'Re idanomro mono zé, 'Re ihâimana u'âsi mono te te sima 're iwẽ mono zéb zarina
4
Tahawa, Cristu hã tihâiba na te te irobzépata ne, te za 're asisa'ra wẽ za'ra wa'aba mo, te te irosa'rata ne, rosa'rata za'ra wa'aba da, za isine 're irobzépata za'ra wa'aba mono na hã. E marĩ wa. Ni'wa hã tihâiba na te te robzépata wamhã, tiwasédé hã te za oto rẽme pese. 2 Tahawa, ã hawimhã oto ti'ai ãma aihâimanazé, 're i'rãsutu za'ra wa'aba mono zéb u, 'Re ihâimana u'âsi mono te te sima 're iwẽ mono zéb zarina si, 're aihâimana za'ra wa'aba mono. Mare di, 'râwi marĩ iwasédé, da te dasima 're iwẽ za'ra mono zéb zarina si hã. 3 Duréihã ma tô ai'ãma tironomro hâ za'ra wa'wa, 'Re ihâimana u'âsi mono zazei'õ'wa norĩ te te 're i'manharĩ za'ra mono ne, 're i'manharĩ za'ra wa'aba mono zém na hã. Taha bâtâ mono na hã ma tô aré siwa'ru 're aihâimana za'ra wa'aba mo, dasina dahâimana wasété na duré 'râwi marĩ iwasété si, da te dasima 're iwẽ za'ra mono zém na, duré âzé na dasi'rãiwamnarĩ na duré dato iwẽ'õ na duré siwa'ru marĩ na da te dasima 're rowẽ za'ra mono da, 're idasi'rã'õtõ mono zém na duré ihâiba'õ na dawata na iwasété uptabi na zama. 4 Tahawa, ãhã na hã 'Re ihâimana u'âsi mono zazei'õ'wa norĩ hã te te oto aimawi 're ai'madâ'â za'ra wa'wa, isiré oto 're aihâimana za'ra wa'aba mono õ wa, dahâimanazé iwasété na duré siwa'ru dasima iwẽ na dahâimana na zama. Tahawa, te ta norĩ hã te te ai'ãma 're wasété za'ra wa'wa. 5 Tazahã, ta norĩ hã niwapsi te za tihâimanazém na siwasu'u za'ra, te te da'ãma 're arowairébé mono da, 're isimipari mono ma, ihâiba ré norĩ ãma duré idâ'â norĩ ãma zama. 6 Tahawa, Rowasu'uwẽ hã ma tô wapari za'ra, idâ'â norĩ zama. Ta norĩ hã 'Re ihâimana u'âsi mono te te da'ãma 're i'arowairébézé mono u'âbâ ma tô tidâ'â za'ra, uburé pese a'uwẽ norĩ 're idâ'â za'ra mono ne. Rowasu'u wẽ ité hã ma tô wapari za'ra duré õ norĩ zama 're hâimana za'ra mono da tihâiba uptabi na, 'Re ihâimana u'âsi mono te te sima 're iwẽ mono zéb zarina.'Re 'madâ'â pese za'ra wa'aba mono, 'Re ihâimana u'âsi mono nhoprubzé iwẽ uptabi hã
7 Uburé iropsi'utõrĩzéb u hã, romhuture di oto. Tahawa, ma'ãpé ãma 're pibui pese za'ra wa'aba mono, marĩ na ãma 're upa za'ra wa'aba mono tõ da. Duré asimiza'rese 're aihâimana za'ra wa'aba mono, 're rowaptẽrẽ u'âsi za'ra wa'aba mono da. 8 Uburé marĩ nhipai u, ma'ãpé 're asisawi pese za'ra wa'aba mono. E marĩ wa. Dasisawizé hã te za dawasédé hã te te 're a'upsibi, ahâ uptabi nherẽ. 9 Asõrõwa u 're asiwaibui wẽ wa'aba mono, aiwapsari aba ãna. 10 Asima 're romhuri wẽ za'ra wa'aba mono, romhuri mono bâ 'Re ihâimana u'âsi mono tinhoprubzé iwẽ uptabi hã sipu'u pese na te te aima isõmri za'ra wa'aba zém na. Tô 'Re ihâimana u'âsi mono nhoprubzé iwẽ uptabi na asima 're i'aihâimana za'ra wa'aba mono da si, iwẽ hã. 11 Rowahutu'wai wamhã, 'Re ihâimana u'âsi mono nhimiroti na si 're rowahutu za'ra wa'aba mono. Dapawapto'wai wamhã, 'Re ihâimana u'âsi mono asiptede te te aima 're isõmri za'ra wa'aba mono zéb zarina si, dama 're romhuri za'ra wa'aba mono. Ãne uburé marĩ hã 're 'manharĩ za'ra wa'aba mono, 'Re ihâimana u'âsi mono ãma si 're dawata za'ra mono da, Wanhib'apito Zezu Cristuhu nhimipawaptobzéb zarina. 'Re ihâimana u'âsi mono hã wẽ uptabi wa, duré waihu'u pese uptabi wa, wa za ãma 're wawata u'âsi za'ra.
