Ca dxal-laꞌ xelaca benneꞌ caꞌ dxeleajlí lazre̱ꞌ Cristo
5
Quebe cun til-luꞌ tu benneꞌ gula,
san bzéajniꞌi le̱ꞌ ca xráquezuꞌ.
Gúcale̱ benneꞌ cuideꞌ caꞌ ca bi bíchequezuꞌ.
2 Gúcale̱ nuꞌula gula caꞌ ca xrnáquezuꞌ.
Gúcale̱ nuꞌula cuideꞌ caꞌ ca bi zánquezuꞌ,
dute̱ lu xel-la dxapa ba láꞌana chiuꞌ.
3 Gúcale̱ nuꞌula ba nate benneꞌ chee̱ꞌ,
nuꞌulaꞌ quebe nu xrtie̱ꞌ zradxa.
4 Che tu nuꞌula ba gute benneꞌ chee̱ꞌ ne zaj zraꞌ zríꞌine̱ꞌ,
u zre sue̱ꞌ,
le̱beꞌ dxal-laꞌ xelunbeꞌ ca da zaj nabágabeꞌ chee̱ xelácale̱beꞌ benneꞌ zaj naca xrtíaquezbeꞌ,
ne xelunbeꞌ ca da zaj nabágabeꞌ chee̱ xra xrnabeꞌ,
laweꞌ da naca na xrlátaje,
ne da dxezaca ba lazreꞌ Dios.
5 Nuꞌula da li québedxa nu chiláꞌ chee̱ꞌ dxebeza lazre̱ꞌ Dios,
ne dxuchálajle̱ne̱ꞌ Dios te zra,
ne chizrela.
6 Nuꞌula caní,
che dxune̱ꞌ ca da dxezaca ba lazreꞌ lé̱queze̱ꞌ,
naque̱ꞌ ca benneꞌ ba nate.
7 Bdxixruj beꞌe benneꞌ caꞌ xelune̱ꞌ caní,
chee̱ quebe gun na ba xen nu til-la le̱ꞌ.
8 Che nu benneꞌ quebe dxebéꞌe̱ gunne xue chee̱ benneꞌ caꞌ zaj naque̱ꞌ tuze,
ne da dxun na ba xen che quebe dxácale̱ne̱ꞌ xrtíaqueze̱ꞌ,
ba bsane̱ꞌ xel-la dxeajlí lazreꞌ chee̱ꞌ,
ne nácadxe̱ꞌ benneꞌ we̱n da zrinnaj ca tu benneꞌ quebe ne chéajle̱ꞌe̱ chee̱ Dios.
9 Lu xiche naga zria la nuꞌula caꞌ quebe nu chiláꞌ chee̱ꞌ,
benneꞌ dxácale̱le,
dxal-laꞌ guzúajle la nuꞌula caní,
nuꞌula naꞌ ba gudée̱ꞌ ga xun iza,
ne guzúa tuze benneꞌ chee̱ꞌ.
10 Dxal-laꞌ gaque̱ꞌ nuꞌula ba bé̱nle̱ꞌe̱ da xrlátaje ca da caní:
Che ba bsegule̱ꞌ zríꞌine̱ꞌ caꞌ.
Che ba guzíꞌ lu ne̱ꞌe̱ benneꞌ bíchedxu belezrín lizre̱ꞌ.
Che ba gúcale̱ne̱ꞌ benneꞌ caní dute̱ lu xel-la dxexruj lazreꞌ chee̱ꞌ.
Che ba gúcale̱ne̱ꞌ benneꞌ dxedée̱ꞌ xel-la ziꞌ.
Che bi xetú da xrlátaje ba be̱ne̱ꞌ.
11 Quebe guzríale lu xiche naꞌ nuꞌula caní che quebe ne xelezríe̱ꞌ ga xun iza laweꞌ da gagaze xucuasa xel-la dxelezá lazreꞌ chee̱ꞌ le̱ꞌ lu da naca chee̱ Cristo,
naꞌ xelaca lazre̱ꞌ xuluchaga ne̱ꞌe̱ xecha lasa,
12 naꞌ xelebague̱ꞌ zria laweꞌ da bulusane̱ꞌ ca da guleche̱be lazre̱ꞌ chee̱ Cristo.
