4 E marĩ wa. Hâiwa ãma romhuri'wa norĩ hã tiwasédé te te 'manharĩ za'ra wamhã, 'Re ihâimana u'âsi mono hã tinhimihâzé te te tãma ba'a za'ra õ di. Tazahã, ab're hâ robra u ma tô sãmra, tame pawasisi na 're simasa mono da, Da'ãma Rowairébézé bâdâ iwisizéb u simipari sina, 're hâimana za'ra mono da. 5 Duréi uptabi hã, 'Re ihâimana u'âsi mono hã tinhimihâzé te te dama ba'a õ di, iwẽ'õ'wa norĩ si'manho'reptu da hã, âpusi mono da, te te pisutu wamhã. Tazahã Noéhé si ma tô sõ'reptu. Ta hã ma tô nasi aré dama rob'mahâ, 'Re ihâimana u'âsi mono hã, uburé da te 're wapari pese za'ra mono da. 'Re ihâimana u'âsi mono hã ma tô duré isiré hã 7 na dahâiba hã da'anho'reptu. 6 'Re ihâimana u'âsi mono hã te te siwi ida'awẽ'õ pese zarina ma tô duré unhama na uprosi zahuré, 'ri nho'u Sodoma duré Gomora zama. Ta hã te za 're hâimana, da te ãma 're waihu'u za'ra mono da, daro mono bâ iwasété norĩ ma, za 're iromhâimana mono zéb da hã. 7 Tamemhã ma tô sõ'reptu Lo na aibâ isisi hã. Ta hã aibâ iwẽ. Dahâimana nhiséb'õ na, 're dahâimana za'ra mono wa, ma tô te te da'ãma 're robzépata. 8 Lo hã aibâ 're imorĩ wẽ, bâtâ sidâpâ dawazari 're ihâimana mono hã ma tô te te da'ãma 're robzépata tô, marĩ iwasédé, da te 're i'manharĩ za'ra mono zé hã te te 're 'madâ'â mono wa, duré te te 're wapari mono wa. 9 Taha wasu'u na wa waihu'u za'ra ni, Uburé Danhib'apito ma, iwaihu'u pese uptabi na, isimiroti 'madâ'â pese 'wa norĩ hã ropire hawi te te 're i'anho'reptui waihu'u pese mono na hã. Duré tãma waihu'u pese uptabi di, marĩ iwasédé te te 're i'manharĩ za'ra mono norĩ ma, te te 're i'arob'manharĩ mono da hã, bâdâ te te 're sapari za'ra mono ré, Da'ãma Rowairébézé za ihâimana hã. 10 Te za te te tãma 're arob'manharĩ wasété, te te sima iwẽ zarina 're hâimana za'ra mono da, hâimana nhiséb õ na te te sima 're iwẽ za'ra mono norĩ hã duré isimiroti pire hã te te siwi 're iwẽ'õ za'ra mono norĩ zama.

à norĩ senai õ na rowahutu'wa norĩ hã, te pahi ãna marĩ i'upa te te 're 'manharĩ za'ra. Te duré 're si'madâ'â ze za'ra. à norĩ hã te pahi ãna te te 're wasété za'ra, hâiwa ãma romhuri'wa norĩ ãma hã. 11 Tazahã, hâiwa ãma romhuri'wa norĩ hã isipai u siptete na 're hâimana za'ra mono nherẽ, asa hã te te ãma 're wasété waihu'u za'ra mono õ di, Uburé Danhib'apito nho'remhã, iwasété norĩ ãma hã. 12 Ãne ni'wam norĩ 're ihâimana za'ra mono hã isimirosa'rata waihu'u õ, abaze rom na 're ihâimana za'ra mono ne hã. Ta norĩ hã da te 're sarẽ za'ra mono da, duré da te 're uprosi mono da, te 're poto za'ra. Te te 're isadaihu'u za'ra mono õ na te te 're wasété za'ra. Ãne zarina, te za uburé 'Re ihâimana u'âsi mono hã te te 're a'uprosi, abaze rom na da te 're i'uprosi za'ra mono ne.

