2 Da'ãma 're i'aiba za'ra wa'aba mono zé hã duré rowẽ 'Re ihâimana u'âsi mono te, duré 'Re ihâimana u'âsi mono nhimizawizé hã aima 're isa'ẽtẽ u'âsi za'ra wa'aba mono da si, iwẽ hã.

3 Ĩsisãnawã norĩ, ĩma i'asawi pese za'ra wa'aba norĩ hã, wa aré ĩsima wẽ upta, te ãma aima rob'ui'éré za'ra wa'aba da, wahâiba mono bâ danho'reptuzé wama 're ihâimana za'ra mono na. Tane nherẽ, ma tô ĩ'azâ ĩpẽ'ẽ 'remhã, tô i'ru zahi zarina aimawi na te ãma aima rob'ui'éré za'ra wa'aba da, te ãma asiptete za'ra wa'aba da, asiptete sina ãma aihâimana za'ra wa'aba da, 'Re ihâimana u'âsi mono 're i'umnhasi za'ra wa'aba mono zém na, misi haré 'Re ihâimana u'âsi mono hã te te 're i'anhomri mono na, tinhib'a'uwẽ norĩ ma hã. 4 E marĩ wa. Ni'wam norĩ aibâ norĩ hã, 'Re ihâimana u'âsi mono te te 're iwazéb za'ra mono õ norĩ hã, ma tô aiwazarib za'ra wa'aba asisi, sa'rese ãna. Ta norĩ hã 'Re ihâimana u'âsi mono nhimizawizé wasu'u hã ma tô aimawi te te 're wasu'u za'ra, hâimana nhiséb õ na 're ihâimana za'ra mono zém na, 're hâimana za'ra mono nherẽ, te te 're upa za'ra mono õ newa. Te duré Zezu Cristu hã te te siwi 're wẽ'õ, misire wate za'ra Rowahutu'wa duré Wanhib'apito wama 're ihâimana za'ra mono hã. Duréi uptabi Ibaihâ Iwazé pese na rob'ui'éré hã, te tinomro siro, 'Re ihâimana u'âsi mono, iwasédé te te ãma isa'razéb zarina, za te te ihâ za'ra na hã.

5 Ãne hã, uburé aima waihu'u pese za'ra wa'aba nherẽ, wa ĩsima wẽ, te ãma aipo're pu'u za'ra wa'aba da, Uburé Danhib'apito hã Izaraéu nhihudu norĩ te te isõ'reptu za'ra na hã. Ezitu hawi ma tô sani za'ra. Tane nherẽ, taha parimhã, te te isaze za'ra õ norĩ hã ma tô uprosi. 6 Duré ãma aipo're pu'u za'ra wa'aba, hâiwa ãma romhuri'wa norĩ hã, pire na 're ihâimana za'ra mono zé, duré aré 're isi'ubumroi mono zé hã, te te irẽme za'ra zém na hã. 'Re ihâimana u'âsi mono hã ma tô ta norĩ hã sãmra, robra u. Si'uwazi nhorõ rudu isi'utõrĩ õ na, ma tô pawasisi za'ra, ãma rowairébé hã ãma hâimana za'ra da za, bâdâ isa'ẽne za ihâimana ãma hã, Da'ãma Rowairébézéb ãma. 7 Duré ãma aipo're pu'u za'ra wa'aba, Sodoma ãma aré 're idasi'ubumroi mono norĩ ãma duré Gomora ãma duré isababa 'ri wa'õno 're isimasa mono ãmab zama. Ta norĩ hã ma tô 'manharĩ za'ra hâiwa ãma romhuri'wa norĩ ne, tihâimana nhiséb õ hã duré dasina dahâimana na dawasété 'manharĩ hã. Ta norĩ hã ma tô sépata za'ra, 'Re ihâimana u'âsi mono nhimihâzé uzâ isi'utõrĩ'õ hã. Ta hã te uburé wapo're pu'uzém na wama 're hâimana za'ra, ãhã na hã.

