'Re ihâimana u'âsi mono nhimipawaptobzé wa'âbâ ãna duré ite rowẽ hã, isa'ẽtẽ u'âsi mono da si iwẽ hã, aima za'ra wa'aba.

3 'Re ihâimana u'âsi mono ãma si wa za wawata za'ra ni, Wanhib'apito Zezu Cristuhu mama ãma! Da'ãma 're isiba mono zé hã sa'ẽtẽ uptabi wa, ma tô wahâimanazé ité hã wama sõmri za'ra, Zezu Cristu ihâiwa'utuzém na. Tahawa, wapẽ'ẽ 'remhã, rowẽ hã 'masisi uptabi za'ra di, rob'umnhasi na 're wahâimana za'ra mono wa, niwa rowẽ u za wasihutu wa. 4 Ãne wamhã, iwẽ uptabi te te wazô ipisutu za'ra hã, wa za waibu ni, isi'utõrĩ waihu'u õ hã, marĩ aimawi na iwazari õ, duré pire na 're ihâimana mono zé te te isimini waihu'u õ hã. Ã hã iwaibui wa'aba da hã 'Re ihâimana u'âsi mono ma tô asô sa'ra siromo za'ra wa'wa, hâiwa ãma. 5 Ta hã ate za'ra wa'wa, i'umnhasi za'ra wa'aba zarina, 'Re ihâimana u'âsi mono hã tiwaihu'u pese uptabi na te te 're i'ab'madâ'â pese mono hã. Ãne wa, te za danho'reptuzé hã asima iwaibui wa'wa, za te te ihâi'ré rob'rãsutu ãma hã.

6 Tahawa, ma'ãpé asima ãma rowẽ za'ra wa'aba, a'â aiwi robzei õ za'ra wa'aba da nherẽ, aipibuzé hã ahâ na asada 're hâimana za'ra wa'aba mono wa. 7 Aipibuzé hã asada 're ihâimana za'ra wa'aba mono hã, 'Re ihâimana u'âsi mono 're i'umnhasi za'ra wa'aba mono zé hã, tô sena zô. E marĩ wa. Ẽtẽ waipo pré oru zama, si'utõrĩ ãna 're ihâimana u'âsi waihu'u za'ra mono õ hã, te unhama na da te 're pibu za'ra. Tane duré 'Re ihâimana u'âsi mono 're i'umnhasi za'ra wa'aba mono zé, oru nhipai u iwẽ uptabi hã, iwẽ hã ipibuzé tãma 're ihâimana za'ra mono da si, siptete sina aima 're ihâimana u'âsi za'ra wa'aba mono da hã. Ãne wapsi te za aipibuzém na 're isaprĩ wẽ za'ra wa'aba mo, asiptete na duré aiwazé pese na, niwa Zezu Cristu apâ we imorĩzéb ãma hã. 8 Ta hã aima sawi za'ra wa'aba di, niwa 'madâ'â za'ra wa'aba õ nherẽ. Ma duré isaze za'ra wa'wa, ãhã na hã 'madâ'â za'ra wa'aba õ nherẽ, atõmo na. Ãne wa, te rowẽ hã sa'ẽtẽ uptabi na aima tihâimana za'ra wa'wa. Damreme hã sada 'maihâimana õ di, ãma irob'ui'érézéb da hã. 9 Ã hã rowẽ hã te aima tihâimana za'ra wa'wa, asõ'reptuzé hã asina uwaimrami za'ra wa'aba wa, ta hã Wanhib'apito asina 're i'umnhasi za'ra wa'aba mono zéb zarina.

10 'Re ihâimana u'âsi mono zadawa 'mahârâ'wa norĩ hã, 'Re ihâimana u'âsi mono nhimipawaptobzé iwa'âbâ õ na ma tô ãma rowasu'u za'ra, za te te aima ihâi'ré za'ra wa'aba na hã. Ta norĩ hã ma tô we sarẽi wẽ za'ra, te te ãma pibui pese za'ra sina, danho'reptuzém na rowasu'u hã. 11 Wanhib'apito Cristuhu Pẽ'ẽzani hã ma tô iwa tihâimana za'ra, ã norĩ 'Re ihâimana u'âsi mono zadawa 'mahârâ'wa norĩ wamhã. Ã hã Ipẽ'ẽzani ma tô tãma waihu'u siromo za'ra, Cristu za te te irobzépata na hã duré te te robzépata pari, waihu'u pese uptabi na za 're ihâimana mono zém na hã. Tawamhã 'Re ihâimana u'âsi mono zadawa 'mahârâ'wa norĩ hã ma tô sima wẽ za'ra, te te sadaihu'u wẽ za'ra da, Ipẽ'ẽzani hã marĩ te te tãma iwaihu'u za'ra zé hã. Ipẽ'ẽzani ma tô tãma hâi'ré siromo za'ra, za te te irobzépatazé bâdâ hã, duré taha pari, waihu'u pese uptabi na za 're ihâimana mono zém na, taha bâtâ mono 'remhã. 12 'Re ihâimana u'âsi mono zadawa 'mahârâ'wa norĩ hã, tô sena 'Re ihâimana u'âsi mono nhimiroti na ãhã na iwapari za'ra wa'wa hã te te rowasu'u za'ra wamhã, 'Re ihâimana u'âsi mono hã ma tô tãma hâi'ré za'ra, 'râwi te te sima iromhuri za'ra õ na hã, aima za'ra wa'aba si te te iromhuri za'ra na hã. Rowasu'u Itém na rowasu'u'wa norĩ hã, 'Re ihâimana u'âsi mono Pẽ'ẽzani zadawa para te te irowasu'u za'ra norĩ hã, hâiwa hawi 'Re ihâimana u'âsi mono te te we isatõrĩ zadawa para, ma tô aima 'mahârâ za'ra wa'wa, tô sena 'Re ihâimana u'âsi mono nhimiroti hã. Ã hã rowasu'u hã te hâiwa hawi romhuri'wa norĩ zama te te sima 're wẽ za'ra, te te sadaihu'u za'ra da hã.

