'Re ihâimana u'âsi mono ma si, 're idasisõmri za'ra mono zé
4
E ma hawi 're wairébé mono bâ, dasi'wapé hã duré dasiwasu hã ai'reb za'ra wa'aba hã. E ta norĩ hã marĩ iwasédé aihâiba 're, 're isi'wapéi u'âsi za'ra wa'aba mono zém hawi 're wairébé mono ã bâ. 2 Marĩ hã ate õ nherẽ, te sô 're ai'wapé za'ra wa'aba mo. Tane nherẽ, aima 're hâimana waihu'u za'ra wa'aba mono õ wa, te sô 're idanhimroi wa'aba mo. Te duré marĩ na 're idanho'ru za'ra wa'aba mo. Tane nherẽ, asima 're waibui waihu'u za'ra wa'aba mono õ wa, te sô 're ai'wapé za'ra wa'aba mo. Te duré dasi'wapé hã sô 're isani za'ra wa'aba mo. Tane nherẽ, aima 're hâimana waihu'u za'ra wa'aba mono õ di, 'Re ihâimana u'âsi mono wi, 're waptẽrẽ za'ra wa'aba mono õ wa. 3 Duré 'Re ihâimana u'âsi mono wi 're rowaptẽrẽ za'ra wa'aba mono wamhã, 're waibui wa'aba mono õ di. E marĩ wa. Asima iwẽzé hã wasété nherẽ, 're waptẽrẽ za'ra wa'aba mono wa, marĩ asima 're iwẽ za'ra wa'aba mono zéb zarina si, ãma 're 'manharĩ za'ra wa'aba mono da. 4 'Re ihâimana u'âsi mono ma si, 're i'aihâimana za'ra wa'aba mono õ! E waihu'u za'ra wa'aba ã bâ, ni'wa hã ti'ai ãma marĩ iwasédé siwa'ru 're ihâimana za'ra mono zawi'wa na 're hâimana mono wamhã, 'Re ihâimana u'âsi mono nhitob'ru na 're ihâimana mono na hã. Ni'wa hã ti'ai ãma marĩ iwasédé, siwa'ru 're ihâimana za'ra mono zawi'wa na 're hâimana mono wamhã, 'Re ihâimana u'âsi mono nhitob'ru na te za 're hâimana. 5 Duré niwamhã ãma rosa'rata za'ra wa'aba tõ, taré ihâimana newa, Ibaihâ Iwazé pese na rob'ui'éré, ã hã: “'Re ihâimana u'âsi mono, Tipẽ'ẽzani te te wama 're i'anhomri mono ma hã, te sima wẽ upta, õhõ ma si 're wahâimana za'ra mono da.” 6 Tazahã, 'Re ihâimana u'âsi mono, tinhimizawi pese zé te te wama 're i'anhomri mono hã sa'ẽtẽ uptabi di. Ãne duréihã ãhã wasu'u na Ibaihâ Iwazé pese na rob'ui'éré hã: “'Re ihâimana u'âsi mono hã te 're sima'wara, 'râwi 're isi'madâ'â ze za'ra mono norĩ zada. 'Râwi 're isi'madâ'â ze za'ra mono õ norĩ ma si, te tinhimizawizé hã te te tãma 're anhomri.”7 Tahawa, ma'ãpé 'Re ihâimana u'âsi mono nhimi'madâ'âzéb zahâpâ, 're aihâimana u'âsi za'ra wa'aba mono. Duré asiptete sina Wa'uburé da, asimire sina 're aimasa wa'aba mono. Tawamhã te za aima 're simani za'ra wa'wa. 8 Ma'ãpé 'Re ihâimana u'âsi mono u asina rotété pese za'ra wa'aba. Tawamhã te za atẽme sina rotété 'wa. Aiwasédé 're i'manharĩ za'ra wa'aba mono norĩ, ma'ãpé asisib'rata upsõ za'ra wa'aba! Duré a norĩ wa'wa aihâimana si'amoi pese na 're i'aihâimana za'ra wa'aba mono norĩ, ma'ãpé asipẽ'ẽ pese za'ra wa'aba! 9 Aiwasété u'âbâ, ma'ãpé aiwi robzei'õ za'ra wa'aba, duré asina rosa'rata zawi te, ai'ru'ru wa'aba. Rowẽ te, 're i'aihâ za'ra wa'aba mono zé hã ãma saprĩ za'ra wa'aba, aiwa'õzéb u. Duré robze na 're i'aihâimana za'ra wa'aba mono zé hã, robzei'õ u ãma saprĩ za'ra wa'aba. 10 Ma'ãpé Uburé Danhib'apito nho'remhã, aiwapu na asi'madâ'â za'ra wa'aba. Tawamhã te za asõré wa'wa, danhipai u aiwazé pese na 're aihâimana za'ra wa'aba mono da.