Wanhib'apito zazei'wai wa, wa te 're irobzépata za'ra mono zé
12 Ĩsisãnawã norĩ, ĩma i'asawi pese za'ra wa'aba norĩ hã, 're a'rãmi za'ra wa'aba mono tõ, aipibuzé ipire asada 're iwairébé aba mono ma hã, 're sépata za'ra wa'aba mono da, marĩ isa'rese'õ aimawi hã asada 're hâimana za'ra wa'aba mono newa. 13 Tane nherẽ, ãma asima 're rowẽ za'ra wa'aba mono, Cristu te te irobzépata ne, 're robzépata za'ra wa'aba mono wamhã, ta hã niwa apâ wei morĩ wamhã, tite rowa'a za'ẽne, 'Re ihâimana u'âsi mono za te te dama ihâi'rézéb ãma hã, aima rowẽ uptabi za'ra wa'aba da. 14 Cristuhu zazei'wa 're anomro wa'aba mono 'ru te, da te ai'ãma 're wasété za'ra wa'aba mono wamhã, aima 're rowẽ uptabi za'ra wa'aba mono di za. E marĩ wa. 'Re ihâimana u'âsi mono Pẽ'ẽzani Iwẽ uptabi hã, aiwa 're hâimana za'ra wa'aba mono wa. 15 Tane nherẽ, a norĩ wa'wa 're i'aihâimana za'ra wa'aba mono 'remhã, ni'wa hã te te robzépata wamhã, mare di te te da'maiwĩrĩ wa, mare di simisaihuri wa, mare di duré dama rob'manharĩ wasété'wai wa, niwamhã duré mare di, titei õ nherẽ, dahâimanazéb u dawi 're zasi mono wa. 16 Tazahã, ni'wa hã isazei'wai wa, te te 're robzépata mono wamhã, 're sisé mono tõ. 'Re ihâimana u'âsi mono ãma si 're wata mono, isisi u'âbâ, 're hâimana mono wa.
17 Bâdâ hã ma tô oto iwa waptãrã, dahâimanazéb zarina da'ãma rowairébézéb da hã. Ta hã, 'Re ihâimana u'âsi mono nhib'a'uwẽ, 're ihâimana za'ra mono norĩ hawi te za tinhana'rata. Wahawib za'ra sãna'rata da wamhã, e niha za tawamhã, ihâimana 'rãsutu za'ra zé hã, 'Re ihâimana u'âsi mono nhimiroti te te 're i'madâ'â pese za'ra mono õ norĩ hã.
18 Ibaihâ Iwazé pese na rob'ui'éré inomro hã, ãne:
“Ropire hã tãma 're hâimana za'ra mono nherẽ, te za iwẽ norĩ hã, tinho'reptuzé hã te te sina 're uwaimrami za'ra. E niha te za bété iwasété norĩ ma hã tiromhâimana za'ra, tiwasété si te te 're i'manharĩ za'ra mono norĩ ma hã.”
19 Tahawa 'Re ihâimana u'âsi mono te te sima 're iwẽ mono zéb zarina te te 're irobzépata za'ra mono hã, te za tô tipẽ'ẽzani na te te sina 're umnhasi za'ra, marĩ iwẽ te te 're 'manharĩ za'ra mono ré hã. 'Re ihâimana u'âsi mono hã Ro'apoto mono 'wa. Ta hã wa za wa te wasina 're umnhasi za'ra.