Imro ré norĩ hâimanazé
3
1-2 Tane duré pi'õ imro ré norĩ, asimi'ẽ na aimro hã 're 'wapé ze za'ra wa'aba mono, 'Re ihâimana u'âsi mono nhimiroti hã te te 're 'madâ'â pese za'ra mono õ wamhã, aihâimanazém na 're ãwisi za'ra wa'aba mono da iwẽ u, tãma 're nharĩ za'ra wa'aba mono ãna. Te za 're i'ãwisi za'ra wa'aba mo, aihâimanazé, i'uwaibaba na 're i'aihâimana za'ra wa'aba mono zé, te te 're i'madâ'â za'ra mono zéb zarina, duré asimiwazé pese na 're i'aihâimana za'ra wa'aba mono zém na. 3 Aiwẽ na 're i'aihâimana za'ra wa'aba mono zé hã, aima 're hâimana za'ra wa'aba mono tõ, aihâiba mana wawi 're i'asib'manharĩ wẽ za'ra wa'aba mono zéb zarina, aséré tété aba na, duré oru na asõ'rebzu na, aipo're za'ru na, asipsisi na niwamhã duré ai'uza iwa'âbâ za'ẽtẽ na. 4 Tazahã, aiwẽ na 're i'aihâimana za'ra wa'aba mono zé hã, aipẽ'ẽ 're aima 're hâimana za'ra wa'aba mono. Ta hã si'utõrĩ waihu'u õ di, dawẽ uptabi na 're idahâimana za'ra mono zé hã, dawahâzé na duré dawaimri na dahâimanazé hã. Ta hã 'Re ihâimana u'âsi mono ma hã wẽ uptabi di, marĩ iwa'âbâ za'ẽtẽ uptabi ne. 5 E marĩ wa. Ãne ma tô pi'õ norĩ hã 're si'manharĩ za'ra duréihã. 'Re ihâimana u'âsi mono si ma tô te te 're umnhasi za'ra. Timro hã ma tô te te 're wapari pese za'ra. 6 Sara hã ãne ma tô 're hâimana. Abra'ã hã ma tô te te 're wapari pese. Ma tô duré te te 're 'mahârâ, ãne: “Ĩnhib'apito.” Taha nhihudu na te za tawamhã 're aihâimana za'ra wa'aba mo, iwẽ si 're 'manharĩ za'ra wa'aba mono wamhã, duré marĩ ma 're aipahi za'ra wa'aba mono õ wamhã.7 Tane duré aibâ imro ré norĩ, aimro siré 're i'aihâimana za'ra wa'aba zém na, 're waihu'u za'ra wa'aba mono, pi'õ isib'uware na hã. Tahawa te za 're iwazé pese za'ra wa'aba mo. E marĩ wa. Pi'õ zama te za asu wa'aba te te 're waibu, dahâimanazé 'Re ihâimana u'âsi mono nhoprubzé iwẽ uptabi hã. Ãne 're aihâimana za'ra wa'aba mono, 'Re ihâimana u'âsi mono wi 're irowaptẽrẽ za'ra wa'aba mono zém na marĩ hã te te aiwi 're ro'wa'rutu za'ra wa'aba mono tõ da.
Isazei'wa norĩ hã, marĩ iwẽ te te 're i'manharĩ za'ra mono u'âbâ te te 're irobzépata za'ra mono zé
8 Tawamhã i'rãsutu ãma hã oto, ma'ãpé uburé a norĩ wa'wa hã aiwapsi 're rosa'rata za'ra wa'aba mono. Duré dapẽ'ẽzé zarina da te 're robzépata za'ra mono wamhã, te za dasiré aipẽ hã 're isépata za'ra wa'aba mo, aipẽ'ẽzé sina. 'Re asisawi pese za'ra wa'aba mono. Asi'ãma 're aiba za'ra wa'aba mono. Duré aiwapu na asima 're aihâimana za'ra wa'aba mono. 9 Marĩ iwasédé hã da te aima 're 'manharĩ za'ra wa'aba mono wamhã, asa dama ãma 're wa'rãmi za'ra wa'aba mono tõ, marĩ iwasété na hã. Duré da te ai'ãma 're wasété za'ra wa'aba mono wamhã, asa dama ãma 're wa'rãmi za'ra wa'aba mono tõ, aimreme wasété na. Tazahã, da te ai'ãma 're wasété za'ra wa'aba mono wamhã, iwa'rãmi da'ãma 're rowaptẽrẽ za'ra wa'aba mono, 'Re ihâimana u'âsi mono wi, iwẽ hã te te dama 're apisutu mono da. E marĩ wa. Ãne da, ma tô 'Re ihâimana u'âsi mono hã asô tihârâ za'ra wa'wa, iwẽ hã te te dama 're i'apisutu mono zé hã 're waibui wa'aba mono da. 10 Ãne na, Ibaihâ Iwazé pese na rob'ui'éré, te nomro, ãne:
“Aihâimanazé aima sawi wamhã, duré robzei u'âsi 're aihâimana mono da wamhã, ãma 're pibui pese mono, marĩ iwasété na hã 're nharĩ mono tõ da, duré asada wanhipese tõ da.
