2 'Re ihâimana u'âsi mono nhimizawi pese zé duré ite rowẽ hã asiré 're ihâimana u'âsi za'ra wa'aba mono da si, iwẽ hã. Ta hã duré aima isa'ẽtẽ u'âsi za'ra wa'aba mono da si, iwẽ hã, 'Re ihâimana u'âsi mono te rowaihu hã aima 're ihâimana za'ra wa'aba mono u'âbâ duré Wanhib'apito Zezusihi te zama.

3 Uburé marĩ hã, ãma 're wahâimana za'ra mono da, duré 'Re ihâimana u'âsi mono ma, wa te ãma 're iromhuri za'ra mono da, sô 're iwanhimnhasi za'ra mono hã ma tô te te wama 're anhomri, waihu'u pese uptabi na 're ihâimana mono zém na, rowaihu hã wama 're hâimana za'ra mono wa, wazô ihârâ za'ra hawimhã, ite rowẽ uptabi ré 're wahâimana za'ra mono da, duré wẽ uptabi na 're ihâimana mono zéb ré zama. 4 Ãne zarina, ma tô tinhimiropisudu iwẽ uptabi hã duré ipire uptabi hã te te wama 're anhomri, wama 're hâimana za'ra mono wa, ãma 're wahâimana za'ra mono da, ite rowẽ ré duré romhâ na 're wahâimana za'ra mono da, siwa'ru dasina dahâimana wi ti'ai ãma hã 'râwi da te dasima 're iwẽ za'ra mono wi hã. 5 Tahawa, sada 're asiptete za'ra wa'aba mono, aihâimana wẽ na 're i'aihâimana za'ra wa'aba mono zém na, ãma 're sisiwi za'ra wa'aba mono da, 'Re ihâimana u'âsi mono 're i'umnhasi za'ra wa'aba mono zém nhisiwi. Tawamhã rowaihu iwẽ na te za ãma 're isisiwi za'ra wa'aba mo, dahâimana wẽ na dahâimanazém nhisiwimhã. 6 Duré 'râwi dasiwi danhimi'rãmi na te za 're isisiwi za'ra wa'aba mo, rowaihu'u iwẽ nhisiwi. Duré robzépata nherẽ, dawa'a ãna dahâimanazém na te za ãma 're isisiwi za'ra wa'aba mo, 'râwi dasiwi danhimi'rãmi nhisiwimhã. Tawamhã 'Re ihâimana u'âsi mono nhimiroti 'madâ'â pese 'wa na dahâimanazém na te za duré ãma 're isisiwi za'ra wa'aba mo, robzépata nherẽ, dawa'a ãna dahâimanazém nhisiwimhã. 7 Duré isazei'wa norĩ 're isisawi za'ra mono zém na te za ãma 're isisiwi za'ra wa'aba mo, 'Re ihâimana u'âsi mono nhimiroti 'madâ'â pese 'wa na dahâimanazém nhisiwimhã. Tawamhã danhimizawizém na te za duré ãma 're isisiwi za'ra wa'aba mo, isazei'wa norĩ 're isisawi za'ra mono zém nhisiwimhã. 8 Ã norĩ hã aihâimanazéb 're, aima 're hâimana za'ra wa'aba mono wamhã, duré te te aima sina 're hâimo u'âsi za'ra wa'aba mono da, asima 're wẽ za'ra wa'aba mono wamhã, tawamhã te za iwẽ hã te te aima 're tébré za'ra wa'wa, aima 're hâimana za'ra wa'aba mono da, Wanhib'apito Zezu Cristu ãma rowaihu hã, waihu'u pese za'ra wa'aba da. 9 Tane nherẽ, ã norĩ hã ni'wai ma hâimana za'ra õ wamhã, itob'a ne te za 're hâimana. Duré niwamhã marĩ 'râwi pesere si, da te 're i'madâ'â za'ra mono ne, te za 're hâimana. Ta hã te za duré si'ãma po're ha'â, tiwasédé te te 're i'manharĩ 'rata mono zé, 'Re ihâimana u'âsi mono te te tãma ipari na hã.

