Wanhib'apito Zezu Cristu hã apâ za we imorĩzé
3
Ĩsisãnawã norĩ, ĩma i'asawi pese za'ra wa'aba norĩ hã, ã hã maparane ãma, wa ãma aima rob'ui'éré za'ra wa'wa. Ã hã maparane iwa'õtõ na, te aima irob'ui'éré za'ra wa'aba na hã, wa ĩsima wẽ, te ãma aipo're pu'u za'ra wa'aba da, asimirosa'rada iwẽ u duré i'uptabi u, ãma 're aipo're pu'u za'ra wa'aba mono da. 2 Wa ĩsima wẽ, duréihã aimawi 're ihâimana za'ra mono 'Re ihâimana u'âsi mono zadawa 'mahârâ'wa da si, te te irob'ui'éré za'ra zém na ãma aipo're pu'u za'ra wa'aba da, duré Wanhib'apito Wanho'reptui'wa nhimiroti na hã, Wanhib'apito zadawa wasu'u'wa norĩ te te aima irowasu'u za'ra wa'aba zém na, Rowasu'uwẽ na hã. 3 Ipire uptabi imorĩ'rata na hã, sô amnhasi za'ra wa'aba, waihu'u za'ra wa'aba da. Rob'rãsutu ãma hã, aibâ norĩ te za sihâi'ré za'ra, te te sima iwẽ za'ra zarina hâimana nhiséb õ na, za 're ihâimana za'ra mono norĩ hã. Ta norĩ hã te za ai'ãma 're wa'ẽ za'ra wa'wa. 4 Ãne te za ta norĩ hã 're mreme zusi: “E marĩ ma tô ãma tihâiba, ropisudu ihâimana na hã, Cristu hã za apâ we imorĩzém na hã. Wahi'rata norĩ hã idâ'â za'ra hawim haré, te marĩ hã uburé õhõ haré 're hâimana za'ra, ropoto na'rata hawim haré.” 5 Ta norĩ hã te te sima iwẽ za'ra zéb zarina, ma tô ãma po're haimrami pese za'ra, 'Re ihâimana u'âsi mono hã timreme na si hâiwa duré ti'a hã, te te ipoto zahuré zém na hã. Ti'a hã â hawi te te ipoto na duré â na te te ipoto na ma tô duré ãma po're ha'âri za'ra, 6 duré i'âpusi mono na, duréihã te te ida'a'uprosi na. 7 Tane nherẽ, hâiwa duré ti'a hã ãhã na 're ihâimana zahuré mono hã, te 'Re ihâimana u'âsi mono te te 're 'madâ'â zahuré, tô õ hã timreme na te te ãma iroti siromo zahuré zém na, za niwa unhama na te te tô i'uprosi zahuré na hã. Bâdâ Da'ãma rowairébézé za ihâimana u hã te 'Re ihâimana u'âsi mono hã te te 're 'madâ'â zahuré a'â, duré ni'wam norĩ 'Re ihâimana u'âsi mono te te waihu'u za'ra tõ da, te te sima 're iwẽ za'ra mono õ norĩ za te te i'uprosi za'ra zéb u hã.8 Ĩsisãnawã norĩ, ĩma i'asawi pese za'ra wa'aba norĩ hã, ma'ãpé ãma aipo're si'âri za'ra wa'aba tõ, ãhã na hã: Uburé Danhib'apito ma hã, misi bâdâ hã aiwa miu na wahum ne duré miu na wahu hã aiwa misi bâtâ ne, tãma hã. 9 Uburé Danhib'apito zô hã sô 're rowaptâ'â mono õ di, tinhimiropisudu te te ãma 're i'a'uwaimrami mono da hã, ni'wam norĩ hã ãne na te te ãma 're rosa'rata upa za'ra mono nherẽ. Tazahã, simi'ẽi hâ uptabi di. Te te 're asapari ze za'ra wa'wa. E marĩ wa. Te te sima wẽ õ wa, ni'wa te te i'uprosi da hã. Tãma iwẽ hã uburé dawasété na dasisãmri za'ra wa, itẽme idasipizari za'ra da si, dawasété hawi. 10 Tazahã, Wanhib'apito te bâdâ apâ we imorĩzé hã te za wi, isimisaihuri, sô danhimipari õ nherẽ, nimomo 're isisisi mono ne. Taha bâtâ na hã, hâiwa duré hâiwa na uburé marĩ 're isimasa mono hã te za aimani za'ra, robruru ipipa uptabi na. Duré uburé marĩ, hâiwa na 're ihâimana za'ra mono hã te za 'Re ihâimana u'âsi mono hã ãma aro'o. Ti'a zama duré uburé marĩ iwa 're ihâimana za'ra mono hã te za aimani za'ra za.
