“Ã hã roti, tinhib'rata nhimire niwĩ, wasi 7 na te te itété za'ra mreme duré 7 na rob'uiwẽzé ẽtẽ waipo pré oru 'manharĩ wa'wa 're imorĩ nhimiroti. 2 Éfézu ãma isazei'wa norĩ, ĩma waihu'u pese di, marĩ 're i'manharĩ za'ra wa'aba mono zé hã. Ĩma waihu'u pese di, 're iromhuri pese za'ra wa'aba mono zé hã, duré asimi'ẽ na robzépada 're i'wapéi hâ za'ra wa'aba mono zé hã. Ĩma waihu'u pese di, dawasété na 're idanomro mono, 're i'wapéi waihu'u za'ra wa'aba mono õ na hã, duré Ĩzadawa wasu'u'wa na 're isiwasu'u za'ra mono norĩ ipibu za'ra wa'aba na hã, sena zô. Tane nherẽ, senai õ di, Ĩzadawa wasu'u'wa na 're isiwasu'u za'ra mono zé hã. Ãne zarina ma tô i'upsibi me za'ra wa'wa, ta norĩ isadawa nhipese na hã. 3 Asimi'ẽ na ma tô 're i'wapé za'ra wa'aba mo, ropire hã. Duré ĩ'u'âbâ ma tô 're irobzépata za'ra wa'aba mo, aiwi 're robzei'õ za'ra wa'aba mono ãna. 4 Tane nherẽ, misi marĩ hã te ĩwi asada tihâimana za'ra wa'wa: Duréihã 're ĩzaze na'rata za'ra wa'aba mono zém hawimhã, asiwi ĩzawi pese aba nherẽ, oto asiwi ĩzawi aba õ di, duréi ne hã. 5 Ma'ãpé ãma aipo're pu'u za'ra wa'aba, asiwi 're ĩzawi pese aba mono nherẽ, te te aiwi sina irosapari pese za'ra wa'aba zém na hã! Ma'ãpé aiwasété na asisãmri za'ra wa'aba wa, asi'ruiwapari za'ra wa'aba, 'Re ihâimana u'âsi mono ma asiwẽ'õ za'ra wa'aba da. Duré marĩ iwẽ 're i'manharĩ za'ra wa'aba mono zé hã apâ 're 'manharĩ za'ra wa'aba mono, 're isaze na'rata za'ra wa'aba mono zém hawi 're i'manharĩ za'ra wa'aba mono zé hã. Aiwasété na asisãmri za'ra wa'aba õ wamhã, wa za ãma atẽme ĩmorĩ za'ra wa'wa, ate za'ra wa'wa rob'uiwẽzé hã te aiwi wazere za'ra wa'aba da, isabzém nhiti. 6 Tane nherẽ, misi marĩ ĩma iwẽ hã te 're i'manharĩ za'ra wa'aba mo, ãne: Nicolaita norĩ te te 're i'manharĩ za'ra mono zé hã, te asiwi 're iwẽ'õ za'ra wa'aba mo, te 're iwẽ'õ mono ne.

7 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã. Uburé marĩ iwasété na ai'uté'wai ma, ĩwi sipi'rai ãna tidâ'âzéb u 're hâimana mono wamhã, taha ma, wa za pisutu, dahâimanazém nhomri'wa na rowede nhisi 'rã hã te te 're a'masi mono da, Ĩmama te rowẽ u'âsi ãma 're isa mono hã.”

8 — Esmina ãma isazei'wa norĩ 'madâ'â'wa hâiwa hawi romhuri'wai ma, te za irob'ui'é, ãne:

