5
Naꞌa,
ca naca chee̱ bi zra,
u bi iza xeláꞌ Xránadxu,
quebe dxun na ba xen guzúajaꞌ chee̱le,
bi bichaꞌ.
2 Ba nézquezle leꞌe zrin zra xeláꞌ Xránadxu gate québela nu dxebeza Le̱ꞌ,
ca za tu benneꞌ gubán chizrela.
3 Gate dxelenná bénneache:
Cháwele̱ꞌe̱ dxaca chee̱dxu,
ne quebe bi dxuchixre chee̱,
nadxa za da guzría xi na benneꞌ caꞌ,
ca za xel-la dxudía chee̱ tu nuꞌula gate zue̱ꞌ ziꞌi,
ne quebe xelelé̱ꞌ lu da naꞌ.
4 Leꞌe,
bi bichaꞌ,
quebe zúale lu da chul-la,
chee̱ quebe gaca chee̱le lu zra naꞌ xeláꞌ Xránadxu ca dxaca chee̱ tu benneꞌ dxuꞌu gubán lizre̱ꞌ.
5 Xúgute̱le leꞌe dxunle xrlátaje,
da naca chee̱ xel-la naxaníꞌ,
ne chee̱ te zra.
Quebe dxundxu da cale̱la,
da naca chee̱ chizrela,
ne chee̱ da chul-la.
6 Chee̱ le̱ naꞌ quebe dxal-laꞌ gácadxu ca benneꞌ la waseꞌ ca dxelún benneꞌ xula,
san dxal-laꞌ gácadxu ban lazreꞌ,
ne guzéajniꞌi cuínadxu.
7 Benneꞌ dxelase,
chizrela dxelásie̱ꞌ,
ne benneꞌ dxelezuzre,
chizrela dxelezúzrequeze̱ꞌ.
8 Nácadxu dxiꞌu chee̱ te zra,
naꞌ dxal-laꞌ guzéajniꞌi cuínaquezdxu.
Che dxeajlí lázredxu Xránadxu,
ne zriꞌidxu Le̱ꞌ,
da nigá gaca na chee̱dxu ca tu zra lana benneꞌ zeje̱ꞌ wedil-la da naca na xia.
Cáꞌanqueze che dxebeza lázredxu ladxu,
da nigá gaca na chee̱dxu ca tu lapa xia ca da dxuzúa tu benneꞌ zeje̱ꞌ wedil-la xíchaje̱ꞌ.
9 Dios quebe be̱ne̱ꞌ chee̱dxu tedxu lu da ba xaꞌ da sel-le̱ꞌ lu xel-la dxezráꞌa chee̱.
Be̱ne̱ꞌ chee̱dxu zruéꞌedxu xel-la weselá ne̱ chee̱ Xránadxu Jesucristo.
10 Jesucristo gutie̱ꞌ waláz chee̱dxu chee̱ gaca bandxu tu zren nen Le̱ꞌ,
che naca bandxu,
u che ba nátedxu gate zrin zra naꞌ.
11 Chee̱ le̱ naꞌ le gutipa lázrele,
ne le guzé̱ chacha ljwézrele tule xetule,
ca ba dxúnquezle.
Pablo dxuzéajniꞌine̱ꞌ bi bíchedxu caꞌ
12 Leꞌe,
bi bichaꞌ,
dxataꞌ xúentuꞌ leꞌe gápale ba láꞌana benneꞌ dxelune̱ꞌ zrin ládujla leꞌe,
benneꞌ caꞌ gucáꞌa Xránadxu chee̱ xelenná beꞌene̱ꞌ leꞌe,
ne xulusé̱dene̱ꞌ leꞌe.
13 Dxal-laꞌ gápale benneꞌ caꞌ ba láꞌana,
ne zriꞌile le̱ꞌ laweꞌ da dxelune̱ꞌ zrin chee̱ Dios.
Le sua lu xel-la dxebeza zri lazreꞌ tule xetule.
14 Cáꞌanqueze dxusebágantuꞌ leꞌe,
bi bichaꞌ,
gusízrele benneꞌ caꞌ quebe dxelaca lazre̱ꞌ xelune̱ꞌ zrin,
ne gutipa lázrele benneꞌ caꞌ dxelate niꞌa ne̱ꞌe̱,
ne gácale̱le benneꞌ quebe zaj ze̱ꞌ chacha,
ne gácale zren lazreꞌ nen xúgute̱ bénneache.
15 Le guxúe xanneꞌ cuínale chee̱ quebe gunle da cale̱la chee̱ nu benneꞌ dxune̱ꞌ chee̱le da cale̱la,
san le gun ba xuzre gúnquezle da xrlátaje,
tule xetule,
ne chee̱ xúgute̱ bénneache.
16 Le béquezle.
17 Le guchálajle̱quezle Dios.
18 Le xe̱ Dios:
Xcalenuꞌ ca naca xúgute̱ da dxaca chee̱le.
Dxal-laꞌ gunle da nigá laweꞌ da naca na da dxaca lázrqueze Dios gunle leꞌe,
laweꞌ da nácale bi chee̱ Jesucristo.
19 Quebe guzágale da dxun Beꞌ Láꞌazxa.
20 Quebe guzúale chaláꞌala dizraꞌ da nunezruj Beꞌ Láꞌazxa nu bi bíchedxu caꞌ.
21 Le guchiꞌa xanneꞌ xúgute̱ da caꞌ,
naꞌ le siꞌ da naca na xrlátaje.
22 Le cuasa lu xúgute̱ da quebe naca na xrlátaje.
23 Dios dxunne̱ꞌ dxiꞌu xel-la dxebeza zri lazreꞌ.
Dxenabaꞌ lau Le̱ꞌ gune̱ꞌ leꞌe benneꞌ láꞌazxaqueze,
ne guxúe̱ꞌ beꞌ nácaquezle,
ne bénneꞌdu xuꞌule,
ne be̱l-laꞌ dxen chee̱le chee̱ gácale du lazreꞌ lu zra naꞌ xeláꞌ Xránadxu Jesucristo.
24 Bénneaꞌ bláwizre̱ꞌ leꞌe naque̱ꞌ li lazreꞌ,
naꞌ Le̱ꞌ gune̱ꞌ xúgute̱ da caní.
Pablo dxuzé̱ dizraꞌ bi bíchedxu caꞌ
25 Leꞌe,
bi bichaꞌ,
le naba lau Dios gácal-leneꞌ netuꞌ.
26 Le gugapa diuzre xúgute̱ bi bíchedxu caꞌ,
ne gunídale le̱ꞌ.
27 Lau Xránadxu dxusebagaꞌ leꞌe gulábale xiche nigá láwela xúgute̱ bi bíchedxu caꞌ.
28 Dxenabaꞌ lau Xránadxu Jesucristo gune̱ꞌ chee̱le da chaweꞌ.
¡Caꞌan gaca na!