4 Ma'ãpé, 'râwi itẽme asina rotété pese za'ra wa'aba, Wanhib'apito Zezusihi u. Ta hã Ẽne ihâiba ré nherẽ, ma tô dasiwi wẽ'õ ni, ti'ai ãma 're idahâimana za'ra mono hã. Tane nherẽ, 'Re ihâimana u'âsi mono hã ma tô ta hã pisutu, tãma wẽ uptabi wa, ẽtẽ waipo dama iwa'âbâ za'ẽtẽ uptabi ne. 5 Tane duré a norĩ wa'wa hã, ẽne ihâiba ré ne, te 'Re ihâimana u'âsi mono hã aiwa 'ri za'ra wa'wa, isõrõwa na aipẽ'ẽ 'wa hã tãma 're hâimana za'ra mono da, sasedoti iwẽ uptabi na tãma 're romhuri za'ra wa'aba mono da, aimawi. Ãne wa, Zezu Cristuhu u'âbâ, te za aipẽ'ẽ na tãma 're i'asisõmri za'ra wa'aba mono na tãma 're asõprub za'ra wa'aba mo, 'Re ihâimana u'âsi mono ma, te te 're irowẽ mono zéb zarina. 6 Ãne Ibaihâ Iwazé pese na rob'ui'éré hã, nomro wa:

7 Tahawa, isaze za'ra wa'aba norĩ ma hã, ã hã ẽne hã wa'âbâ za'ẽtẽ uptabi di. Tanei õ di, te te isaze za'ra õ norĩ hã. Ta norĩ hã ma tô sina uwaimrami za'ra, Ibaihâ Iwazé pese na rob'ui'éré inomro hã, ãne: “Ẽne, 'ri'wa norĩ te te siwi iwẽ'õ hã, ta hã danhipai u pire uptabi na te oto 're hâimana.” 8 Duré ihâiba amoi ãma Ibaihâ Iwazé pese na rob'ui'éré inomro hã, ãne:

9 Tanei õ di, a norĩ wa'wa hã. 'Re ihâimana u'âsi mono hã ma tô sima aipisutu siromo za'ra wa'wa, sasedoti na 're aihâimana za'ra wa'aba mono da, aiwẽ uptabi na aimawi tãma 're aihâimana za'ra wa'aba mono da, 'Re ihâimana u'âsi mono nhib'a'uwẽ na si. Ta hã robra hawi rowa'a iwẽ uptabi u te te i'asani za'ra wa'wa hã ma tô sima aipisutu za'ra wa'wa, isimiromhuri iwẽ uptabi hã dama 're 'mahârâ za'ra wa'aba mono da. 10 Duréihã, a norĩ wa'wa hã aré 'Re ihâimana u'âsi mono nhib'a'uwẽ õ di. Tane nherẽ, ãhã na hã te oto isib'a'uwẽ 're anomro aba mo. Duréihã aima waihu'u za'ra wa'aba õ di aré, 'Re ihâimana u'âsi mono da'ãma 're isiba mono zé hã. Tane nherẽ, ãhã na hã ma tô oto asima iwaibui wa'wa.

11 Ĩsiwaihu'u norĩ, ĩma i'asawi pese za'ra wa'aba norĩ, ãma aipo're pu'u za'ra wa'aba, a norĩ wa'wa hã taré ãme dasiré a'uwẽ õ na 're i'aihâimana za'ra wa'aba mono na hã, ti'ai ãma. Tahawa, ma'ãpé marĩ iwasété zô asima 're i'asõpré wa'aba mono zé hã asiwi 're wẽ'õ pese za'ra wa'aba mono. Ta hã te wahâiba uptabi hã te te 're 'wapéi u'âsi za'ra. 12 Duré ma'ãpé isazei'õ'wa norĩ wazari 're aihâimana wẽ za'ra wa'aba mono, niwamhã aiwasédé hã te te ai'ãma 're sa'ra wa'aba mono nherẽ, aihâimana wẽ na 're i'aihâimana za'ra wa'aba mono zé hã te te 're 'madâ'â za'ra mono da, taha na 'Re ihâimana u'âsi mono ãma 're wata za'ra mono da, Cristu hã za apâ we imorĩzé bâtâ ãma hã.

