'Re ihâimana u'âsi mono nhib'a'uwẽ norĩ ma roti
5
Wa hã isazei'wa norĩ 'madâ'â'wa, ãhã na hã wa za aima roti za'ra wa'wa, da'madâ'â'wa norĩ isazei'wa norĩ wazari 're i'aihâimana za'ra wa'aba mono norĩ ma hã. Wa hã wa tô 'madâ, Cristu te te irobzépatazé hã. Wa za duré isiré ĩhâiba, tite rowa'a za'ẽne, 'Re ihâimana u'âsi mono za te te dama ihâi'rézéb ãma hã. 2 'Re ihâimana u'âsi mono nhib'a'uwẽ norĩ te te aima isõmri za'ra wa'wa hã, ma'ãpé 're 'madâ'â pese za'ra wa'aba mono. Mare di, aiwada'uri zahi zarina hã, tazahã ato sina, 'Re ihâimana u'âsi mono te te sima 're iwẽ mono zéb zarina si. Mare di duré, rob'uiprazé ãma 're isõpẽtẽ za'ra wa'aba mono da hã. Tazahã tô sena asima 're iwẽ za'ra wa'aba mono zéb zarina si, te za 're i'manharĩ za'ra wa'aba mo, romhuri hã. 3 'Re 'madâ'â za'ra wa'aba mono da, da te aima ipisutu za'ra wa'wa hã, asima sô 're asõpré wa'aba mono tõ, tãma rob'rui'wa na 're aihâimana za'ra wa'aba mono da hã. Tazahã, uburé marĩ iwẽ na isisanho'wa na si 're aihâimana za'ra wa'aba mono, isazei'wa norĩ ma hã. 4 Ãne wamhã, Pone'ẽrebâ 'Madâ'â'wa uburé danhipai u 're Ihâimana mono hã niwa apâ wei morĩ wamhã, te za aima sõmri za'ra wa'wa danhoprezé iwẽ uptabi hã, niwa isi'ubuzi tiwi isi'utõrĩ waihu'u õ hã.5 Duré a norĩ wa'wa ipréduptém norĩ, ihâiba prédum norĩ hã 're wapari pese za'ra wa'aba mono. Asi'madâ'â pire na asiwi 're aihâimana za'ra wa'aba mono tõ. E marĩ wa. Ibaihâ Iwazé pese na rob'ui'éré nomro wa, ãne:
“'Re ihâimana u'âsi mono hã te 're sima'wara, 're isi'madâ'â ze za'ra mono norĩ zada hã. Tazahã, pire na 're isi'madâ'â za'ra mono õ norĩ ma si, te iwẽ hã te te tãma 're apisutu.”
6 Tahawa, aiwapu na 're asi'madâ'â za'ra wa'aba mono, 'Re ihâimana u'âsi mono nhib'rada waihu'u pese uptabi na 're ihâimana mono zahâpâmhã, bâdâ i'uwaibaba na te te ai'ãma 're ahâimo wa'aba mono da. 7 Uburé marĩ na 're i'aihâtâ'â za'ra wa'aba mono zé hã, 'Re ihâimana u'âsi mono ma, 're sõmri za'ra wa'aba mono, ta hã te te 're ai'a'madâ'â u'âsi aba mono wa.
8 Ma'ãpé, asimiza'rese 're aihâimana za'ra wa'aba mono. Duré asi'wawi 're rob'madâ'â pese za'ra wa'aba mono. E marĩ wa. Asitob'ru za'ra wa'wa Wa'uburé hã, te we 're ne, hu'u zéré pa hã sahi wa, wairõ sina 're imorĩ ne, tisa zô, te te da'mai'âri da. 9 Tahawa, Wanhib'apito umnhasi sina asiptete na 're aihâimana za'ra wa'aba mono, Wa'uburé wi. E marĩ wa. Ãne hã ropâ asiré isazei'wa norĩ hã asine za'ra wa'aba te te 're irobzépata za'ra mono na hã aima waihu'u pese za'ra wa'aba wa. 10 Te za tô suru na 're irobzépata za'ra wa'aba mo. Taha parimhã, 'Re ihâimana u'âsi mono hã te za asõré wa'wa, asiptete na. Te za aipawaptob za'ra wa'wa. Te za duré 'manha, asiptete na aihâimana za'ra wa'aba da hã. Õ hã te 're hâimana, uburé marĩ iwẽ nhana'rata na. Ma tô duré asô tihârâ za'ra wa'wa, rowẽ isi'utõrĩ'õ ãma 're aihâimana za'ra wa'aba mono da, Cristuhu ãma. 11 Õhõ ãma si te iwaihu'u pese uptabi hã 're hâimana, õne u'â. Tane tô.
Pedru hã te te irob'ui'éré 'rãsutu zé
12 Ã hã wa aima rob'ui'éré za'ra wa'wa rob'ui'éré hã suru na. Silas hã ma tô ĩ'ãma aime. Ta hã ĩma hã ĩsisãnawã, ĩma i'umnha. Wa aima rob'ui'éré za'ra wa'wa, te ãma aipawaptob za'ra wa'aba da, duré te aima wasu'u za'ra wa'aba da, iwẽ hã iwaibui wa'wa hã, tô sena 'Re ihâimana u'âsi mono nhimizawizé. Tahawa, ma'ãpé asiptete sina ãma 're aihâimana za'ra wa'aba mono, 'Re ihâimana u'âsi mono nhimizawizém na hã.
13 Wanhib'apito zazei'wa norĩ Babilonia ãma 're isi'ubumroi mono, 'Re ihâimana u'âsi mono te te sima ipisutu za'ra norĩ hã te duré ãma asawi za'ra wa'wa. Duré ĩ'ra ne ĩma 're ihâimana mono Marcus hã te ãma asawi za'ra wa'wa. 14 Ma'ãpé, tame asiré isazei'wa norĩ hã asõ'utu asisawi za'ra wa'aba, atob'rata hârâ na, asiré isazei'wa 're aihâimana za'ra wa'aba mono wa.
Rowẽ hã asiré 're ihâimana za'ra wa'aba mono da si, iwẽ hã, Cristuhu ãma 're i'aihâimana za'ra wa'aba mono norĩ hã.