Zrin be̱n Pablo lu xe̱zre Tesalónica
2
Leꞌe,
bi bichaꞌ,
ba nézquezle leꞌe da be̱ntuꞌ gate naꞌ bedajnnáꞌantuꞌ leꞌe quebe guca na zrin nite.
2 Nézquezle ca belún benneꞌ zaj zre̱ꞌe̱ xe̱zre Filipos,
bulucháchale̱ne̱ꞌ netuꞌ,
ne buluzalje̱ꞌ netuꞌ gate naꞌ za xedajnnáꞌantuꞌ leꞌe,
naꞌ Dios be̱xru chache̱ꞌ netuꞌ chee̱ bchálajntuꞌ dizraꞌ chaweꞌ chee̱ Cristo naga zúale,
lácala buluzaga benneꞌ zan netuꞌ.
3 Quebe guque zréajentuꞌ ca bchálajntuꞌ,
ne quegá bi da cale̱la guca lázrentuꞌ guntuꞌ,
ne quegá guca lázrentuꞌ si xe̱ntuꞌ leꞌe.
4 Dxuchálajquezentuꞌ ca dxaca lazreꞌ Dios laweꞌ da bxren lazre̱ꞌ netuꞌ,
ne bsebague̱ꞌ netuꞌ guchálajntuꞌ dizraꞌ chaweꞌ chee̱ Cristo.
Caní dxuchálajntuꞌ,
quegá chee̱ xelexezaca ba lazreꞌ bénneache san chee̱ xezaca ba lazreꞌ Dios,
Bénneaꞌ dxennáꞌtee̱ da zua xichaj lázrdaudxu.
5 Nézquezle leꞌe cabataꞌ ne xe̱ntuꞌ leꞌe dizraꞌ gúladauꞌ da gucáꞌana szren na leꞌe,
ne quegá bi gunnantuꞌ chee̱ bi gúnnale netuꞌ.
Dios nézquezene̱ꞌ naca na da li.
6 Cabataꞌ ne gaca lázrentuꞌ xelapa bénneache netuꞌ ba láꞌana,
leꞌe u benneꞌ xula,
lácala wazéquentuꞌ nna béꞌentuꞌ leꞌe bi gúnnale netuꞌ laweꞌ da nácantuꞌ gubáz chee̱ Cristo.
7 Be̱ntuꞌ leꞌe xrtandauꞌ ca dxun tu nuꞌula dxusegule̱ꞌ zríꞌine̱ꞌ.
8 Nazríꞌile̱ꞌe̱ntuꞌ leꞌe,
la guzrénentuꞌ gúnnate̱ntuꞌ leꞌe,
quegaze dizraꞌ chee̱ Dios,
san cáꞌanqueze xel-la nabán chee̱ntuꞌ.
Caní nazríꞌile̱ꞌe̱ntuꞌ leꞌe.
9 Leꞌe,
bi bichaꞌ,
nézquezle ca be̱ntuꞌ zrin du lázrentuꞌ chee̱ gataꞌ da xeꞌaj gáguntuꞌ.
Be̱ntuꞌ zrin te zra ne chizrela chee̱ quebe bi gusaca ziꞌntuꞌ leꞌe dxácate̱ bchálajle̱ntuꞌ leꞌe dizraꞌ chee̱ Dios.
10 Leꞌe dxexeché̱bequezle,
ne cáꞌanqueze Dios nézene̱ꞌ ca be̱ntuꞌ gate naꞌ zúale̱ntuꞌ leꞌe,
gúcantuꞌ li lazreꞌ,
ne xlátaje̱,
naꞌ quebe nu guzequeꞌ nu nne̱ chee̱ntuꞌ.
11 Cáꞌanqueze nézquezle ca be̱ntuꞌ,
bsízrentuꞌ tu tule leꞌe,
ne btípantuꞌ lázrele ca dxun tu xra bidauꞌ chee̱ zríꞌine̱ꞌ.
