Pedro dxuzenne̱ꞌ benneꞌ gubáz caꞌ zaj zre̱ꞌe̱ Jerusalén ca naca da be̱ne̱ꞌ
11
Benneꞌ gubáz caꞌ,
ne biche ljwézredxu caꞌ zaj zre̱ꞌe̱ Jerusalén belenne̱ꞌ ba gulezíꞌ lu naꞌ benneꞌ quebe zaj naque̱ꞌ judío dizraꞌ chee̱ Dios.
2 Gate bezrín Pedro xe̱zre Jerusalén,
gulezíꞌ tizraꞌ benneꞌ caꞌ le̱ꞌ,
benneꞌ caꞌ dxelenné̱ꞌ dxal-laꞌ chugu lateꞌ be̱laꞌ chee̱ benneꞌ caꞌ zaj naque̱ꞌ chee̱ Dios.
3 Benneꞌ caní buluche̱be̱ꞌ Pedro:
―¿Bizr chee̱ naꞌ guxíajuꞌ xeajsúale̱nuꞌ benneꞌ caꞌ quebe zaj naque̱ꞌ judío,
ne gudágule̱nuꞌ le̱ꞌ?
4 Nadxa Pedro bzenne̱ꞌ benneꞌ caꞌ xúgute̱ da guca cha chee̱ na,
gunné̱ꞌ:
5 ―Nedaꞌ zuaꞌ lu xe̱zre Jope,
naꞌ gate dxuchálajle̱naꞌ Dios,
bleꞌedaꞌ tu da bleꞌe Dios nedaꞌ.
Bleꞌedaꞌ tu ladxeꞌ zren nadxéaj dápate̱ laꞌa chee̱ na,
da dxetaj na xabáa,
ne bedajsé̱ na lawaꞌ.
6 Gate gunnáꞌ xánniaꞌ chee̱ bleꞌedaꞌ bi naꞌ zaj zria na laweꞌ,
bleꞌedaꞌ be̱ xixreꞌ,
be̱ zria tapa niꞌa naꞌbaꞌ,
ne be̱ snia caꞌ,
ne bea caꞌ zaj zua xrílabaꞌ.
7 Naꞌ bendaꞌ tu chiꞌi benneꞌ guzre̱ꞌ nedaꞌ:
“Guxasa Pedro,
be̱te tu bea caꞌ,
naꞌ gaguꞌ-baꞌ.”
8 Nedaꞌ gunnéaꞌ:
Cabí,
Xran,
laweꞌ da cabataꞌ ne gawaꞌ nedaꞌ tu da quebe nun Dios gagu bénneache,
ne quegá da naca sban.
9 Nadxa bénneaꞌ dxenné̱ꞌ xabáa gunné̱ꞌ nedaꞌ da xula,
naꞌ guzre̱ꞌ nedaꞌ:
“Da ba nucáꞌana chaweꞌ Dios,
quebe nnauꞌ lueꞌ naca na sban.”
10 Da nigá guca na chunna lasa,
naꞌ ca gudé naꞌ xúgute̱ da caꞌ belexegüén na xabáa.
11 Lu zra náꞌqueze beleláꞌ chunna benneꞌ lu xuꞌu naga zuaꞌ,
benneꞌ caꞌ gusel-la tu benneꞌ zua Cesarea chee̱ zedajlexedilaj nedaꞌ.
12 Beꞌ Láꞌazxa gunná béꞌene̱ꞌ nedaꞌ chéajle̱naꞌ benneꞌ caꞌ,
ne quebe gun chupa lazraꞌ.
La gázqueze gusiáꞌcale̱ xrupa benneꞌ biche ljwézredxu caní nedaꞌ.
Xúgute̱ntuꞌ guxúꞌuntuꞌ lizre tu benneꞌ.
13 Le̱ꞌ bchálajle̱ne̱ꞌ netuꞌ ca bléꞌene̱ꞌ lizre̱ꞌ tu gubáz chee̱ xabáa,
ze̱ niꞌe̱,
ne guzre̱ꞌ le̱ꞌ:
“Gusel-la benneꞌ chjaca xe̱zre Jope chee̱ cheajlenné̱ꞌ Simón,
benneꞌ lé̱queze̱ꞌ Pedro.
14 Benneꞌ nigá xe̱ꞌe̱ lueꞌ aja gunuꞌ chee̱ lauꞌ lueꞌ,
ne xelelá xúgute̱ benneꞌ zaj zre̱ꞌe̱ lizruꞌ.”
15 Gate guzú lawaꞌ dxuchálajle̱naꞌ benneꞌ caꞌ,
naꞌ bzrin Beꞌ Láꞌazxa guzúale̱ne̱ꞌ benneꞌ caꞌ,
ca ble̱ꞌe̱ guzúale̱ne̱ꞌ dxiꞌu nédxudaute̱.
16 Nadxa xeajsá lazraꞌ ca gunná Xránadxu,
gunné̱ꞌ:
“Da li Juan bchue̱ꞌ bénneache nisa,
naꞌ gaca chee̱le da zéaje̱ xel-laꞌ dxedxúa nisa,
súale̱ Beꞌ Láꞌazxa leꞌe.”
17 Che Dios bnézruje̱ꞌ chee̱ benneꞌ caꞌ ca be̱nne̱ꞌ dxiꞌu,
guxéajle̱dxu chee̱ Xránadxu Jesucristo,
¿nuzra nacaꞌ nedaꞌ chee̱ tábagaꞌ Dios?