11 Tawamhã ãne hã aima waihu'u pese za'ra wa'aba di oto, uburé marĩ hã za isi'utõrĩ za'ra na hã. Tawamhã bété e niha aihâiba na 're aihâimana za'ra wa'aba mono da, te amnhasi za'ra wa'wa. Ma'ãpé aihâimanazém na 'Re ihâimana u'âsi mono ma si 're rowẽ za'ra wa'aba mono da, 're aihâimana za'ra wa'aba mono. Duré 'Re ihâimana u'âsi mono ma romhuri si, 're 'madâ'â pese za'ra wa'aba mono. 12 Ma'ãpé 're asimipari za'ra wa'aba mono, 'Re ihâimana u'âsi mono te, bâdâ apâ we imorĩzé iwisizéb zô. Duré aihâimanazém na 're wapsé za'ra wa'aba mono, apâ wei morĩ su'u da. Taha bâtâ na hã hâiwa te za ai'utõ za. Duré uburé marĩ ãma 're ihâimana za'ra mono hã te za ti'uwa za'ra za, unhama wa'ro zé te. 13 Tazahã, wa norĩ hã 'Re ihâimana u'âsi mono te te iropisutuzéb zarina, wa mapari za'ra ni, hâiwa itéb zô duré ti'a itéb zô zama. Tamemhã i'uwaibaba si te za uburé marĩ hã 're hâimana za'ra.
14 Tahawa, ĩsiwaihu'u norĩ, ĩma i'asawi pese za'ra wa'aba norĩ hã, ãne hã za iromhâimanazéb zô asimipari za'ra wa'aba ré hã, ma'ãpé sada 're asiptete za'ra wa'aba mono, rowẽ sina, 'Re ihâimana u'âsi mono ãma 're aihâimana za'ra wa'aba mono da, ai'uptob ãna duré marĩ na 're upa za'ra wa'aba mono ãna isõ'remhã. 15 Ma'ãpé, ãma 're aipo're pu'u za'ra wa'aba mono, Uburé Danhib'apito wa'a su'u õ zém na hã. Danho'reptuzé da te dasina 're uwaimrami za'ra mono da, te da'ãma wa'a su'u ãna 're hâimana. Wasisãnawã wama isawi pese za'ra Paulu hã ma tô ã hã wasu'u na aima rob'ui'éré za'ra wa'wa, rowaihu 'Re ihâimana u'âsi mono te te tãma isõmrizéb zarina. 16 Ãhã wasu'u na ma tô rob'ui'éré tô, uburé tinhimi'ui'éré te te i'manharĩ za'ra na hã. Isimi'ui'éré na hã, nima norĩ hã ipire te tihâimana za'ra, isadaihu'u da hã. Tahawa 'Re ihâimana u'âsi mono nhimiroti waihu'u õ 'wa norĩ hã duré sib'uwa na 're ihâimana za'ra mono norĩ hã te siwa'ru te te ãma dama 're rowasu'u upa za'ra. Tane te duré Ibaihâ Iwazé pese na rob'ui'éré na ihâiba amo aimawi norĩ ãma hã te te 're upa za'ra. Tahawa te ta norĩ hã 'râwi 're si'uprosi.
17 Tazahã, a norĩ wa'wa, ĩsiwaihu'u norĩ, ĩma i'asawi pese za'ra wa'aba norĩ hã, ãne hã aima waihu'u pese za'ra wa'aba di oto. Tahawa, ma'ãpé ãma 're pibui pese za'ra wa'aba mono, da te 're asimroi wa'aba mono tõ da, dahâimana nhiséb õ na 're idahâimana mono u duré asiptete na 're i'aihâimana za'ra wa'aba mono zém hawi 're airere'e aba mono tõ da. 18 Ma'ãpé, 're aiprédub u'âsi za'ra wa'aba mono, 'Re ihâimana u'âsi mono nhimipawaptobzé iwa'âbâ'õ na duré rowaihu Wanhib'apito duré Uburé Wanho'reptui'wa Zezu Cristuhu te na. Taha ãma si 're wawata za'ra wa'aba mono, ãhã na duré õne u'âsi! Tane tô!