“Ã hã romna'rata hawi marĩ õ uptabi ré duré rob'rãsutu ãma za 're ihâimana u'âsi mono nhimiroti, dâ'â nherẽ, apâ ihâiwa'udu oto 're hâimana u'âsi mono da. 9 Ĩma waihu'u pese di, 're irobzépata za'ra wa'aba mono na hã. Duré ĩma aiwaihu'u pese za'ra wa'aba di, i'asibrob'õ za'ra wa'aba na hã. Tane nherẽ, asibro pese za'ra wa'aba di tô. Ĩma waihu'u pese za'ra di, ni'wam norĩ sadawa nhipese na Zudeu na Zudeu õ nherẽ, 're isiwasu'u za'ra mono norĩ te te ai'ãma 're iwasété za'ra wa'aba mono na hã. Ta norĩ hã te upsãtã na 're hâimana za'ra, Satanasihi te na. 10 Tãma aipahi za'ra wa'aba tõ, marĩ za 're isépata za'ra wa'aba mono ma hã. Ĩwapari pese za'ra wa'aba! Wa'uburé hã te za ai'manheme 'wa, dazazéb 're te te aipibu za'ra wa'aba da, duré robzépata za'ra wa'aba da, 10 na bâdâ za isi'utõrĩ 'remhã. Ma'ãpé sena na ĩ'ãma 're aihâimana za'ra wa'aba mono za, tô ai'utõrĩ aba da nherẽ. Tawamhã uburé marĩ iwasété na ai'uté za'ra wa'aba wamhã, wa za aima sõmri za'ra wa'wa, marĩ iwasété na i'ai'uté za'ra wa'aba wa'â, dahâimanazé isi'utõrĩ'õ hã.

11 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã. Uburé marĩ iwasété na ai'uté'wai ma, ĩwi sipi'rai ãna tidâ'âzéb u 're hâimana mono wamhã, ta hã te te sépata õ di za, maparane ãma dadâ'âzé hã.”

12 — Pergamu ãma isazei'wa norĩ 'madâ'â'wa hâiwa hawi romhuri'wai ma, te za irob'ui'é, ãne:

“Ã hã sib'ézé 'wapa i'wa si'uiwa na i'wa pese uptabi tãma ihâimana nhimiroti. 13 Ĩma waihu'u pese di, Satanasi 're isãmra mono zéb ãma 're i'ai'ubumroi wa'aba mono na hã. A norĩ wa'wa hã, sena na te ĩ'ãma 're aihâimana za'ra wa'aba mo. Duré asiwi rẽme aba õ di, asina 're ĩ'umnhasi za'ra wa'aba mono zé hã, Ãtipa hã sipai ãna ĩ'ãma 're imorĩ, tame Pergamu ãma da te wĩrĩ nherẽ, Satanasi 're isãmra mono zéb ãma. 14 Tane nherẽ, misi marĩ hã te ĩwi asada tihâimana za'ra wa'wa: Ai'reb za'ra wa'aba hã ni'wam norĩ te te ãma 're sasõmri za'ra, Balaãu nhimiroti na. Ta hã Balaquihi ma, ma tô hâi'ré, niha Izaraéu nhihudu norĩ 're iwasété za'ra mono zéb da, te te 're i'manharĩ mono zéb da hã. Ma tô tãma waihu'u, Izaraéu nhihudu norĩ hã te te 're huri mono da, dasa 'Re ihâimana u'âsi mono upana romhâiba 'manharĩ ma, da te 're izata za'ra mono, duré danhiséb ãna dasina dahâimana zama te te 're 'manharĩ za'ra mono da. 15 Ãne te duré ai'reb za'ra wa'aba hã, ni'wam norĩ tihâimana za'ra, Nicolaita norĩ nhimiroti na te te ãma 're isasõmri za'ra mono hã. 16 Tahawa, ma'ãpé aiwasété na asisãmri za'ra wa'aba wa, 'Re ihâimana u'âsi mono u aipizari za'ra wa'aba! Asisãmri za'ra wa'aba õ wamhã, wa za ãma mo tamomo. Tawamhã sib'ézé 'wapa ĩzadawa hawi isa'o na, wa za ta norĩ hã ãma 'wapé za'ra.

17 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã. Uburé marĩ iwasété na ai'uté'wai ma, ĩwi sipi'rai ãna tidâ'âzéb u 're hâimana mono wamhã, taha ma, wa za te tãma 're anhomri, dasa mana na isisi sõ'awi 're ihâimana mono õ hã. Tawamhã wa za duré tãma tisõ, ẽne irã hã taha na isisi ité tãma 're ihâimana mono ni'wa te te iwaihu'u õ hã, tô za te te i'âri ma si iwaihu'u pe hã.”