13 Cáꞌanqueze che dxeledé̱ꞌ tu tu xuꞌu,
xelaque̱ꞌ zrawe̱de,
ne quegaze zrawe̱de,
san cáꞌanqueze xelaque̱ꞌ wetupa dizraꞌ bizruj,
naꞌ xuluchixre chee̱ꞌ lu xúgute̱ da xelenne̱ꞌ,
ne xelenné̱ꞌ da quebe dxal-laꞌ xelenné̱ꞌ.
14 Chee̱ le̱ naꞌ dxaca lazraꞌ xuluxuchaga ne̱ꞌe̱ che ne zaj naqueꞌ nuꞌula cuideꞌ,
ne xelezrá zríꞌine̱ꞌ,
ne xuluxúe̱ꞌ lizre̱ꞌ,
chee̱ quebe xelezí lataj xelezí tizra benneꞌ caꞌ dxelezre̱ꞌe̱ dxiꞌu.
15 Bal-la nuꞌula caní ba belexecuase̱ꞌ chee̱ Cristo,
ne zjácale̱ne̱ꞌ da xriwe̱ꞌ.
16 Che nu benneꞌ dxeajlí lazre̱ꞌ Cristo,
benneꞌ biu,
u nuꞌula,
che zua xrtie̱ꞌ naque̱ꞌ nuꞌula ba gute benneꞌ chee̱ꞌ,
dxal-laꞌ gácale̱ne̱ꞌ le̱ꞌ chee̱ quebe xelebaga bi caꞌ chee̱ Cristo da nigá,
naꞌ benneꞌ caní welezequeꞌ xelácale̱ne̱ꞌ nuꞌula caní québedxa nu chiláꞌ chee̱ꞌ.
17 Che zaj zraꞌ benneꞌ gula caꞌ dxulusédene̱ꞌ cháwedauꞌ bi caꞌ chee̱ Cristo,
dxal-laꞌ gápale̱ꞌe̱le benneꞌ caꞌ ba láꞌana,
naꞌ dxundxa na ba xen gápale ba láꞌana benneꞌ gula caꞌ dxuluchálajle̱queze̱ꞌ leꞌe dizraꞌ chee̱ Dios,
ne dxulusé̱dene̱ꞌ leꞌe.
18 Lu xiche láꞌazxa dxenná na:
Quebe cuꞌule xixruj dxuꞌa be̱zre,
be̱ dxíchujbaꞌ zruaꞌ xtila.
Cáꞌanqueze dxenná na:
Benneꞌ we̱n zrin dxal-laꞌ siꞌe̱ xrlázruje̱ꞌ.
19 Quebe guzé̱ naguꞌ che nu gagu zria chee̱ tu benneꞌ gula chee̱ xudauꞌ che quebe xeleláꞌ chupa u chunna benneꞌ xelexeche̱be̱ꞌ.
20 Benneꞌ caꞌ dxelúnqueze̱ꞌ dul-la,
dxal-laꞌ til-luꞌ benneꞌ caꞌ láwela xúgute̱ bi caꞌ chee̱ Cristo,
chee̱ xelezrebe xezícadxa benneꞌ caꞌ.
21 Lau Dios,
ne lau Xránadxu Jesucristo,
ne lau gubáz blau caꞌ chee̱ xabáa chee̱ꞌ,
dxusebagaꞌ lueꞌ chee̱ gunuꞌ da caní.
Dxenné̱ xuedaꞌ lueꞌ quebe cueuꞌ ca zaj naca benneꞌ,
ne quebe guchaꞌu ca gunuꞌ chee̱ tu tu benneꞌ.
22 Quebe xexúbenuꞌ nu la guzúateuꞌ lu zrin chee̱ Cristo chee̱ quebe baguꞌ dul-la chee̱ benneꞌ xula.
Quebe gulapa naꞌu ne tu da cale̱la.
23 Laweꞌ da quebe chaweꞌ zua le̱ꞌu,
ne tu lize dxaca na,
québedxa xéꞌajuꞌ nísaze,
san güeꞌe lateꞌ xrise uva wal-la.