13 Ta norĩ hã te za robzépata na iwa'rãmi wa'âbâ za'ra, robzépada hã te te dama 're i'manharĩ za'ra mono zéb zarina. Te te sima ãma 're rowẽ za'ra, bâtâ na marĩ, tihâimana nhiséb õ na te te 're i'manharĩ za'ra mono na hã. Asiré wa'aba 're si'rã'õtõ mono wamhã, te siséb ãna duré tãma rowazéb ãna te te 're wasété za'ra, da'ãma. Bâtâ bâre te sima te te 're rowẽ za'ra, dama rob'rãmi na 're ihâimana za'ra mono na hã. 14 Ta norĩ hã te sô 're sõpré u'âsi, pi'õ na 're hâimana za'ra mono da hã. Duré tiwasédé te te 're i'manharĩ za'ra mono na hã 're sadâ'â wairébé waihu'u mono õ di. Ni'wam norĩ sib'uwa na 're ihâimana za'ra mono norĩ hã te te 're simro, tiwasédé te te 're 'manharĩ za'ra mono da hã. Tipẽ'ẽ 'remhã, te rob'uiprazéb zô si te te 're rob'ruiwapari u'âsi za'ra. Tahawa, te ta norĩ hã 'Re ihâimana u'âsi mono nhimirob'manharĩ ipipa zahâpâ 're hâimana za'ra. 15 Ta norĩ hã bâdâdi i'uwaibaba na 're idanomro mono zém nhiti sipa za'ra wa, te oto siwa'ru 're nomro. Balaãu nhirã zarina te ai'aba'ré, Beoho 'ra nhirã zarina. Ta hã ma tô rob'uiprazé hã te te sima 're sawi, marĩ iwasédé te te 're i'ab'manharĩ mono wa'rãmi te te 're i'awaibui mono hã. 16 Tane nherẽ, iwasété u'âbâ ma tô awaru po'repore hã tãma timreme tete. Awaru po'repore hã 're mreme zusi mono õ nherẽ, ma tô ti'ai ãma a'uwẽ mreme na tãma tinha. Ma tô sõwada, simiza'rese ãna morĩ u'âsi tõ da, tite bâdâdi iwasété na 'Re ihâimana u'âsi mono zadawa 'mahârâ'wa hã.

17 Ã norĩ hã senai'õ na rowahutu'wa norĩ hã te aiwa ub're i'â õ ne 're hâimana za'ra, duré hunhizé rowa'u te te 're isate mono ne. 'Re ihâimana u'âsi mono ma tô ro hã sô pisutu siromo za'ra, robra uptabi hã. 18 Ta norĩ hã te te 're rowasu'u za'ra, ãma 're datob'uzu za'ra mono da, timreme na te te 're danhiptete za'ra mono dai õ nherẽ. Tihâimana uptabi õ na duré tihâimana nhiséb õ na te te dama 're rob'rãmi za'ra. Taha na te te apâ 're dapizari za'ra, ni'wam norĩ dahâimanazé i'upa na 're ihâimana za'ra mono zém hawi, aré 're iwairébé mono hã. 19 Senai'õ na rowahutu'wa norĩ hã te duré te te dama 're ropisutu za'ra, dasima iwẽ na siwa'ru 're idahâimana za'ra mono zém na. Tane nherẽ, te ta norĩ hã dahâimanazé iwasété uptabi ma si 're hâimana za'ra, tiwi 're wairébé waihu'u mono ãna. E marĩ wa. Marĩ iwasédé hã te te sitẽme 're ida'wani za'ra mono zarina te te da'ãma 're ai'uté za'ra mono wamhã, taha ma si te za 're dahâimana za'ra, tiwi 're dawairébé waihu'u mono ãna. 20 Tahawa, ni'wam norĩ hã Wanhib'apito Wanho'reptui'wa Zezu Cristu hã te te waihu'u za'ra wa, ti'ai ãma dahâimana nhiséb'õ hawi 're wairébé mono nherẽ, apâ itẽme 're isipizari za'ra mono zarina te te ãma 're ai'uté za'ra mono wa, te za tihâimana 'rãsutu u ropire uptabi na oto 're hâimana za'ra, iwana ré, 're ihâimana za'ra mono zém nhipai u. 21 Tahawa, iwẽ hã aré tãma za'ra hã, bâdâdi i'uwaibaba na 're idanomro mono zé hã niwa te te iwaihu'u za'ra õ da hã, te te waihu'u za'ra parim nherẽ, apâ tihâimana 'rata u te te sina isiri za'ra zém nhipai u, 'Re ihâimana u'âsi mono nhimiroti iwazé pe, te te iwapari za'ra nhiti romhâ na oto hâimana za'ra da. 22 Ta norĩ ma iromhâimanazé hã ma tô sina uwaimrami za'ra, ã hã ãma 're idamreme zusi mono zé, ãne hã: “Wapsã hã te za apâ sina siri, tinho'o'o zô” duré ã hã “Uhâbâ upsõi ré nherẽ, apâ te za sina siri, roptob u.”