11 Ĩsisãnawã norĩ, 're asibâsi wasété za'ra wa'aba mono tõ. Ni'wa hã tisiré Cristuhu zazei'wa te te bâsi wasété wamhã, duré iwasédé hã te te ãma hiri wamhã, ta hã te 'Re ihâimana u'âsi mono nhimiroti zahi na wasété. 'Re ihâimana u'âsi mono nhimiroti zahi ãma wasété wamhã, isarina ãma aihâimana õ di. Tazahã, te da'ãma rowairébé'wa ne aihâiba. 12 'Re ihâimana u'âsi mono si, misire roti zahi 'manharĩ'wa hã. Duré taha si, da'ãma rowairébé'wa i'uptabi hã. Taha si te te danho'reptui waihu'u pese di, duré te te da'uprosi waihu'u pese di. E 'wa hã a hã. E a hã sada aihâimana bâ, dawasédé hã da'ãma 're i'aza'ra mono da hã.
'Re ihâimana u'âsi mono ma si, uburé marĩ romnhowamhã tãma waihu'u pese uptabi di
13 Ma'ãpé ãhã na hã ĩwapari za'ra wa'aba, ãne 're inharĩ za'ra wa'aba mono norĩ: “Ã bâtâ na hã niwamhã awẽmhã wa za ai'aba'ré ni, nimomo 'ri nho'õmo u. Tawamhã tamemhã misi wahum na wa za ai'ubumro ni, marĩ zarina, rob'uiprazé hã wa te ãma sa'ẽtẽ za'ra da.” 14 Tazahã, aima waihu'u za'ra wa'aba õ di, niha awẽm na hã za aima iromhâimana za'ra wa'aba na hã. A norĩ wa'wa hã aiwa hâiwa nhirõtõ ne, za te te i'ubumro ne, taha pari ãma ronomro prãi wi, za isi'utõrĩ mono ne. 15 Ãne hã 're nharĩ za'ra wa'aba mono da nherẽ, ãne si 're nharĩ za'ra wa'aba mono: “'Re ihâimana u'âsi mono te te sima wẽ wamhã, wa za 're wahâimana hâ za'ra. Duré wa za wa te 're 'manharĩ za'ra, ã hã niwamhã õ hã.” 16 Tane nherẽ, a norĩ wa'wa hã te 're asi'madâ'â ze za'ra wa'aba mo. Te duré asina 're aiwata za'ra wa'aba mo, asihawi asima 're irowa'õtõ za'ra wa'aba mono zém na. Uburé ãne hã marĩ na 're idasi'madâ'â ze za'ra mono zé hã, wasété di. 17 Tahawa, ma'ãpé ãhã na, ãma 're aipo're pu'u za'ra wa'aba mono: Ni'wa hã iwẽ te te i'manharĩ da hã tãma waihu'u pese nherẽ, te te 'manharĩ õ wamhã, ta hã te za tiwasédé hã 'manha.