8 Tane ã hã aibâ norĩ hã te 're sihâiba wasété za'ra, tinhotõ 'rowim ne te te 're irob'madâ'â za'ra mono zéb zarina. Ta norĩ hã te duré 'Re ihâimana u'âsi mono nhimiroti pire hã te te siwi 're wẽ'õ za'ra. Hâiwa ãma romhuri'wa norĩ ãma zama te duré te te 're wasété za'ra. 9 Ãne hã hâiwa ãma romhuri'wa tisiré norĩ 'madâ'â'wa Miguéu na isisi hã te te 'manharĩ õ di, Wa'uburé me timreme na si'wapé zahuré wamhã, ni'wa hã Mozésihi hâiba hâi ré, hâimana da hã. Miguéu hã te te wazéb ãna te te ãma wasété õ di, wa'uburé ãma hã. Ãne si ma tô tãma tinha: “Uburé Danhib'apito si, timreme te te aima ipẽtẽ da si, iwẽ hã.” 10 Tane nherẽ, te ã hã aibâ iwasété norĩ hã te te 're wasété za'ra, marĩ te te 're isadaihu'u za'ra mono õ na. Duré marĩ iwasédé hã poto hawim haré te te 're iwaihu'u za'ra mono na, abaze isimirosa'rata waihu'u õ ne, te tô taha na 'râwimhã 're si'uprosi. 11 Ta norĩ ma, 're ropipa uptabi za'ra mono di za, Caĩ nhirã zarina 're nomro mono wa. Rob'uiprazéb u'âbâ, te ta norĩ hã 're sisõmri za'ra, upa nherẽ, Balaãhã ne. Cora norĩ hã danhib'ihâ'a zada ihâimana za'ra hã 'Re ihâimana u'âsi mono te te ipisutu zahuré da, sib'rui wa, isi'utõrĩ ne, ta norĩ aibâ iwasété norĩ zama sada hâimana za'ra wa, te za 'Re ihâimana u'âsi mono hã uprosi za. 12 Ã hã aibâ norĩ hã isimimnha, asisãnawã asisawi zarina, dato asima 're 'manharĩ za'ra wa'aba mono ré, asiré 're hâimana za'ra wa'aba mono wamhã, ẽne hã â 'rowi 're isimi'wara mono ne, â na 're inomro mono norĩ wi. Pahi ãna te asiré wa'wa te te sima 're rowẽ za'ra, datoi 'remhã. Tane nherẽ, rowahutu'wa norĩ hã si'ãma si 're ihâtâ'â za'ra mono ne, te 're hâimana za'ra. Hunhizé â õ wa, rowa'u hã sima iwẽ na te te 're isate mono ne, te duré 're hâimana. Aiwa wede norĩ hã tãi 'rowim nherẽ, 're i'rãi waihu'u za'ra mono õ ne, isari hawi da te 're sihâri za'ra mono wa, 're idâ'â pese za'ra mono ne. 13 Â sisasisi 'rãihâ ne, te duré 're hâimana za'ra. Tihâimana nhiséb õ na te te ãma 're ropé za'ra, â sisasisi zaipro te te 're iropéi mono ne. Wasi norĩ hã hâiwa na siwa'ru 're isisa'rei mono ne, te 're hâimana za'ra. Robra uptabi u 're nomro mono da, ma tô 'Re ihâimana u'âsi mono hã sô pisutu siromo za'ra, tame õne u'â 're isimasa mono zéb da hã.

14 Enoqui hã Adãhã hawi 7 na dapodo ihâimana ãma ipodo hã ma tô ã hã aibâ norĩ na waihu'u siro, ãne: “Ma'ãpé, waihu'u za'ra wa'aba. Wanhib'apito hã te za wei mo, ahâ uptabi na, tite hâiwa ãma romhuri'wa norĩ wẽ uptabi na 're ihâimana za'ra mono norĩ ré, 15 uburé te te da'ãma arowairébé mono da. Ni'wam norĩ hã, 'Re ihâimana u'âsi mono te te 're waihu'u za'ra mono tõ da, te te sima 're iwẽ'õ za'ra mono norĩ ma, ropipa hã te te tãma apisutu da, te za wei mo, hâimana wasété na 're ihâimana za'ra mono u'âbâ, duré timreme iwasété uptabi na 'Re ihâimana u'âsi mono ãma te te 're iwasété za'ra mono u'âbâ, wasété uptabi na 're inomro mono norĩ ma.”

