Benneꞌ xriwe̱ꞌ
2
Leꞌe,
bi bichaꞌ,
ca naca chee̱ zra xeláꞌ Xránadxu Jesucristo chee̱ xutupe̱ꞌ dxiꞌu chee̱ Le̱ꞌ,
dxataꞌ xúentuꞌ leꞌe
2 chee̱ quebe guchale ca dxéquele,
ne quebe súale ste̱be chee̱ bi dizraꞌ xuluchalaj bénneache lácala xelenné̱ꞌ naca na da dxunezruj Beꞌ Láꞌazxa le̱ꞌ,
u chee̱ xetú bila dizraꞌ xénele,
u chee̱ bi xiche xelenné̱ꞌ naca na da gusél-lantuꞌ netuꞌ,
che dxenná na ba beláꞌ Xránadxu.
3 Quebe güele lataj nu si xe̱ leꞌe,
laweꞌ da xeleláꞌ bénneache xelebéaj xíchaje̱ꞌ Dios,
ne laꞌ bénneaꞌ dxedábague̱ꞌ Dios nédxula gate zrin zra xeláꞌ Xránadxu.
Bénneaꞌ dxedábague̱ꞌ Dios,
naꞌ ba naca chee̱ꞌ cuía xíqueze̱ꞌ,
4 naꞌ tábague̱ꞌ xúgute̱ da naca chee̱ Dios,
ne xúgute̱ da dxulucáꞌana szren bénneache.
Gucáꞌana szren cuine̱ꞌ ca zrinte̱ cheajchéꞌe̱ lu xudauꞌ chee̱ Dios,
ne gun cuine̱ꞌ ca Diósqueze.
5 ¿Quebe dxeajsá lázrele gúchequezaꞌ leꞌe da nigá gate naꞌ zúale̱naꞌ leꞌe?
6 Leꞌe ba nézele Nu Benneꞌ nuzague̱ꞌ bénneaꞌ dxedábague̱ꞌ Dios chee̱ quebe le̱ꞌe̱ gate quebe ne zrin zra le̱ꞌe̱.
7 Ba dxun zrin xel-la waca da nagache chee̱ da cale̱la,
san zua Nu Benneꞌ nuzague̱ꞌ le̱ na naꞌa,
ca zrin zra xecuasa Bénneaꞌ nuzague̱ꞌ le̱ na.
8 Nadxa laꞌ bénneaꞌ dxedábague̱ꞌ Dios,
naꞌ Xránadxu Jesús gutie̱ꞌ le̱ꞌ,
guchínene̱ꞌ beꞌ da dxuaj na dxuꞌe̱,
ne guzría xiꞌe̱ le̱ꞌ,
guchínene̱ꞌ xel-la naxaníꞌ chee̱ zra ze̱ꞌe̱.
9 Benneꞌ xriwe̱ꞌ naꞌ ze̱ꞌe̱ ne̱ chee̱ xel-la dxenná bea chee̱ Satanás,
naꞌ lu dute̱ xel-la waca chee̱ na gune̱ꞌ da caꞌ xelunna bea na,
ne xel-la waca caꞌ da zaj naca na we̱n lazreꞌ,
10 ne guchínene̱ꞌ xúgute̱ da cale̱la caꞌ chee̱ si xe̱ꞌe̱ benneꞌ caꞌ xelebía xiꞌe̱,
benneꞌ caꞌ quebe gulaca lazre̱ꞌ xelezíꞌe̱ da li chee̱ xelelé̱ꞌ.
11 Chee̱ le̱ naꞌ Dios dxuꞌe̱ lataj si xe̱ da cale̱la benneꞌ caꞌ chee̱ xeléajle̱ꞌe̱ chee̱ da we̱n lazreꞌ,
12 chee̱ xelebía xiꞌ xúgute̱ benneꞌ caꞌ quebe gulaca lazre̱ꞌ xeléajle̱ꞌe̱ chee̱ da li,
san dxeledánedxene̱ꞌ da naca da cale̱la.
Dios guqué̱ꞌe̱ dxiꞌu chee̱ ladxu
13 Netuꞌ tu dxál-laꞌqueze xe̱ntuꞌ Dios:
Xcalenuꞌ ca naca chee̱le leꞌe,
bi bíchaꞌdauꞌ,
nazríꞌi Xránadxu leꞌe,
laweꞌ da gucáꞌa Dios leꞌe nédxute̱ chee̱ lale.
Beꞌ Láꞌazxa ba nune̱ꞌ leꞌe chee̱ Dios laweꞌ da dxéajle̱le chee̱ da li.
14 Chee̱ gaca chee̱le da nigá Dios ba bláwizre̱ꞌ leꞌe ne̱ chee̱ dizraꞌ chaweꞌ da dxuchálajntuꞌ,
chee̱ zruéꞌele xel-la szren chee̱ Xránadxu Jesucristo.
15 Chee̱ le̱ naꞌ,
bi bíchaꞌdauꞌ,
le se̱ chacha,
ne quebe gal-la lázrele da caꞌ bzéajniꞌintuꞌ leꞌe caníqueze,
ne cáꞌanqueze lu xiche.
16 Dxenabaꞌ lau Xránadxu Jesucristo,
ne lau Xradxu Dios,
Bénneaꞌ lu dute̱ xel-la xrlátaje chee̱ꞌ bzriꞌine̱ꞌ dxiꞌu,
ne ba be̱nne̱ꞌ dxiꞌu xel-la dxexúe zren chee̱ꞌ tu chiꞌi gaze,
ne tu xel-la dxebeza lazreꞌ li.
17 Dxenabaꞌ Le̱ꞌ gutipe̱ꞌ lázrele,
ne guzé̱ chúchue̱ꞌ leꞌe chee̱ nnale,
ne gunle xúgute̱ da xrlátaje.