laꞌ sidxu na,
ne xe̱dxu Dios;
Xcalenuꞌ,
5 laweꞌ da naca chaweꞌ lau Dios bítete̱ze da dxágudxu che dxundxu ca dxenná xrtizre̱ꞌ,
ne che nábadxu Le̱ꞌ gune̱ꞌ gaca na da chaweꞌ.
Benneꞌ we̱n zrin xrlátaje chee̱ Jesucristo
6 Che dxusé̱denuꞌ bi bíchedxu caꞌ da caní,
nacuꞌ bi we̱n zrin chaweꞌ chee̱ Jesucristo,
naꞌ nazí lu naꞌu dizraꞌ chee̱ Dios,
ne ca naca da dxusé̱dedxu,
da naꞌ zéajle̱nuꞌ.
7 Quebe gulapa naꞌu da dxuluzaze bénneache,
ne dizraꞌ xálaze.
Bzazraj cuinuꞌ lu da naca chee̱ Dios.
8 Che dxuzazraj cuinuꞌ ca naca lu be̱l-laꞌ dxen chiuꞌ wácale̱queze na lueꞌ lateꞌ,
san che dxuzazraj cuinuꞌ lu da naca chee̱ Dios,
wácale̱ na lueꞌ lu xúgute̱ da dxunuꞌ,
naꞌ naca na da sidxu ba neza lu xe̱zr la xu nigá,
ne cáꞌanqueze lu xe̱zr la xu da za zaꞌ.
9 Da li naca da nigá,
naꞌ xúgute̱ bénneache dxal-laꞌ xeléajle̱ꞌe̱ chee̱ na.
10 Chee̱ le̱ naꞌ dxudé xel-la ziꞌ cuínadxu dxundxu zrin laweꞌ da dxebeza lázredxu Dios ban,
Bénneaꞌ naque̱ꞌ weselá chee̱ xúgute̱ bénneache,
naꞌ dxuselé̱ꞌ benneꞌ caꞌ dxeajlí lazre̱ꞌ Le̱ꞌ.
11 Da caní dxal-laꞌ gusé̱denuꞌ bénneache,
ne nne̱ xuenuꞌ le̱ꞌ xelune̱ꞌ na.
12 Quebe guꞌu lataj nu guzúa lueꞌ chaláꞌala laweꞌ da nacuꞌ benneꞌ cuideꞌ,
san dxal-laꞌ gacuꞌ tu da guléꞌe na benneꞌ caꞌ dxeleajlí lazre̱ꞌ Cristo ca dxal-laꞌ xelune̱ꞌ.
Guléꞌe na le̱ꞌ:
Ne̱ chee̱ da dxuchálajuꞌ,
ne ne̱ chee̱ da dxunuꞌ,
ne ca nazriꞌinuꞌ le saꞌ ljwezruꞌ,
ne ca naca Beꞌ Láꞌazxa zúale̱ne̱ꞌ lueꞌ,
ne ca dxeajlí lazruꞌ Cristo,
ne ca nacuꞌ du lazreꞌ.
13 Dxácate̱ xidaꞌ nedaꞌ,
be̱n ziꞌ lazruꞌ gulabuꞌ xiche láꞌazxa láwela bénneache,
ne gutipuꞌ lazreꞌ bi bíchedxu caꞌ,
ne guzéajniꞌinuꞌ le̱ꞌ.
14 Quebe gusanuꞌ xel-la waca da be̱nna Dios lueꞌ gate buluzé̱ naꞌ benneꞌ gula caꞌ xichjuꞌ,
ne gulenné̱ꞌ ca da bleꞌe Beꞌ Láꞌazxa le̱ꞌ ca naca zrin chee̱ Xránadxu da dxal-laꞌ gunuꞌ.