Pablo dxenné̱ xúene̱ꞌ bíchedxu caꞌ xelenabe̱ꞌ Dios gácale̱ne̱ꞌ le̱ꞌ
3
Naꞌa,
bi bíchaꞌdauꞌ,
le naba Dios gácale̱ne̱ꞌ netuꞌ,
chee̱ zrínzega dizraꞌ chee̱ Xránadxu xúgute̱ xe̱zre caꞌ,
ne chee̱ xelezíꞌe̱ na dute̱ lu xel-la ba láꞌana,
ca guca ládujla leꞌe.
2 Le nábaquezle chee̱ ladxu lu naꞌ benneꞌ caꞌ dxelune̱ꞌ da cale̱la,
ne lu naꞌ benneꞌ sban caꞌ,
laweꞌ da quegá xúgute̱ benneꞌ dxeleajlí lazre̱ꞌ Cristo.
3 Xránadxu naque̱ꞌ li lazreꞌ,
naꞌ Le̱ꞌ guzé̱ chache̱ꞌ leꞌe,
ne guxúe̱ꞌ leꞌe chee̱ quebe bi da cale̱la gaca na chee̱le.
4 Dxuxrén lázrentuꞌ Xránadxu gácale̱ne̱ꞌ leꞌe chee̱ gunle ca da dxé̱nentuꞌ leꞌe,
ca ba dxúnquezle.
5 Dxenábantuꞌ lau Xránadxu gácale̱ne̱ꞌ leꞌe chee̱ gápale xel-la zriꞌi lazreꞌ da gunna Dios leꞌe,
ne gápale xel-la zren lazreꞌ da gunna Cristo leꞌe.
Dxal-laꞌ gundxu zrin
6 Leꞌe,
bi bíchaꞌdauꞌ,
lu La Xránadxu Jesucristo dxé̱nentuꞌ leꞌe quebe gunle tuze nútete̱ze bi bíchedxu quebe dxaca lazre̱ꞌ gune̱ꞌ zrin,
ne quebe dxune̱ꞌ ca da bsé̱dentuꞌ leꞌe.
7 Ba nézele dxal-laꞌ gunle zrin ca be̱ntuꞌ netuꞌ gate naꞌ zúale̱ntuꞌ leꞌe.
8 Quebe nu chee̱ gudáguntuꞌ cáꞌaze che nadxu quebe gudízrujntuꞌ na.
Bé̱nle̱ꞌe̱quezentuꞌ zrin te zra,
ne chizrela chee̱ quebe bsaca ziꞌntuꞌ leꞌe da gáguntuꞌ.
9 Nácaqueze chee̱ntuꞌ nábantuꞌ leꞌe da gáguntuꞌ,
san be̱ntuꞌ zrin chee̱ bléꞌentuꞌ leꞌe dxal-laꞌ gunle ca bé̱nquezentuꞌ netuꞌ.
10 Gate naꞌ zúale̱ntuꞌ leꞌe,
bdentuꞌ lu naꞌle da nadxixruj bea nigá:
Benneꞌ quebe dxaca lazre̱ꞌ gune̱ꞌ zrin caꞌan gune̱ꞌ quebe gawe̱ꞌ.
11 Ba bénentuꞌ bál-lale leꞌe quebe dxunle zrin,
naꞌ dxedázele dxuchixre chee̱le da dxaca chee̱ benneꞌ xula.
12 Benneꞌ caní dxixruj beꞌentuꞌ,
ne dxusebágantuꞌ le̱ꞌ lau Xránadxu Jesucristo chee̱ xelune̱ꞌ zrin du lazre̱ꞌ chee̱ gataꞌ da xeleꞌaj xelawe̱ꞌ.
13 Leꞌe,
bi bichaꞌ,
le gun da xrlátaje,
ne quebe cheajtá lázrele.
14 Che nu benneꞌ quebe dxuzúe̱ꞌ dizraꞌ ca da dxennantuꞌ lu xiche nigá,
le nnaꞌ nu bénneaꞌ,
ne quebe gunle le̱ꞌ tuze,
chee̱ gapa stue̱ꞌ.
15 Quebe zráꞌale le̱ꞌ,
san le guzéajniꞌi le̱ꞌ ca bi bíchele.
Pablo dxuzé̱ꞌ dizraꞌ bi bíche̱dxu caꞌ
16 Xránadxu naque̱ꞌ Bénneaꞌ dxunne̱ꞌ dxiꞌu xel-la dxebeza zri lazreꞌ.
Dxenabaꞌ lau Le̱ꞌ gúnnaqueze̱ꞌ leꞌe xel-la dxebeza zri lazreꞌ lu xúgute̱ da dxunle,
ne súale̱ne̱ꞌ xúgute̱le leꞌe.