Apocalipsi
Zuwãhã ma, 'Re ihâimana u'âsi mono te te i'aromhâi'rézé
1
à hã ibaihâ na rob'ui'éré te ãma tihâimana za'ra, marĩ Zezu Cristu hã te te i'ahâi'rézé. 'Re ihâimana u'âsi mono hã ma tô tãma ahâi'ré, tãma iromhuri'wa norĩ ma, te te aihâi'ré da, marĩ za 're ihâimana za'ra mono zém na hã. Cristu hã ma tô satõ tite hâiwa hawi romhuri'wa hã, taha ãma, ite romhuri'wa Zuwã hã marĩ te te awaihu'u mono da. 2 Zuwã hã uburé marĩ sõtõ 'rowim ne te te i'ab'madâ'â mono hã ma tô awasu'u. Ta hã te ãme tihâimana za'ra 'Re ihâimana u'âsi mono nhimiroti wasu'u hã, duré tô sena isimiroti Zezu Cristu te te ihâi'rézé hã. 3 Tawamhã ni'wa hã ã hã ibaihâ te te 're sõré mono wamhã, tãma 're rowẽ uptabi mono di za. Duré ni'wam norĩ ma, tãma 're rowẽ uptabi za'ra mono di za, ã hã rowasu'u marĩ 're hâimana za'ra mono wana ré, marĩ waihu'uzém na rob'ui'éré hã. Duré ã hã ibaihâ na rob'ui'éré te te 're i'madâ'â pese za'ra mono norĩ ma hã, tãma 're rowẽ uptabi za'ra mono di za. E marĩ wa. Ro'rutu wa oto bâdâ iwa iwaptã'ãzéb da hã, uburé marĩ iwairébé mono zéb da hã.Azia 'remhã 7 na isazei'wa norĩ wa'õtõ na, siré 're isi'rã'õtõ mono norĩ ma rob'ui'éré
4 Wa hã Zuwã, wa ãma rob'ui'éré Azia na danhipti'a nho'õmo nhisi ãma, Wanhib'apito zazei'wa norĩ asiré 're i'ai'rã'õtõ aba mono norĩ ma, 7 na daza'rui mono bâ 're i'ai'rã'õtõ aba mono norĩ ma.
'Re ihâimana u'âsi mono nhimizawizé duré ite rowẽ u'â hã te te aima isõmri za'ra wa'aba da si, õne u'â 're ihâimana mono te hã, duré duréi uptabi marĩ õ uptabi ré 're ihâimana mono te hã, duré niwa za we imorĩ te hã, duré 7 na ihâiba'õ norĩa te hã, 'Re ihâimana u'âsi mono te, Apito simasisizém nho're 're ihâimana za'ra mono te hã. 5 Duré Zezu Cristuhu zama te te 're i'aipawaptob u'âsi za'ra wa'aba mono da si iwẽ hã, tô sena 'Re ihâimana u'âsi mono wasu'u'wa i'umnha hã! Ta hã imorĩ'rata uptabi na apâ te te ihâiwa'udu. Ta hã te pire uptabi na te te 're da'a'madâ'â, daro mono bâ apito norĩ, 're ihâimana za'ra mono norĩ nhipai u.
Taha ma wazawi uptabi za'ra di. Duré wedepo'o nhonhi'rãmi na tidâ'âzém na ma tô wawasété hawi wa'anho'reptu. 6 Te duré te te wama 're ab'manharĩ, sasedoti ne 're wahâimana za'ra mono da, Imama 'Re ihâimana u'âsi mono ma, da'ãma romhuri'wa na. Tahawa, Zezu Cristu hã wẽ uptabi wa, duré waihu'u pese uptabi wa, wa za ãma 're wawata u'âsi za'ra, õne u'âsi! Tane tô!
7 Ma'ãpé, asiwi 'madâ'â aba! Cristu hã te za wei mo, hâiwa'a na! Tawamhã uburé te za dasiwi 'madâ'â ni za. I'a're wi te te siwi iwa'ré norĩ zama te za siwi 'madâ za. Tawamhã uburé dawamri mono bâ te za ta'ru'ru ni za, da te dasiwi 'madâ'â wa, i'u'âbâ. Tô sena te za tô ãne hã tiromhâiba!
8 Uburé Danhib'apito 'Re ihâimana u'âsi mono te ãne siwasu'u: “Wa hã Romna'rada, wa 're ĩhâimana, duré Rob'rãsudu. Õne u'â, wa 're ĩhâimana, duré duréi uptabi marĩ õ uptabi ré, duré niwa za we ĩmorĩ da hã.”