11 Marĩ iwasété wi ai'ré na. Marĩ iwẽ si 're ab'manharĩ mono. Rowẽ zô si 're airĩtĩ mono. Rosazâri tõ, sõpẽtẽ õ ré hã.
12 E marĩ wa. Uburé Danhib'apito hã te i'uwaibaba na 're ihâimana za'ra mono norĩ hã te te 're ab'madâ'â pese. Duré isimirowaptẽrẽ za'ra hã te te 're awapari mono da hã, te sô 're simirei u'âsi. Tazahã, marĩ iwasédé te te 're i'manharĩ za'ra mono norĩ da hã, te 're hâimana.”
13 A norĩ wa'wa hã marĩ 're 'manharĩ wẽ u'âsi za'ra wa'aba mono wamhã, e 'wa hã te te bété marĩ aima 're 'manharĩ wasété za'ra wa'aba mono da bâ. 14 Tane nherẽ, marĩ iwẽ 're 'manharĩ za'ra wa'aba mono wa, 're robzépata za'ra wa'aba mono nherẽ, te za 'Re ihâimana u'âsi mono iwẽ hã te te aima 're apisutu 'wa. Tahawa, dama hã 're aipahi za'ra wa'aba mono tõ. Duré asimirosa'rata na 're aihâtâ'â za'ra wa'aba mono tõ. 15 Cristu hã 're iwazé pese za'ra wa'aba mono zé hã, aipẽ'ẽ 'remhã aima 're hâimana za'ra wa'aba mono. Duré Asib'apito na aima 're hâimana za'ra wa'aba mono. 'Re asisa'ra pese u'âsi za'ra wa'aba mono, 're dazada'âbâ za'ra wa'aba mono da, ni'wa hã rob'umnhasi sina 're i'aihâimana za'ra wa'aba mono zém na te te asadanharĩ aba wa, ãma tãma rowasu'u da, rowẽ u za i'aihutu aba zém na hã. 16 Tane nherẽ, ãne hã asimiwazép sina 're 'manharĩ za'ra wa'aba mono, duré dawazép sina. Duré asimirosa'rata 'remhã marĩ iwasédé hã aima 're hâimana za'ra wa'aba mono ãna 're aihâimana u'âsi za'ra wa'aba mono. Ãne wamhã, da te 're aiwasu'u wasété za'ra wa'aba mono wamhã, ni'wam norĩ hã Cristuhu nhirã zarina 're anomro aba mono wa, aihâimanazém na te te 're i'aiwasu'u za'ra wa'aba mono norĩ hã te za ta norĩ hã 're siséb za'ra za. 17 'Re ihâimana u'âsi mono te te sima iwẽzéb zarina wamhã, marĩ iwẽ 're 'manharĩ za'ra wa'aba mono wa, iwẽ hã, 're irobzépata za'ra wa'aba mono da hã, marĩ iwasédé 're 'manharĩ za'ra wa'aba mono wa, 're irobzépata za'ra wa'aba mono zém nhipai u. 18 Cristu hã misi haré ma tô uburé dazada dârâ dawasété wa, 're imorĩ wẽ uptabi hã 're inomro wasété mono norĩ da, te te 're ai'ãwisi za'ra wa'aba mono da, 'Re ihâimana u'âsi mono u. Ihâiba hã ma tô wĩrĩ ni. Tane nherẽ, ma tô Imama hã hâiwa'utu, Ihâiba uptabi na apâ. 19 Taha na, tihâiba uptabi na ma tô mo, wa'uburé norĩ u. Ta norĩ ma, ma tô rowahutu, dazazéb 're, 're idasimasa mono ne, wairébé waihu'u ãna 're isimasa mono norĩ ma hã. 20 Idâ'â norĩ, 'Re ihâimana u'âsi mono te te iwapari za'ra õ norĩ, simi'ẽ na sô simipari za'ra nherẽ, Noé hã uba're isa'ẽne Arca na isisi te te 'manharĩ ré hã. Da'umro na ma tô 'Re ihâimana u'âsi mono hã da'anho'reptu, simisutu hã 8 na dahâiba, uba're wa ihâimana za'ra hã, â te te da'uprosi tõ da, te te ida'anho'reptu hã. 21 Ta hã â, te aré tãma tihâimana za'ra, â dawabzuri ne, ãhã na te te 're i'asõ'reptu za'ra wa'aba mono ne hã. Â dawabzuri wa te 're 'manharĩ za'ra mono wamhã, wahâiba rã na hã wa te ãma 're sani waihu'u za'ra mono õ di. Tane nherẽ, 'Re ihâimana u'âsi mono wi, wa wa te 're waptẽrẽ za'ra, rosa'rata wasété ãna, Zezu Cristu hã apâ ihâiwa'utuzém na. 22 Ta hã hâiwa u ma tô mo. Ãhã na hã 'Re ihâimana u'âsi mono nhimire niwĩ te oto 're sãmra. Tawamhã uburé hâiwa hawi romhuri'wa norĩ hã duré hâiwa ãma dama ipire norĩ hã duré hâiwa ãma waihu'u pese 're ihâimana za'ra mono norĩ hã te isimi'madâ'â 're, 're hâimana za'ra oto.