Dxelutie̱ꞌ Jacobo ne dxelegúꞌe̱ Pedro lizre xia
12
Lu zra caꞌ guzú lau wenná bea Herodes nau ziꞌ xuzre̱ꞌ bal-la benneꞌ caꞌ dxeléajle̱ꞌe̱ chee̱ Jesús.
2 Gunná béꞌene̱ꞌ belutie̱ꞌ Jacobo,
biche Juan nen xia nalá.
3 Gate bleꞌe Herodes dxelexezaca ba lazreꞌ benneꞌ judío caꞌ ca naca da be̱ne̱ꞌ,
naꞌ gude̱l-le̱ꞌ Pedro.
Da nigá guca na lu zra laní caꞌ gate dxelawe̱ꞌ xeta xtila da quebe nachixre na cua zichaj chee̱ xeta xtila.
4 Ca gudé gude̱l-le̱ꞌ Pedro,
naꞌ guluꞌe̱ le̱ꞌ lizre xia naga buluxúe tapa cueꞌ benneꞌ dxjaca wedil-la le̱ꞌ,
zaj naca tapa benneꞌ zeje̱ꞌ wedil-la tu cueꞌ tu cueꞌ.
Herodes guca lazre̱ꞌ guzúe̱ꞌ Pedro lau benneꞌ xe̱zre caꞌ te laní.
5 Caꞌan guca xuꞌu Pedro lizre xia naga dxuluxúe xánnie̱ꞌ le̱ꞌ,
naꞌ benneꞌ biche ljwézredxu caꞌ buluchálajle̱queze̱ꞌ Dios du lazre̱ꞌ.
Dios dxuselé̱ꞌ Pedro lizre xia
6 Dxe̱la xanneꞌ ca za chaníꞌ zra xula gate dxal-laꞌ guzúa Herodes le̱ꞌ lau benneꞌ xe̱zre caꞌ,
Pedro de̱ꞌ dxásie̱ꞌ laduj chupa benneꞌ dxjaqueꞌ wedil-la,
nadxéaje̱ꞌ chupa du xia,
naꞌ xebal-la benneꞌ dxjaca wedil-la zaj zre̱ꞌe̱ dxuꞌa dxa xuꞌu dxuluxúe̱ꞌ lizre xia naꞌ.
7 Nadxa bleꞌe lau tu gubáz chee̱ xabáa chee̱ Xránadxu,
naꞌ ca naca lizre xia naꞌ guxaníꞌ.
Naꞌ gubáz chee̱ xabáa naꞌ bte̱ꞌ le̱ꞌe̱ Pedro,
ne bsebane̱ꞌ le̱ꞌ,
naꞌ guzre̱ꞌ le̱ꞌ:
―Guxásache.
―Besí le̱ꞌu,
ne buléaj zreluꞌ.
Gate bexuzre be̱n Pedro da naꞌ,
naꞌ guzre gubáz chee̱ xabáa naꞌ le̱ꞌ:
―Guxrúa xicha chiuꞌ cuxruꞌ,
ne gudále̱ nedaꞌ.
9 Pedro bedxúaje̱ꞌ cuzru gubáz chee̱ xabáa naꞌ,
ne quebe nézene̱ꞌ che naca da li che cabí ca da dxun gubáz chee̱ xabáa naꞌ.
Dxéquene̱ꞌ dxeléꞌene̱ꞌ tu da dxuléꞌe Dios le̱ꞌ.
10 Belexedée̱ꞌ naga zaj zraꞌ benneꞌ dxjaque̱ꞌ wedil-la nedxu caꞌ,
ne naga zaj zraꞌ benneꞌ gudxupeꞌ benneꞌ dxjaque̱ꞌ wedil-la,
naꞌ gate belexezrine̱ꞌ dxuꞌa dxa xuꞌu xia da dxedxuaj zeaj la nézala,
dxa xuꞌu naꞌ le̱ze na bxalaj na.
Belexedxúaje̱ꞌ,
naꞌ ca gudé besiáꞌque̱ꞌ belezrine̱ꞌ xetú neza xula chee̱ xe̱zr naꞌ,
naꞌ bcaꞌana gubáz chee̱ xabáa naꞌ le̱ze̱ꞌ.
11 Nadxa guque beꞌe Pedro ba bedxúaje̱ꞌ,
naꞌ guzáꞌ lazre̱ꞌ,
gunné̱ꞌ:
Naꞌa dxeléꞌedaꞌ naca na da li.
Xranaꞌ gusel-le̱ꞌ gubáz chee̱ xabáa chee̱ꞌ chee̱ bselé̱ꞌ nedaꞌ lu naꞌ Herodes,
ne lu xúgute̱ da gulaca lazreꞌ judío caꞌ xelune̱ꞌ chiaꞌ.
12 Da nigá dxulaba lazreꞌ Pedro gate bzrine̱ꞌ lizre María,
xrna Juan,
bi naꞌ lé̱quezebeꞌ Marcos,
naꞌ lu xuꞌu naꞌ zaj nazraga benneꞌ zan dxelenabe̱ꞌ Dios gácale̱ne̱ꞌ Pedro.
13 Gate gunné̱ Pedro dxuꞌa dxa xuꞌu naꞌ,
bzrin naꞌ tu bi nuꞌula le̱beꞌ Rode zeajnabeꞌ nu naꞌ.