16 Ã hã aibâ norĩ hã te 're siwapsari u'âsi za'ra. Te duré 're sõpré u'âsi, marĩ na da te 're i'upa za'ra mono zéb zô. Te te sima 're iwẽ za'ra mono zéb zarina te 're hâimana u'âsi za'ra, te duré 're si uzei u'âsi za'ra duré te te sima 're rowẽ za'ra si ãma, siwa'ru marĩ hã te te sima 're wẽ za'ra mono wa.

17 Tazahã, a norĩ wa'wa ĩsiwaihu'u norĩ, ĩma i'asawi pese za'ra wa'aba norĩ hã, ma'ãpé ãma 're asipo're pu'u u'âsi za'ra wa'aba mono, Wanhib'apito Zezu Cristuhu zadawa wasu'u'wa norĩ nhimirowasu'u na hã. 18 Ãne ma tô aima roti za'ra wa'wa: “Rob'rãsutu ãma hã, ni'wam norĩ te za sihâi'ré za'ra, uburé marĩ 'Re ihâimana u'âsi mono te, 're ihâimana za'ra mono na, za 're iwa'ẽ za'ra mono hã. Ta norĩ hã marĩ iwasédé te te sima 're iwẽ za'ra mono zéb zarina si, te za 're hâimana za'ra.” 19 Ta norĩ hã te ãhã na hã da'ãma dasipo te te 're poto za'ra. 'Râwi te te sima 're iwẽ za'ra mono zarina si, te oto 're hâimana za'ra. Duré 'Re ihâimana u'âsi mono Pẽ'ẽzani hã iwa 're hâimana za'ra mono õ di, te te 're isimroi mono da hã. 20 Tazahã, a norĩ wa'wa hã ĩsiwaihu'u norĩ, ĩma i'asawi pese za'ra wa'aba norĩ hã, 're asiptete u'âsi za'ra wa'aba mono, 'Re ihâimana u'âsi mono umnhasi sina 're i'aihâimana za'ra wa'aba mono zéb zarina, aihâimana prédubzé hã asima 're sa'ẽtẽ u'âsi za'ra wa'aba mono da. Duré 're rowaptẽrẽ u'âsi za'ra wa'aba mono, 'Re ihâimana u'âsi mono Pẽ'ẽzani hã te te aima 're iwaihu'u za'ra wa'aba mono zéb zarina. 21 'Re ihâimana u'âsi mono nhimizawizém na 're aihâimana u'âsi za'ra wa'aba mono, Wanhib'apito Zezu Cristu hã da'ãma 're isiba mono zéb zarina, dahâimanazé isi'utõrĩ'õ hã te te dama isõmri za'ra zéb zô 're asimipari za'ra wa'aba mono ré hã.

22 Ãma 're aiba za'ra wa'aba mono, ni'wam norĩ hã zahadu 're isiwawã za'ra mono norĩ ãma hã. 23 Duré ni'wam norĩ hã siwa'ru 're nomro mono da nherẽ, sa'ẽtẽ 're sani za'ra wa'aba mono, unhama wi. Tane nherẽ, ãma 're pibui pese za'ra wa'aba mono, da'ãma 're i'aiba za'ra wa'aba mono zém na hã. Duré i'uza zama tiwi 're wẽ'õ za'ra wa'aba mono, tiwasédé te te 're i'manharĩ za'ra mono zém na te te 're ihâ uptob za'ra mono hã.

24 'Re ihâimana u'âsi mono ma hã waihu'u pese uptabi di, 're ai'morõpãrĩ za'ra wa'aba mono tõ da, te te 're i'ai'ru za'ra wa'aba mono õ da hã, aiwẽ uptabi na duré aima rowẽ za'ẽtẽ ré, wẽ uptabi na 're Ihâimana mono nho're aimasa wa'aba da. 25 Õ hã misire 'Re ihâimana u'âsi mono te 're hâimana. Duré Õhõ si Wanho'reptui'wa. Õhõ ãma si, wa za 're wawata za'ra Wanhib'apito Zezu Cristuhu u'âbâ. Õhõ ãma si te rowa'a isa'ẽne hã 're hâimana, pire na 're ihâimana mono zé hã duré waihu'u pese uptabi na duré isadawa para marĩ 're hâimana za'ra mono wa, romna'rata hawim haré, ãhã na duré õne u'â za.

Tane tô.