Dxal-laꞌ gundxu da dxezaca ba lazreꞌ Dios
4
Leꞌe,
bi bichaꞌ,
dxataꞌ xúentuꞌ leꞌe,
ne dxusebágantuꞌ leꞌe da nigá lu La Xránadxu Jesús.
Le gúndxaqueze da bléꞌentuꞌ leꞌe gunle,
da naꞌ dxezaca ba lazreꞌ Dios.
2 Nézquezle leꞌe da bzéajniꞌintuꞌ leꞌe ne̱ chee̱ Xránadxu Jesús.
3 Da dxaca lazreꞌ Dios naca na guzúa cuínale lu naꞌ Le̱ꞌ,
ne québedxa gunle da sban,
4 naꞌ súale̱le zrúꞌulaquezle tu tule leꞌe lu xel-la láꞌazxa chee̱ Xránadxu,
ne gápale le̱ꞌ ba láꞌana,
5 ne quebe súale lu xel-la dxezá lazreꞌ chee̱ da sban ca dxelún benneꞌ quebe zaj nunbeꞌe̱ Dios.
6 Ca naca chee̱ da nigá,
netule leꞌe quebe dxal-laꞌ si xe̱le bi bíchele,
quebe gunle da sban chee̱ꞌ,
laweꞌ da xebéaj lazreꞌ Xránadxu chee̱ xúgute̱ benneꞌ dxelune̱ꞌ da caní,
ca ba bzéajniꞌintuꞌ leꞌe.
7 Dios bláwizre̱ꞌ dxiꞌu chee̱ gundxu da xrlátaje,
ne quegá gundxu da sban.
8 Caní naca,
che nu benneꞌ dxuzúe̱ꞌ chaláꞌala ca naca da nigá,
quegá tuze bénneache dxuzúe̱ꞌ chaláꞌala,
san Diósqueze dxuzúe̱ꞌ chaláꞌala,
Bénneaꞌ nunne̱ꞌ dxiꞌu Beꞌ Láꞌazxa.
9 Ca dxal-laꞌ zriꞌi ljwézrele quebe dxun na ba xen guzúajaꞌ chee̱le,
laweꞌ da ba bléꞌequeze Dios leꞌe chee̱ zriꞌi ljwézrele tule xetule.
10 Caníqueze dxal-laꞌ zriꞌile xúgute̱ bi bíchedxu zaj zre̱ꞌe̱ xe̱zre caꞌ zaj nababa xe̱zr la xu Macedonia.
Dxataꞌ xuentuꞌ leꞌe,
bi bichaꞌ,
chee̱ zríꞌidxa ljwézrele.
11 Le gun ba xuzre súale lu xel-la dxebeza zri lazreꞌ,
ne gunle da naca cheé̱zquezle,
ne gunle zrin nen niꞌa naꞌle ca ba guzrentuꞌ leꞌe,
12 chee̱ xelapa benneꞌ xula leꞌe ba láꞌana,
ne chee̱ quebe bi xázrjele leꞌe.
Ca gaca zra xeláꞌ Xránadxu
13 Leꞌe,
bi bichaꞌ,
dxaca lázrentuꞌ nézele ca naca chee̱ bi bíchele zaj nate,
chee̱ quebe xewine lázrele ca dxelún xezícadxa benneꞌ caꞌ quebe bi dxelebeza lazre̱ꞌ.
14 Dxéajle̱dxu gute Jesús,
ne bebane̱ꞌ ládujla benneꞌ gate,
ne cáꞌanqueze dxéajle̱dxu Dios gusebane̱ꞌ benneꞌ gate caꞌ guleajlí lazre̱ꞌ Jesús,
chee̱ xelezúale̱ne̱ꞌ Le̱ꞌ.
15 Chee̱ le̱ naꞌ dxe̱ntuꞌ leꞌe da naꞌ bleꞌe Xránadxu,
gunné̱ꞌ:
Dxiꞌu naca bandxu gate xeláꞌ Xránadxu,
quebe cheajsúale̱dxu Le̱ꞌ nédxula ca benneꞌ caꞌ zaj nate.
16 Xránaquezdxu ze̱ꞌe̱ xabáa,
naꞌ cuezre xe̱ꞌe̱ nen dute̱ xel-la dxenná bea chee̱ꞌ,
naꞌ xendxu chiꞌi gubáz blau chee̱ xabáa,
ne chiꞌi luzu da dxulucuezre̱ꞌ waláz chee̱ Dios.
Nadxa benneꞌ gate caꞌ,
benneꞌ guléajle̱ꞌe̱ chee̱ Cristo xelexebánqueze̱ꞌ zaꞌa le̱ꞌ.
17 Te naꞌ,
dxiꞌu naꞌ naca bandxu xeché̱ꞌe̱ dxiꞌu tu zren nen benneꞌ caꞌ ládujla beuj chee̱ xezrágadxu Xránadxu lu beꞌ.
Caꞌan gaca súale̱dxu Xránadxu chadía chacanna.
18 Chee̱ le̱ naꞌ le gutipa lázrele tule xetule nen dizraꞌ caní.