18 — Tiatira ãma isazei'wa norĩ 'madâ'â'wa hâiwa hawi romhuri'wai ma, te za irob'ui'é, ãne:

“Ã hã 'Re ihâimana u'âsi mono 'ra nhimiroti, ito hã unhama ne te te irob'uiwẽ zahuré nhimiroti duré ipara hã ẽtẽ topsada brõzi ne isi'ubuzi zahuré nhimiroti.” 19 Ĩma waihu'u pese di, marĩ i'manharĩ za'ra wa'wa hã. Ĩma waihu'u pese di, asimizawizé aima ihâimana za'ra wa'aba na hã, duré asina 're ĩ'umnhasi za'ra wa'aba mono na hã, duré 're iromhuri za'ra wa'aba mono na hã, duré asimi'ẽ na robzépada 're i'wapéi hâ za'ra wa'aba mono na hã. Duré ĩma waihu'u pese di, ãhã na marĩ hã ahâ na i'manharĩ za'ra wa'aba na hã, duréi 're i'manharĩ za'ra wa'aba mono nhipai u. 20 Tane nherẽ, misi marĩ hã te ĩma asada tihâimana za'ra wa'wa: Zezabéu wi 're sawi za'ra wa'aba mono õ di, marĩ i'upa na te te 're 'manharĩ mono nherẽ. Ta hã te 're siwasu'u, 'Re ihâimana u'âsi mono zadawa 'mahârâ'wa na. Ta hã te ĩma romhuri'wa norĩ hã te te 're a'mapãrĩ, bâdâdi iwasété u. Te te tãma 're rowahutu za'ra, dahâimana nhiséb õ na dahâimana hã te te 're 'manharĩ za'ra mono da, duré romhâiba 'manharĩ ma dasa ãma 're idanhoprub za'ra mono hã te te 're huri mono da. 21 Ta hã pi'õi ma, wa tô bâdâ hã tãma tisõ, tiwasédé te te rẽme da hã. Tane nherẽ, te te sima wẽ õ di, tihâimana nhiséb'õ te te irẽme da hã. 22 Tahawa, wa za tãma 'manha, waptâ wa nomro da, hâzé wa. Tawamhã tame te za robzépata za'ẽtẽ za, duré isiré tihâimana nhiséb'õ te te 're i'manharĩ za'ra mono norĩ zama. Sa'ẽtẽ na te za robzépata pipa za'ra. Ãne hã ãhã na wa za oto 'manha, tiwasété na isiré marĩ iwasédé te te 're i'manharĩ za'ra mono na sisãmri za'ra õ wamhã. 23 Isirã zarina 're inomro mono norĩ hã wa za simro. Tawamhã uburé isazei'wa norĩ, siré 're isi'rã'õtõ mono hã te za ĩwaihu'u za'ra za, wa hã danhimirosa'rada ĩma iwaihu'u pese na hã, duré uburé marĩ, da te dasima 're iwẽ za'ra mono zéb zama. Wa hã wa za aima wa'âbâ za'ra wa'wa aihâiba mono bâ, marĩ 're i'manharĩ za'ra wa'aba mono zéb zarina.

24 “Tane nherẽ, Tiatira ãma 're i'ai'ubumroi wa'aba mono norĩ hã, uburé ãma sasõmri za'ra wa'aba õ di, ã hã roti iwasété na dasisanho na hã. A norĩ wa'wa hã dame waihu'u za'ra wa'aba õ di, ni'wam norĩ te te 're iwamri za'ra mono hã, sõ'awi 're ihâimana mono õ, Satanasi nhimiroti hã. Tô sena wa za ãne aima waihu'u za'ra wa'wa: Niwa marĩ ipire hã te aima isa'ra wa'aba da hã, mare uptabi di. 25 Tane nherẽ, ma'ãpé asima 'madâ'â pese za'ra wa'aba, aima ihâimana za'ra wa'wa hã apâ we ĩmorĩzéb u.

26 “Ni'wa hã uburé marĩ iwasété na ai'uté'wai ma, duré rob'rãsutu u te ĩsima iwẽzé te te 're i'ab'manharĩ mono ma, wa za tãma tisõ, simiroti pire na 're hâimana mono da, uburé dapoto mono bâ 're idahâimana za'ra mono norĩ ma. 27 Tawamhã ta hã te za te te 're roti, wedewaré si'uwazi ré^a. Te za duré te te 're da'awati pese, zé'a 'manharĩ na piza hã da te 're ipru pese za'ra mono ne. 28 Isimiroti pire, wa za tãma tisõ, Ĩmama hawi te i'âri ne hã. Tawamhã wa za duré tãma tisõ, awẽ u wasi wawẽ te te 're irob'uiwẽ mono hã.

29 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã.”