3
Nadxa gate québedxa guca guchaga launtuꞌ laweꞌ da quebe bi bénentuꞌ ca dxaca chee̱le,
naꞌ gúquentuꞌ xegáꞌana chúpantuꞌ lu xe̱zre Atenas,
2 naꞌ sél-lantuꞌ bi bíchedxu Timoteo xedajnnáꞌabeꞌ leꞌe,
laweꞌ da naca le̱beꞌ tu bi we̱n zrin chee̱ Dios,
ne ba be̱nbeꞌ zrin tu zren nen netuꞌ,
bchálajntuꞌ dizraꞌ chaweꞌ chee̱ Cristo,
naꞌ wazéquebeꞌ guzé̱ cháchabeꞌ leꞌe,
ne gutípabeꞌ lázrele ca dxeajlí lázrele Cristo,
3 chee̱ quebe gate niꞌa naꞌle laweꞌ da dxedentuꞌ lu da ste̱be caní.
Leꞌe nézquezle dxal-laꞌ tedxu xel-la ziꞌ caní.
4 Gate ne zúale̱ntuꞌ leꞌe bzéajniꞌintuꞌ leꞌe wadéquezdxu lu da ziꞌ da xaꞌ,
naꞌ caꞌan guca,
ca ba nézquezle.
5 Chee̱ le̱ naꞌ,
gate québedxa bzúedaꞌ guchaga lawaꞌ laweꞌ da quebe bi bendaꞌ chee̱le,
naꞌ gusel-laꞌ nu bedajnaba leꞌe ájala dxaca chee̱le lu xel-la dxeajlí lazreꞌ chee̱le Cristo,
laweꞌ da bzrebaꞌ ga gaze xucuasa da xriwe̱ꞌ leꞌe lu neza chee̱ Dios,
naꞌ gaca níteze zrin be̱ntuꞌ ga naꞌ.
6 Naꞌa ba beláꞌ Timoteo ga ni zúantuꞌ,
ze zabeꞌ Tesalónica,
ne ze núabeꞌ dizraꞌ chaweꞌ ca naca xel-la dxeajlí lazreꞌ,
ne xel-la zriꞌi lazreꞌ chee̱le.
Dxe̱beꞌ netuꞌ dxeajsá lázrquezle leꞌe netuꞌ nen dute̱ xel-la zriꞌi lazreꞌ,
ne dxezá lázrele̱ꞌe̱le léꞌele netuꞌ,
ca netuꞌ dxaca lázrentuꞌ leꞌentuꞌ leꞌe.
7 Chee̱ le̱ naꞌ,
bi bichaꞌ,
dxácate̱ dxedentuꞌ lu da ste̱be caní,
ne lu da ziꞌ da xaꞌ,
zúantuꞌ xel-la dxebé laweꞌ da nézentuꞌ ze̱ cháchale ca dxeajlí lázrele Cristo.
8 Naꞌa naca chee̱ntuꞌ ca naca chee̱ tu benneꞌ bezúatee̱ꞌ chaweꞌ laweꞌ da nézentuꞌ ze̱ cháchale lu da naca chee̱ Xránadxu.
9 ¿Ájazra guntuꞌ xé̱le̱ꞌe̱ntuꞌ Dios:
Xcalenuꞌ ca dxal-laꞌ guntuꞌ waláz chee̱le leꞌe,
ne ca naca xel-la dxebé nápantuꞌ lau Dios ne̱ chee̱le leꞌe?
10 Te zra,
ne chizrela dxataꞌ xúentuꞌ Dios gunne̱ꞌ netuꞌ lataj xedajnnáꞌquezentuꞌ leꞌe,
chee̱ gácadxale li lazreꞌ ca dxeajlí lázrele Cristo.
11 Dxenábantuꞌ lau Xradxu Dios,
ne lau Xránadxu Jesucristo gácale̱ne̱ꞌ netuꞌ chee̱ séquentuꞌ xedajnnáꞌantuꞌ leꞌe.
12 Dxenábantuꞌ Le̱ꞌ chee̱ zríꞌidxa ljwézrele tule xetule,
ne chee̱ zríꞌidxale xúgute̱ bénneache ca nazríꞌintuꞌ netuꞌ leꞌe.
13 Dxenábantuꞌ Le̱ꞌ guzúa chúchue̱ꞌ lázrdaule,
chee̱ gácale benneꞌ li lazreꞌ,
ne benneꞌ láꞌazxa lau Xradxu Dios lu zra naꞌ gate xeláꞌ Xránadxu Jesús nen xúgute̱ bi chee̱ Le̱ꞌ.