12 Gunná béꞌentuꞌ leꞌe gunle ca dxal-laꞌ xelún benneꞌ zaj naque̱ꞌ bi chee̱ Dios,
Bénneaꞌ dxuláwizre̱ꞌ leꞌe chee̱ chuꞌule naga dxenná beꞌe̱ lu dute̱ xel-la szren chee̱ꞌ.
13 Chee̱ le̱ naꞌ dxé̱quezentuꞌ Dios xcalenuꞌ laweꞌ da be̱nle ca naca dizraꞌ chee̱ Dios da bchálajntuꞌ,
ne guzile na ca dizraꞌ chee̱ Dios,
ne quegá ca dizraꞌ chee̱ benneácheze.
Da li naca na dizraꞌ chee̱ Dios,
ne dxun na zrin lu xichaj lázrdaule leꞌe,
naꞌ dxeajlí lázrele Le̱ꞌ chee̱ gácale chee̱ Dios dute̱ ca nácale.
14 Leꞌe,
bi bichaꞌ,
gate gudele xel-la ziꞌ chee̱ da belún benneꞌ walázr chee̱le,
guca chee̱le ca guca chee̱ benneꞌ zaj nababa chee̱ Dios naga nababa Judea,
benneꞌ caꞌ zaj naque̱ꞌ bi chee̱ Cristo,
laweꞌ da cáꞌanqueze guledée̱ꞌ xel-la ziꞌ chee̱ da belún benneꞌ walázr chee̱ꞌ caꞌ,
benneꞌ judío.
15 Benneꞌ judío caní belutie̱ꞌ Xránadxu Jesús,
ca belún benneꞌ judío caꞌ gate nate,
belutie̱ꞌ benneꞌ caꞌ gulenné̱ꞌ waláz chee̱ Dios,
naꞌ benneꞌ caní gulebeaje̱ꞌ netuꞌ lázrentuꞌ.
Quebe dxelune̱ꞌ da dxezaca ba lazreꞌ Dios,
ne dxeledábague̱ꞌ xúgute̱ bénneache,
16 naꞌ gate dxaca lázrentuꞌ guchálajle̱ntuꞌ benneꞌ quebe zaj naque̱ꞌ judío chee̱ xelelé̱ꞌ,
quebe dxelunne̱ꞌ netuꞌ lataj.
Caní dxelune̱ꞌ,
dxuluzandxe̱ꞌ dul-la da zaj nabague̱ꞌ.
Naꞌa,
ba be̱ꞌ Dios lataj dxaca da ba xaꞌ zrente̱ chee̱ benneꞌ caꞌ.
Pablo dxezá lazre̱ꞌ cheajnné̱ꞌe̱ bíchedxu zaj zre̱ꞌe̱ xe̱zre Tesalónica
17 Leꞌe,
bi bichaꞌ,
gate becuásentuꞌ naga zúale tu chiꞌi,
lácala québedxa bléꞌentuꞌ leꞌe,
nuzúaquezentuꞌ leꞌe lu lázrdauntuꞌ,
ne guzá lázrele̱ꞌe̱ntuꞌ xedajnnáꞌantuꞌ leꞌe.
18 Guca lázrentuꞌ xídantuꞌ,
naꞌ nedaꞌ,
Pablo,
guca lazraꞌ xidaꞌ tu chupa lasa,
naꞌ bzaga Satanás nedaꞌ.
19 ¿Bizra da naꞌ dxunna na netuꞌ xel-la dxebeza lazreꞌ,
ne xel-la dxebé,
ne da dxuzúa na netuꞌ lu da ba neza,
ne da dxunna bea na zua da siꞌntuꞌ lu naꞌ Dios?
Léꞌequeze gácale da caní lu zra xeláꞌ Xránadxu Jesucristo.
20 Aweꞌ.
Da nácale leꞌe gun na siꞌntuꞌ da xabáa lau Dios,
ne súantuꞌ lu da ba neza.