Benneꞌ we̱n zrin du lazreꞌ chee̱ Jesucristo
2
Lueꞌ,
zriꞌinaꞌ,
guzé̱ tipa ne̱ chee̱ da xrlátaje da nápadxu laweꞌ da nácadxu bi chee̱ Jesucristo.
2 Ca da bennuꞌ bchálajaꞌ láwela benneꞌ zan,
benneꞌ belexeche̱be̱ꞌ naca na da li,
bzua na lu naꞌ benneꞌ zaj naque̱ꞌ li lazreꞌ,
benneꞌ xelezéquene̱ꞌ xulusé̱dene̱ꞌ na benneꞌ xula.
3 Lueꞌ dxal-laꞌ gacuꞌ benneꞌ we̱n zrin du lazreꞌ chee̱ Jesucristo,
guchaga lauꞌ xel-la ziꞌ ca tu benneꞌ zeje̱ꞌ wedil-la.
4 Netú benneꞌ zeje̱ꞌ wedil-la,
benneꞌ xuꞌe̱ lu zrin chee̱ xrane̱ꞌ,
quebe dxune̱ꞌ zrin xula,
laweꞌ da dxaca lazre̱ꞌ xezaca ba lazreꞌ xrane̱ꞌ chie̱ꞌ.
5 Cáꞌanqueze,
benneꞌ xuꞌe̱ lu witaj quebe zrueꞌene̱ꞌ da xexale̱ꞌ che quebe quítaje̱ꞌ ca naca chee̱ na.
6 Cáꞌanqueze benneꞌ dxaza dxaꞌana,
benneꞌ dxúnle̱ꞌe̱ zrin,
dxal-laꞌ xezíꞌ lu ne̱ꞌe̱ lina chee̱ꞌ.
7 Blaba lazreꞌ ca da dxapaꞌ lueꞌ,
naꞌ Xránadxu guzéajniꞌine̱ꞌ lueꞌ xúgute̱ na.
8 Bsa lazreꞌ ca naca chee̱ Jesucristo,
guque̱ꞌ xrtia David,
ne bebane̱ꞌ ládujla benneꞌ gate,
ca dxenná dizraꞌ chaweꞌ da dxuchálajaꞌ nedaꞌ.
9 Ne̱ chee̱ dizraꞌ chaweꞌ nigá dxedéaꞌ xel-la ziꞌ,
ne xuꞌa lizre xia nigá ca tu benneꞌ we̱n da zrinnaj,
san dizraꞌ chee̱ Dios quebe nu sequeꞌ cuꞌu le̱ na lizre xia.
10 Chee̱ le̱ naꞌ xúgute̱ da caꞌ dxuchaga lawaꞌ ne̱ chee̱ benneꞌ caꞌ ba gucáꞌa Dios le̱ꞌ,
chee̱ cáꞌanqueze benneꞌ caꞌ xelelé̱ꞌ ne̱ chee̱ Jesucristo,
ne xelexexúꞌe̱ lu xabáa chadía chacanna.
11 Da nigá naca na da li:
Che nuzúa cuínadxu gátedxu ca bzua cuina Le̱ꞌ,
cáꞌanqueze waca bandxu nen Le̱ꞌ.
12 Che dxededxu xel-la ziꞌ,
naꞌ nna béaquezdxu tu zren nen Le̱ꞌ.
Che quebe xeché̱bedxu nácadxu bi chee̱ Le̱ꞌ,
cáꞌanqueze Le̱ꞌ quebe xeche̱be̱ꞌ nácadxu bi chee̱ꞌ.
13 Che dxiꞌu quebe nácadxu li lazreꞌ,
Le̱ꞌ nácaqueze̱ꞌ li lazreꞌ.
Dios québequeze guché̱ꞌe̱ ca naque̱ꞌ.
Tu benneꞌ we̱n zrin du lazreꞌ
14 Bsa lazreꞌ bi bíchedxu caꞌ,
ne bsizre le̱ꞌ lu La Xránadxu québedxa xulutil-la dizraꞌ ljwezre̱ꞌ.
