Bsa lazreꞌ benneꞌ bíchedxu caꞌ chee̱ xelune̱ꞌ ca dxuluchixruj benneꞌ caꞌ dxelenná béꞌene̱ꞌ,

ne benneꞌ xuꞌu laweꞌ,

ne chee̱ xuluzúe̱ꞌ dizraꞌ chee̱ benneꞌ caꞌ,

ne chee̱ xelezúe̱ꞌ xelune̱ꞌ xúgute̱ da xrlátaje.

2 Quebe dxal-laꞌ xelenné̱ chee̱ nu benneꞌ,

san dxal-laꞌ xelaque̱ꞌ zren lazreꞌ,

ne zriꞌi lazreꞌ,

ne dxexruj lazreꞌ lau xúgute̱ bénneache.

3 Cáꞌanqueze dxiꞌu gate nate gúcadxu benneꞌ xala,

ne quebe bzúadxu dizraꞌ chee̱ Dios.

Gudadxu cale̱la,

naꞌ gunná beꞌe be̱laꞌ dxen chee̱dxu dxiꞌu,

chee̱ be̱ndxu ca naca xúgute̱ da guzá lázredxu,

ne da bezaca ba lázredxu.

Be̱ndxu da zrinnaj,

ne gúcadxu xa lazreꞌ.

Belecuide bénneache dxiꞌu,

naꞌ bzráꞌadxu ljwézredxu tudxu xetudxu.

4 Gate Dios,

weselá chee̱dxu,

bléꞌene̱ꞌ da naca chaweꞌ chee̱ꞌ,

ne xel-la zriꞌi lazreꞌ chee̱ꞌ,

5 naꞌ bselé̱ꞌ dxiꞌu,

quegá laweꞌ da be̱ndxu dxiꞌu tu da xrlátaje,

san laweꞌ da bexache lazre̱ꞌ dxiꞌu.

Bselé̱ꞌ dxiꞌu ne̱ chee̱ da gudibe na dxiꞌu gate naꞌ bexálajdxu,

naꞌ bucube Beꞌ Láꞌazxa chee̱ꞌ dxiꞌu.

6 Ne̱ chee̱ Jesucristo,

weselá chee̱dxu,

Dios ba núnnale̱ꞌe̱ dxiꞌu Beꞌ Láꞌazxa chee̱ꞌ,

7 chee̱ ne̱ chee̱ da naca chaweꞌ chee̱ꞌ gácadxu xrlátaje lau Le̱ꞌ,

ne zruéꞌedxu xel-la nabán chadía chacanna da dxebeza lázredxu.

8 Da caní zaj naca na da li.

Dxaca lazraꞌ gusízrequeznuꞌ benneꞌ caꞌ ca naca da caní chee̱ xelebéꞌ gunne xue xelún benneꞌ caꞌ da chaweꞌ,

benneꞌ caꞌ dxeléajle̱ꞌe̱ chee̱ Dios.

Da caní zaj naca na da xrlátaje,

ne da gaca xuluchine xúgute̱ bénneache.

9 Quebe gulapa naꞌu dizraꞌ xala caꞌ,

ne dizraꞌ dxuluzaze bénneache ca naca chee̱ zra xrtawe̱ꞌ,

ne dizraꞌ da dxun na bénneache chupa laꞌa,

ne da dxulutil-la bénneache da naca chee̱ da bchixruj beꞌe Moisés.

Da caní quebe culuén zaj napa na.

Dácheze naca na.