10 Ĩsisãnawã norĩ, tahawa, ma'ãpé asima sô 're asõpré u'âsi aba mono, asiptete na asiwawãi ãna 're aihâimana za'ra wa'aba mono da, 'Re ihâimana u'âsi mono asô ihârâ za'ra wa'aba zém na duré te te sima i'aipisutu za'ra wa'aba zém na zama. Ãne hã 're 'manharĩ za'ra wa'aba mono wamhã, niwa isazei'õ utõrĩ za'ra wa'aba da hã, mare di za. 11 Taha zarina, te za 'Re ihâimana u'âsi mono to sina te te 're ai'a'mazasi 'wa hâiwa u hã, Wanho'reptui'wa, Wanhib'apito Zezu Cristuhu u, Danhib'apito uptabi na dama 're ihâimana u'âsi mono zéb u.

12 Tahawa, wa za te ãma 're ai'apo're pu'u u'âsi 'wa, aima waihu'u pese za'ra wa'aba nherẽ, duré asiptete na ãma 're aihâimana u'âsi za'ra wa'aba mono nherẽ, tô sena 'Re ihâimana u'âsi mono nhimiroti iwaibu za'ra wa'aba na hã. 13 Ĩte rosa'rada ãne, zahadu ĩhâiba ré ré hã, ĩma hã i'uwaibaba, ã hã roti na te ãma 're aipo're pu'u za'ra wa'aba mono da hã. 14 E marĩ wa. Ĩma waihu'u pese di, romhutu na za ã hã ĩhâiba, te irẽme na hã Wanhib'apito Zezu Cristu sõ'awi te te ĩma iwaihu'u siromo zarina. 15 Tahawa, wa za sada asapẽtẽ, ĩ'uirĩ na hã ãma 're asipo're pu'u u'âsi za'ra wa'aba mono da.

16 Wa te aima rowasu'u za'ra wa'aba wamhã, wasihawi wa te ropoto za'ra õ di, waihu'u pese uptabi na Wanhib'apito Zezu Cristu we imorĩzé hã wa te aima wasu'u za'ra wa'aba wamhã. Tazahã, watõmo na wa tô 'madâ'â za'ra ni, iwaihu'u pe hã. 17 Wanho'a za'ra, ma tô 'Re ihâimana u'âsi mono Imama hã tãma tisõ, wazé pese uptabi na 're ihâimana mono zé hã duré waihu'u pese uptabi na 're ihâimana mono zéb zama. Danhipai u Pire uptabi na Waihu'u pese uptabi na 're Ihâimana mono hã ma tô tãma tinha, ãne: “Ã hã Ĩ'ra, ĩma isawi uptabi, rowẽ za'ẽne hã te te sina ĩma 're isani mono.” 18 Damreme hâiwa hawi we te te inharĩ hã, wapo're na wa wapari za'ra ni, Wanhib'apito Zezusihi siré wahâimana za'ra ré hã, ẽtẽ'rãihâ iwazé pese ãma hã.

19 Ãne wa, wama umnhasi uptabi za'ra di, 'Re ihâimana u'âsi mono zadawa 'mahârâ'wa norĩ te te irowasu'u za'ra zé hã. Wẽ uptabi di, za ã hã rowasu'u wapari pese za'ra wa'aba wamhã. E marĩ wa. Ta hã rob'uiwẽzé, robra ãma te te 're irob'uiwẽ mono ne hã, 're i'awẽ mono zéb u, duré wasi wawẽ hã awẽ u te te 're irob'uiwẽ mono ne, aipẽ'ẽ 're, te te 're rowa'a za'ra wa'aba mono da. 20 Uburé marĩ nhipai u hã, ma'ãpé ãma 're aipo're pu'u za'ra wa'aba mono, ãhã na: 'Re ihâimana u'âsi mono zadawa 'mahârâ'wa norĩ hã sihawim na te te dama hâi'ré waihu'u za'ra õ di, Ibaihâ Iwazé pese na Imreme na ãma rob'ui'éré hã. 21 E marĩ wa. Niwa ni'wa hã te te sima iwẽzéb zarina, romnhowa 'Re ihâimana u'âsi mono mreme sõ'awi te te dama hâi'ré õ wa. Tazahã, 'Re ihâimana u'âsi mono Pẽ'ẽzani hã ma tô ni'wam norĩ hã te te 're simroi wẽ, 'Re ihâimana u'âsi mono mreme te te 're 'mahârâ za'ra mono da, te te tãma 're i'awaihu'u mono hã.