à hã ibaihâ na rob'ui'éré'wa hã Zuwã na isisi, Zezusihi zadawa wasu'u'wa 're imorĩ. Ta hã Zezusihi wasu'uwẽ na te te dama 're rowasu'u mono 'ru te, si'ihi wapsi, ma tô sẽrẽ ni, dazazéb 're, Patimu na rob'ré za'iti nhisi ãma. Tame sãmra ré, ma tô rob'ui'éré, ã hã ibaihâ na hã.

à hã ibaihâ hã Azia na danhipti'a nho'õmo nhisi ãma, Zezusihi zazei'wa, siré 're isi'rã'õtõ mono norĩ ma, ma tô rob'ui'éré, 7 na tiza'rui mono bâ 're isi'rã'õtõ mono norĩ ma hã. Tinhimi'ui'éré na ma tô tãma roti za'ra, siptete sina Zezusihi ãma 're nomro u'âsi mono da, danhib'rata te te 're robzépata za'ra mono nherẽ, te te 're rẽme za'ra mono tõ da.

Sõtõ 'rowim ne, 'Re ihâimana u'âsi mono te te tãma 're i'awaihu'u mono na ma tô rob'ui'éré, Zuwã hã. Satanasihi nhiptetezé hã za isi'utõrĩzém na ma tô rob'ui'éré, Zezusi za te te ãma i'ai'utézém na rob'rãsutuzéb ãma hã.

Ãhã na hã Zuwã sõtõ 'rowim ne, marĩ te te i'a'madâ'â mono zém na rob'ui'éré hã wa te 're sõré za'ra mono wamhã, wama pire za'ra di, wa te 're iwaihu'u za'ra mono da hã. E marĩ wa. Za 're iromhâimana mono zém na, te te rowasu'u mono wa, wanhowab za'ra, duré zahadu te te wama ahâi'ré mono õ wa. Zuwã hã ma tô te te sima 're wa'awẽ, ropire hã wazô 're wairébé mono wamhã, 're wapahi za'ra mono tõ da. E marĩ wa. Zezu Cristu hã uburé dama pire uptabi wa, duré taha si dama pire na 're ihâimana za'ra mono norĩ wada'uri'wa, 're hâimana mono wa.