Zuwã hã, Cristu te te isabuzé sõtõ 'rowim ne
9 Wa hã Zuwã, asisãnawã za'ra wa'wa. Duré Cristuhu ãma 're ĩhâimana mono wa, asiré robzépata'wa na wa ĩnhimi'ẽ na 're ĩhâimana, duré 'Re ihâimana u'âsi mono nhimi'madâ'âzéb 're, 're ĩhâimana mono wa. 'Re ihâimana u'âsi mono nhimiroti, Wanhib'apito Zezusi te te ĩma ihâi'ré hã te dama 're wasu'u mono wa, ma tô Patimu na rob'ré za'iti nhisi u dasiwi ĩnharĩ ni. 10 Tawamhã tame ĩhâimana ré, Wanhib'apito te bâtâ na ma tô 'Re ihâimana u'âsi mono Pẽ'ẽzani hã ĩ'â, te te ĩma aromhâi'ré da. Tahawa wa tô wapa ĩbabarãi hawi damreme isiptete uptabi hã, danhimnhihârâzém hârâ 'rãihâ ne damreme hã. 11 Ta hã ma tô ãne ĩma tinha:
— Ma'ãpé, ãma rob'ui'éré ibaihâ nhinha na, marĩ i'a'madâ'â na. Taha parimhã sõmri za, 7 na 'ri nho'õmo mono bâ isazei'wa norĩ 're isi'rã'õtõ mono zéb u, ãne isisi norĩ u: Éfézu, duré Esmina, duré Pergamu, duré Tiatira, duré Sadési, duré Filadéufia, duré Laudiséa u.
12 Tawamhã wa tô itẽme aipi'ra, te 'madâ'â da, ni'wa hã te te ĩma nharĩ zô. Ĩsipi'rai wamhã, wa tô 'madâ'â za'ra, rob'uiwẽzé sima'warazé 7 na ihâiba za'ra hã duré isisiwimhã iro'o ré hã ẽtẽ waipo pré oru 'manharĩ hã. 13 Iwa'wab za'ra te ni'wa hã za, aibâ ne hã, i'uza hã ihâpa ipara u, duré oru 'manharĩ na sõ'utu wapre ré. 14 Duré iséré hã rã uptabi di, abazi irã uptabi ne, duré hâiwa'a ne. Duré ito hã, unhama ro'o ne waipo uptabi di. 15 Ipara hã si'ubuzi zahuré di, ẽtẽ topsada brõzi unhama wa'ro uptabi na, da te i'uwa ne. Duré imreme hã, â'a'a 'rãihâ ruru'u ne. 16 Tinhib'rata nhimire niwĩmhã 7 na wasi hã te tété za'ra. Duré sib'ézé 'wapa hã isadai'ré hawimhã, te da'o, i'wa si'uiwa na i'wa hã. Duré i'ubu hã te rowa'a, bâdâ abzuma wa'wa te te 're irob'uiwẽ mono ne.
17 Tawamhã ta hã te 'madâ'â wamhã, wa ipapara waptãrã, ĩdâ'â ne. Tane nherẽ, tinhib'rata nhimire niwĩ ma tô tinhib'rada hã ĩ'ãma tihi. Ãne te ĩma tinha:
— Aipahi tõ. Wa hã Romna'rada duré Rob'rãsudu. 18 Wa hã 're ĩhâimana u'âsi mono. Wa tô aré dârâ. Tane nherẽ, wa za oto 're ĩhâimana u'âsi, õne u'âsi. Ĩnhimiroti pire uptabi di dadâ'âzé ma hã, duré adâ 're ihâimana za'ra mono zé ma hã. 19 Tahawa, ma'ãpé ãma rob'ui'éré, ãhã na marĩ za i'a'madâ'âzém na hã, duré marĩ oto iwairébé mono na hã duré niwa za iwairébé mono na zama. 20 Ĩnhib'rata nhimire niwĩ, wasi 7 na te itété za'ra i'madâ'â za'ra hã, duré 7 na rob'uiwẽzéb zama, ã hã te wasu'u zara: 7 na wasi norĩ hã te wasu'u za'ra, 7 na hâiwa hawi romhuri'wa norĩ, isazei'wa norĩ wa'õtõ na 're isi'rã'õtõ mono, daro mono bâ te te 're i'madâ'â za'ra mono norĩ. Duré 7 na rob'uiwẽzé hã te wasu'u za'ra, 7 na isazei'wa norĩ wa'õtõ na daro mono bâ 're isi'rã'õtõ mono norĩ.