13 Tahawa, rosa'rata na asimire sina 're aihâimana u'âsi za'ra wa'aba mono, marĩ hã za 're i'manharĩ za'ra wa'aba mono zô. Asimiza'rese 're anomro aba mono. Duré rob'umnhasi sina wa'âbâ ãna 'Re ihâimana u'âsi mono nhimipawaptobzéb zô, te za 're asimipari za'ra wa'aba mo, za te te aima isõmri za'ra wa'aba zô, Zezu Cristu hã niwa te te aima hâi'ré za'ra wa'aba wamhã. 14 Ãhã na hã 'Re ihâimana u'âsi mono nhimiroti 'madâ'â pese'wa na oto 're anomro aba mono wa, asima iwẽzéb zarina 're aihâimana za'ra wa'aba mono tõ oto, isimiroti aima waihu'u za'ra wa'aba õ ré, aré 're i'aihâimana za'ra wa'aba mono ne. 15 'Re ihâimana u'âsi mono te te sima i'aipisutu za'ra wa'wa hã wẽ uptabi na 're ihâimana mono ne, te za aiwẽ uptabi na si tãma 're aihâimana za'ra wa'aba mo, uburé marĩ 're i'manharĩ za'ra wa'aba mono zém na hã. 16 E marĩ wa. Ãne, Ibaihâ Iwazé pese na rob'ui'éré hã nomro wa: “Aiwẽ na 're anomro aba mono, Wa hã ĩwẽ uptabi na 're ĩhâimana mono wa.”

17 'Re ihâimana u'âsi mono hã te 're isisi za'ra wa'aba mo, Aimama na, simiba'a ãna aiwapsi te te da'ãma 're i'arowairébé mono hã danhimiromhuri zarina. Tahawa, ma'ãpé 're wazé pese za'ra wa'aba mono, ti'ai baba 're anomro aba mono ré. 18 Aima waihu'u pese za'ra wa'aba di, te te i'aiwa'âbâ za'ra wa'aba zé hã, aihâimanazé marĩ dai õ na 're i'aihâimana za'ra wa'aba mono zém hawi te te asani za'ra wa'aba da hã, aihi'rata hawi 're i'aihâimana za'ra wa'aba mono zém hawimhã. Aiwa'âbâ za'ra wa'aba zé hã marĩ 're isi'utõrĩ pese mono nei õ di. Ẽtẽ waipo pré oru nei õ di. Duré ẽtẽ waipo prã prata nei õ di. 19 Cristuhu wapru iwa'âbâ za'ẽtẽ na ma tô asani za'ra wa'wa. Ta hã pone'ẽrebâ i'rare iwẽ uptabi ne, duré marĩ iwasédé ãma ihâimana õ ne. 20 Ta hã ma tô 'Re ihâimana u'âsi mono pisutu, te te aropoto mono wana ré. Tane nherẽ, ã bâtâ mono na ma tô hâi'ré, ai'udâna za'ra wa'aba. 21 Taha u'âbâ ma tô 'Re ihâimana u'âsi mono hã isaze za'ra wa'wa, apâ te te ihâiwa'udu hã duré waihu'u pese uptabi na 're ihâimana mono zé te te tãma ipisudu hã. Ãne wa, 're i'umnhasi za'ra wa'aba mono zé hã duré rob'umnhasi sina 're i'aihâimana za'ra wa'aba mono zé hã, te 'Re ihâimana u'âsi mono ãma siptete sina aima 're hâimana za'ra wa'wa.

22 Ãhã na, tô sena 'Re ihâimana u'âsi mono nhimiroti, 're i'madâ'â pese za'ra wa'aba mono zém na, ma tô aiwasété wi asi'upsõi pese za'ra wa'wa. Taha zarina te oto asiré isazei'wa norĩ hã tô sena 're isawi za'ra wa'aba mono zé hã aima 're hâimana za'ra wa'wa. Tahawa, ma'ãpé tô sena na, aipẽ'ẽ na 're asisawi pese za'ra wa'aba mono. 23 E marĩ wa. Ma tô aipoto téb za'ra wa'wa, romnhamare idâ'â pese nei õ di. Tazahã romnhamare idâ'â waihu'u õ ne. 'Re ihâimana u'âsi mono nhimiroti, 're ihâimana mono na ma aipoto téb za'ra wa'wa, si'utõrĩ waihu'u ãna 're ihâimana u'âsi mono na. 24 Ãne, Ibaihâ Iwazé pese na rob'ui'éré, te nomro:

à hã Rowasu'uwẽ na da te aima ãma 're irowahutu za'ra wa'aba mono.