13 Wanhib'apito nhib'a'uwẽ 're anomro aba mono u'âbâ, ma'ãpé, ti'ai ãma dama ipire norĩ hã 're wapari pese za'ra wa'aba mono, Roma te apito hã danhipai u pire uptabi na dama 're ihâimana mono hã ti'ai ãma, 14 duré ti'ai wa'õtõ 're, da'madâ'â'wa norĩ hã, apito nhimipisutu wa, te te 're rob'manharĩ za'ra mono da, marĩ te te 're i'manharĩ wasété za'ra mono norĩ ma hã, te te duré 're wẽsãmri za'ra mono da, marĩ iwẽ te te 're i'manharĩ za'ra mono norĩ hã. 15 E marĩ wa. 'Re ihâimana u'âsi mono ma iwẽ hã, marĩ iwẽ si 're i'manharĩ za'ra wa'aba mono da hã, isimiza'rese'õ norĩ hã 're sadawa nhitob za'ra wa'aba mono da. 16 Aiwasété wi asima iwẽ na romhâ na 're aihâimana za'ra wa'aba mono. Tane nherẽ, asima iwẽ na 're aihâimana za'ra wa'aba mono wẽ te, 're aihâimana za'ra wa'aba mono tõ, marĩ iwasédé 're i'manharĩ za'ra wa'aba mono zé hã 're upsibi za'ra wa'aba mono da. 'Re ihâimana u'âsi mono ma aiwada'uri zarina romhuri'wa na si 're aihâimana za'ra wa'aba mono. 17 'Re dawazé pese za'ra wa'aba mono. Duré asisãnawã norĩ isazei'wa norĩ hã 're sawi pese za'ra wa'aba mono. 'Re ihâimana u'âsi mono si ipipa na 're wazé pese za'ra wa'aba mono. Duré Roma te apito hã 're wazéb za'ra wa'aba mono.

18 A norĩ wa'wa aiwada'uri za'ra atede'wai ma romhuri'wa norĩ, asib'ihâ'a norĩ hã 're wapari pese za'ra wa'aba mono, duré 're wazé pese za'ra wa'aba mono. Mare di, ihâimana wẽ si hã duré isimizawi pese si hã. 19 I'uwaibaba õ nherẽ, da te aima 're irob'manharĩ wasété za'ra wa'aba mono zé hã 're 'wapé za'ra wa'aba mono wamhã, ã hã 'Re ihâimana u'âsi mono te te sima 're iwẽ mono na waihu'u sina, tawamhã ãne u'âbâ te za iwẽ hã te te aima 're apisutu 'wa. 20 Tazahã oto, marĩ iwasédé hã 're 'manharĩ za'ra wa'aba mono wa, da te aima 're irob'manharĩ wasété za'ra wa'aba mono zé hã asimi'ẽ sina 're 'wapé za'ra wa'aba mono nherẽ, e niha te za ai'uzezé hã aima 're hâimana za'ra wa'wa. Tazahã, asimi'ẽ sina marĩ iwẽ 're 'manharĩ za'ra wa'aba mono wa, 're 'wapé za'ra wa'aba mono wamhã, 'Re ihâimana u'âsi mono hã te za iwẽ hã te te aima 're apisutu 'wa, taha u'âbâ. 21 Taha da, ma tô apisutu za'ra wa'wa.

E marĩ wa. Cristu hã ma tô robzépata, asada za'ra wa'aba. Ma tô ãma aima asanho za'ra wa'wa, isirã zarina 're anomro aba mono da. 22 Ta hã marĩ na tiwasédé hã te te 'manharĩ õ di. Duré niwa sadawa nhipese õ di. 23 Da te ãma 're wasété za'ra mono wamhã, asa hã te te da'ãma 're awasété mono õ di. Te te robzépata wamhã, asa hã te te amhâzépa õ di. Tazahã, 'Re ihâimana u'âsi mono nhib'ratap si ma tô sisõ, i'uwaibaba na da'ãma rowairébé'wa nhib'ratap si. 24 Wawasété za'ra hã tihâiba na ma tô tidu, wedepo'o nhonhi'rãmi na, wawasédé hã wama 're dâ'â za'ra mono da, dahâimanazé i'uwaibaba na si oto 're wahâimana za'ra mono da. Tawamhã i'u'azém na, ma tô aipese za'ra wa'wa. 25 Pone'ẽrebâ siwa'ru 're inomro mono ne, te aré 're aihâimana za'ra wa'aba mo. Tane nherẽ, ãhã na hã apâ ma asina isiri za'ra wa'wa, Pone'ẽrebâ 'Madâ'â'wai u, duré Ai'wawi 're isimapa za'ra wa'aba mono 'wai u.