Xel-la dxutil-la dizra ljwezre quebe bi culuén napa na,
san dxuxrinnaj na xichaj lázrdau benneꞌ caꞌ dxelénne̱ꞌ na.
15 Be̱n ba xuzre gacuꞌ we̱n zrin du lazreꞌ lau Dios,
naꞌ quebe gaca xel-la stuꞌ chiuꞌ,
laweꞌ da dxuchínenuꞌ xrlátaje dizraꞌ li.
16 Quebe gulapa naꞌu dizraꞌ xálaze,
ne dizraꞌ sban da dxuluchálajze bénneache,
da caꞌ dxulucuasa na bénneache lu da naca chee̱ Dios.
17 Dizraꞌ sban caní dxuluxrinnaj na xichaj lázrdau bénneache ca dxun tu we̱ꞌ da dxuzru na lu be̱l-laꞌ dxen chee̱dxu.
Caní guca chee̱ Himeneo,
ne Fileto,
18 benneꞌ caꞌ gulecuase̱ꞌ lu xel-la li,
naꞌ dxelenné̱ꞌ ba belexebán benneꞌ gate,
naꞌ dxuluxrínnaje̱ꞌ xel-la dxeajlí lazreꞌ chee̱ bal-la benneꞌ.
19 Dios ba gudixruj biꞌe̱ xrtizre̱ꞌ da naca na ca tu lane xuꞌu chee̱ xel-la dxeajlí lazreꞌ chee̱dxu,
da dxenná caní:
Xránadxu núnbeꞌe̱ bi chie̱ꞌ caꞌ Cáꞌanqueze dxenná na:
Xúgute̱ bi caꞌ chee̱ Cristo québedxa dxal-laꞌ xelune̱ꞌ da cale̱la.
20 Tu lu xuꞌu zaca,
quegá zraꞌ tuze zriga xéꞌena da zaj naca na oro ne plata,
san cáꞌanqueze zaj zraꞌ da zaj naca na xiaj ne xu.
Dxuluchínene̱ꞌ da caꞌ zaj zácadxa lu da zaca,
naꞌ xezícadxa da caꞌ dxuluchínene̱ꞌ ájate̱ze.
21 Nácadxu ca zriga xéꞌena caꞌ.
Che nu benneꞌ dxaca lazre̱ꞌ gaque̱ꞌ ca tu da zaca,
chee̱ gaque̱ꞌ benneꞌ guchine Xránadxu lu zrin xrlátaje chee̱ꞌ,
dxal-laꞌ xexadxe̱ꞌ ca naca da cale̱la caꞌ.
22 Bxue xanneꞌ cuinuꞌ ca zaj naca da caꞌ dxelezá lazreꞌ benneꞌ cuideꞌ caꞌ,
ne quebe gusanuꞌ da xrlátaje da dxunuꞌ,
ne ca dxeajlí lazruꞌ Cristo,
ne ca nazriꞌinuꞌ Le̱ꞌ,
ne ca dxebeza zri lazruꞌ,
da caꞌ dxunuꞌ tu zren nen xúgute̱ benneꞌ caꞌ du lazre̱ꞌ dxululáwizre̱ꞌ Xránadxu.
23 Quebe gulapa naꞌu dizraꞌ xálaze,
ne dizraꞌ quebe zeaj xrlátaje,
laweꞌ da nézenuꞌ dxuluzúa na bénneache lu da ba xaꞌ.
24 Benneꞌ we̱n zrin chee̱ Xránadxu:
Quebe dxal-laꞌ tíl-lale̱ne̱ꞌ benneꞌ.
Dxal-laꞌ gaque̱ꞌ zriꞌi lazreꞌ nen xúgute̱ bénneache.
Dxal-laꞌ gaque̱ꞌ benneꞌ dxezeque̱ꞌ gusé̱dene̱ꞌ bénneache.
Dxal-laꞌ gaque̱ꞌ zren lazreꞌ,
25 ne dute̱ xel-la dxexruj lazreꞌ gusízrene̱ꞌ benneꞌ dxelune̱ꞌ da cale̱la.