14 Gate bexúnbeabeꞌ chiꞌi Pedro,
quebe gusálajbeꞌ dxa xuꞌu.
Xel-laꞌ dxebé chee̱beꞌ zexíaj chégubeꞌ naga zaj nazraga benneꞌ caꞌ chee̱ zeajé̱zrebeꞌ benneꞌ caꞌ ze̱ Pedro dxuꞌa dxa xuꞌu.
15 Nadxa benneꞌ caꞌ gulé̱ꞌe̱ bi nuꞌula naꞌ:
―Nadá xichaj lázrdaꞌu.
Bi nuꞌula naꞌ be̱n chúchubeꞌ xrtízrabeꞌ.
Benneꞌ caꞌ gulenné̱ꞌ:
―Quebe le̱ꞌ naꞌ.
Beꞌ guxuꞌe̱ naꞌ.
16 Dxácate̱ naꞌ ze̱ Pedro tu dxenné̱zqueze̱ꞌ dxuꞌa dxa xuꞌu.
Naꞌ gate gulesálaje̱ꞌ,
ne beleléꞌene̱ꞌ Pedro,
naꞌ belexebánene̱ꞌ.
17 Pedro guchisa ne̱ꞌe̱ chee̱ xelezúa benneꞌ caꞌ zrize,
naꞌ bchálajle̱ne̱ꞌ benneꞌ caꞌ ca be̱n Xránadxu bebéaje̱ꞌ le̱ꞌ lizre xia.
Naꞌ guzre̱ꞌ benneꞌ caꞌ:
―Le guzén Jacobo,
ne biche ljwézredxu caꞌ ca naca da nigá.
Nadxa bezé̱ꞌe̱ zexíaje̱ꞌ naga xula.
18 Gate guxaníꞌ,
gulezúale̱ꞌe̱ ste̱be benneꞌ dxjaque̱ꞌ wedil-la caꞌ laweꞌ da quebe zaj nézene̱ꞌ aja guca chee̱ Pedro.
19 Herodes gunná béꞌene̱ꞌ xelexilaj benneꞌ dxjaca wedil-la Pedro,
naꞌ laweꞌ da quebe belexezrelne̱ꞌ le̱ꞌ,
naꞌ gunáb xánnie̱ꞌ benneꞌ dxjaque̱ꞌ wedil-la bi guca,
naꞌ gudé naꞌ gunná béꞌene̱ꞌ xelate benneꞌ caꞌ dxjaque̱ꞌ wedil-la.
Ca gudé naꞌ guzáꞌ Herodes xe̱zre caꞌ zaj nababa Judea,
guxíaje̱ꞌ xeajsúe̱ꞌ xe̱zre Cesarea.
Dxate Herodes
20 Herodes dxezré̱ꞌe̱ benneꞌ caꞌ zaj zre̱ꞌe̱ xe̱zre Tiro,
ne xe̱zre Sidón.
Benneꞌ chee̱ xe̱zre caꞌ belune̱ꞌ tuze dizraꞌ chee̱ cheajleléꞌe cuine̱ꞌ lau Herodes naꞌ.
Belune̱ꞌ Blasto benneꞌ ljwezre̱ꞌ.
Naque̱ꞌ tu benneꞌ blau chee̱ wenná bea Herodes,
naꞌ gulesel-le̱ꞌ le̱ꞌ lau Herodes naꞌ chee̱ nabe̱ꞌ le̱ꞌ sua zri ca naca da dxaca chee̱ Herodes nen benneꞌ caꞌ.
Caní belune̱ꞌ laweꞌ da nédxute̱ dxelagu benneꞌ xe̱zre Tiro,
ne Sidón da guzáꞌ xe̱zre Cesarea naga zua Herodes.
21 Nadxa Herodes bzue̱ꞌ tu zra xelezrín benneꞌ caꞌ lawe̱ꞌ.
Lu zra naꞌ Herodes gucue̱ꞌ zra lane̱ꞌ da zácale̱ꞌe̱,
naꞌ gudxéꞌe̱ lataj blau chee̱ꞌ,
ne bchálajle̱ne̱ꞌ benneꞌ zan caꞌ.
22 Nadxa benneꞌ zan caꞌ gulezú lawe̱ꞌ dxelenné̱ꞌ zizraj:
―¡Benneꞌ nigá dxuchálaje̱ꞌ quebe naque̱ꞌ beniácheze!
¡Dios naꞌ!
23 Zra naꞌte̱ tu gubáz chee̱ xabáa chee̱ Xránadxu guluꞌe̱ Herodes tu xízrawe̱ꞌ laweꞌ da guziꞌe̱ xel-laꞌ ba láꞌana da dxal-laꞌ siꞌ Dios,
naꞌ guzré̱ꞌe̱ bzugaꞌ,
ne gútete̱ꞌ.
24 Bzriluj dizraꞌ chaweꞌ chee̱ Xránadxu,
naꞌ benneꞌ caꞌ buluchálaje̱ꞌ ca naca na gátete̱ze naꞌ.
25 Gate belezúe Bernabé,
ne Saulo zrin dxelune̱ꞌ lu xe̱zre Jerusalén,
besiáꞌque̱ꞌ xe̱zre naꞌ,
zaj naché̱ꞌe̱ Juan,
bi naꞌ lé̱quezebeꞌ Marcos.