18 Nadxa gate biche ljwézredxu caꞌ zaj zre̱ꞌe̱ Jerusalén belenne̱ꞌ da caní,
naꞌ gulezúa zrie̱ꞌ,
ne gulezú lawe̱ꞌ dxelúe láꞌane̱ꞌ Dios,
dxelenné̱ꞌ:
―Caꞌ naca,
la gázqueze dxunna Dios lataj benneꞌ quebe zaj naque̱ꞌ judío xelexebíꞌi lazre̱ꞌ chee̱ xeleziꞌe̱ xel-laꞌ nabán zeajlí canna.
Benneꞌ dxeléajle̱ꞌe̱ chee̱ Jesús zaj zre̱ꞌe̱ xe̱zre Antioquía
19 Gate belutie̱ꞌ Esteban,
naꞌ belau ziꞌ xuzre̱ꞌ xezícala benneꞌ dxeléajle̱ꞌe̱ chee̱ Jesús,
naꞌ bal-le̱ꞌ buluzrúnnaje̱ꞌ,
xjaque̱ꞌ xe̱zre Fenicia,
ne lu xu Chipre,
ne xe̱zre Antioquía.
Gate belezrine̱ꞌ lataj caꞌ,
naꞌ buluchálaje̱ꞌ dizraꞌ chee̱ Jesús lau benneꞌ judío cáꞌaze,
ne quegá lau benneꞌ quebe zaj naque̱ꞌ judío.
20 Nadxa bal-la benneꞌ dxeléajle̱ꞌe̱ chee̱ Jesús,
benneꞌ Chipre,
ne benneꞌ Cirene,
belelé̱ꞌe̱ xe̱zre Antioquía,
naꞌ buluchálajle̱ne̱ꞌ benneꞌ caꞌ quebe zaj naque̱ꞌ judío,
ne buluzenne̱ꞌ le̱ꞌ dizraꞌ chaweꞌ ca naca chee̱ Xránadxu Jesús.
21 Xel-laꞌ waca chee̱ Xránadxu guzúale̱ na benneꞌ caꞌ,
naꞌ caꞌan guca,
benneꞌ zan belexexaque̱ꞌ chee̱ Xránadxu.
22 Gate belén benneꞌ caꞌ da nigá,
benneꞌ dxeléajle̱ꞌe̱ chee̱ Jesús zaj zre̱ꞌe̱ Jerusalén,
naꞌ gulesel-le̱ꞌ Bernabé xe̱zre Antioquía.
23 Gate bzrin Bernabé naꞌ,
bléꞌene̱ꞌ ca da chaweꞌ da dxun Dios chee̱ benneꞌ caꞌ,
naꞌ gubéle̱ꞌe̱ne̱ꞌ.
Naꞌ bsízrene̱ꞌ xúgute̱ benneꞌ caꞌ chee̱ xelezúa chúchue̱ꞌ lu da naca chee̱ Xránadxu.
24 Bernabé naque̱ꞌ benneꞌ xrlátaje,
naꞌ zúale̱ Beꞌ Láꞌazxa le̱ꞌ,
ne dute̱ lázrdawe̱ꞌ dxéajle̱ꞌe̱ chee̱ Jesús.
Caꞌan guca,
ne̱ chee̱ le̱ꞌ guléajle̱ benneꞌ zan chee̱ Xránadxu.
25 Gudé naꞌ guxíaj Bernabé xe̱zre Tarso,
zeajxedílaje̱ꞌ Saulo,
naꞌ gate bezrelne̱ꞌ le̱ꞌ,
beche̱ꞌe̱ le̱ꞌ Antioquía.
26 Gulezúe̱ꞌ naꞌ tu iza naxáꞌ nen benneꞌ caꞌ dxeléajle̱ꞌe̱ chee̱ Jesús,
naꞌ bulusé̱dene̱ꞌ benneꞌ zan.
Lu xe̱zre Antioquía naꞌ guca na da nedxu gulé̱ꞌe̱ benneꞌ caꞌ dxeléajle̱ꞌe̱ chee̱ Xránadxu,
Benneꞌ Cristiano.
27 Ca lu zra caꞌ,
bal-la benneꞌ dxelenné̱ꞌ waláz chee̱ Dios besiáꞌque̱ꞌ Jerusalén,
xjaque̱ꞌ Antioquía.
28 Tu benneꞌ caꞌ le̱ꞌ Agabo guzé̱ꞌ láwela biche ljwézredxu caꞌ,
naꞌ ca da bnezruj Beꞌ Láꞌazxa le̱ꞌ,
gunné̱ꞌ waca tu gubinaꞌ zren du ca naca xe̱zr la xu,
naꞌ gubinaꞌ nigá guca na gate naca Claudio benneꞌ dxenná béꞌene̱ꞌ ca naca xe̱zr la xu Roma.
29 Nadxa benneꞌ caꞌ dxeléajle̱ꞌe̱ chee̱ Jesús,
benneꞌ zaj zre̱ꞌe̱ Antioquía belún ziꞌ lazre̱ꞌ xelesel-le̱ꞌ da gácale̱ na biche ljwézredxu zaj zre̱ꞌe̱ xe̱zre caꞌ zaj nababa Judea,
ca da xelezeque̱ꞌ tu tue̱ꞌ xulunézruje̱ꞌ.
30 Caꞌan belune̱ꞌ,
naꞌ belesel-le̱ꞌ tu gunaꞌ lau benneꞌ gula caꞌ chee̱ Cristo zaj zre̱ꞌe̱ Judea,
naꞌ Bernabé ne Saulo belúꞌe̱ na naꞌ.