Isibro pese norĩ po're pu'uzé
5
Isibro pese norĩ, ma'ãpé, ãhã na hã ĩwapari pese za'ra wa'aba! Asina aiwa'õ za'ra wa'aba, duré asina rosa'rata zawi te, ai'ru'ru wa'aba, irobzépata za'ra wa'aba zé hã, za aima wisi za'ra wa'aba wa. 2 Asimarĩ pese za'ra wa'wa hã ma tô oto aiwi tiwahu za'ra wa'wa. Duré da'uza hâzapu'u'wa piro'o wawẽ hã te oto ai'uza hã aiwi hâzapu'u za'ra wa'wa. 3 Ẽtẽ waipo pré oru hã, duré ẽtẽ waipo prã prata hã, ma tô oto ti'u're za'ra. Tawamhã i'u're za'ra zé hã aiwasu'u'wa na te za asada tihâimana za'ra wa'wa. Duré unhama ne, te za aihâiba hã aiwi uprosi za'ra wa'wa. Ã hã bâdâ i'rãsutu ãma hã, asimarĩ hã ma tô asima i'ubumro za'ra wa'wa. 4 Ĩwapari pese za'ra wa'aba! Aiburu na aima romhuri'wa norĩ te te aima iroptehâri za'ra wa'wa hã, ipawa'âbâ za'ra wa'aba õ hã, hârâ 'rãihâ na te aiwi waptẽrẽ za'ra wa'wa. Tawamhã roptehâri'wa norĩ, robzé te, hârâ 'rãihâ na ihãsizé hã, 'Re ihâimana u'âsi mono nhimiparizéb u ma tô wi, Uburé Danhib'apito Waihu'u pese Uptabi na Danhipai u 're Ihâimana mono u.5 Ti'ai ãma hã te asibro pese na 're aihâimana za'ra wa'aba mo. Duré asima iwẽ zarina si te marĩ hã asima 're i'manharĩ za'ra wa'aba mo, danhimizama hã sa'rese ãna da te 're simroi mono da, 're isihâi pese za'ra mono ne. 6 Duré marĩ te te 're i'upa za'ra mono õ norĩ hã ma tô 're ihâiba za'ré za'ra wa'aba mo, da te 're simroi mono da, si'wawi 're sisapẽtẽ za'ra mono ãna, asada za'ra wa'aba hã.
Robzépata nherẽ, Wanhib'apito ãma danhimi'ẽ na 're idahâimana za'ra mono zé
7 Tahawa, ĩsisãnawã norĩ, ma'ãpé aiwa'a ãna 're aihâimana za'ra wa'aba mono, Wanhib'apito hã apâ we imorĩzéb u. Ma'ãpé duré ãma rosa'rata za'ra wa'aba, buru tede'wa na, ti'a hã amnho te te tãma wazere wẽ da, te za mapa simi'ẽ na, tã hã ita'a 'rãsutuzéb zô, duré a'ẽ ta'a zô zama. 8 A norĩ wa'aba zama aiwa'a ãna 're aihâimana za'ra wa'aba mono. Ma'ãpé aiwi 're robzei'õ za'ra wa'aba mono tõ, Wanhib'apito apâ we imorĩzéb u hã romhuture wa oto.
9 Ĩsisãnawã norĩ, asima 're aiwapsari za'ra wa'aba mono tõ, 'Re ihâimana u'âsi mono hã aiwasédé te te ai'ãma 're sa'ra za'ra wa'aba mono tõ da. Da'ãma Rowairébé'wa hã te oto 'ridawab za. Isébré da si oto. 10 Ĩsisãnawã norĩ, ma'ãpé 'Re ihâimana u'âsi mono zadawa 'mahârâ'wa norĩ nhirã zarina, 're anomro aba mono, Uburé Danhib'apito nhisi na te te 're irowasu'u za'ra mono norĩ nhirã zarina. Ta norĩ hã te te 're robzépata za'ra mono nherẽ, te wa'a ãna 're hâimana za'ra. 11 Wa tô waihu'u za'ra ni, ta norĩ ma, 're irowẽ uptabi za'ra mono na hã, te te 're robzépata za'ra mono nherẽ, simi'ẽ na 're ihâimana za'ra mono na hã. A norĩ wa'wa hã ma tô 're iwapari za'ra wa'aba mo, Zo hã simi'ẽ na 're ihâimana mono zém na hã. Duré aima waihu'u pese za'ra wa'aba di, i'rãsutu ãma 'Re ihâimana u'âsi mono iwẽ te te tãma ipisutuzém na hã. E marĩ wa. Uburé Danhib'apito hã da'ãma 're pẽ'ẽzé pese mono wa, duré da'ãma siba pese wa.
12 Ĩsisãnawã norĩ, uburé marĩ nhipai u ipire hã, ã hã: Marĩ na dama 're ropisutu zahi za'ra wa'aba mono wamhã, hâiwa nhisi na, duré ti'a nhisi na, duré siwa'ru marĩ 're ihâimana za'ra mono norĩ nhisi na dama 're ropisutu za'ra wa'aba mono tõ. Ãne si te za dama 're inharĩ za'ra wa'aba mo, ropisutu da wamhã, “ĩhe”, niwamhã duré ropisutu dai õ wamhã, ãne “mare di”, 'Re ihâimana u'âsi mono hã tinhimihâzé iwasédé te te aima pisutu za'ra wa'aba tõ da.
'Re ihâimana u'âsi mono umnhasi sina rowaptẽrẽzé
13 Ni'wa asiré za'ra wa'aba hã te te robzépata wamhã, ma'ãpé te te rowaptẽrẽ, 'Re ihâimana u'âsi mono wi. Duré ni'wa hã to sina hâimana wamhã, sõ're, 'Re ihâimana u'âsi mono ãma dawatazém na. 14 Asiré za'ra wa'aba hã ni'wa hâzé wamhã, iwẽ hã rowahutuzéb 're isazei'wa norĩ 'madâ'â'wa norĩ zô ihârâ za'ra da hã, ta norĩ hã te te ãma rowaptẽrẽ za'ra da, duré rob'rãi wa'u tom na te te siwi 'rãti'i da, Wanhib'apito nhisi na. 15 Tawamhã Wanhib'apito umnhasi sina te te tiwi ãma rowaptẽrẽ za'ra wamhã, te za pese, ihâzé ré hã. Te za duré wahutu. Duré niwamhã tiwasédé te te 'manharĩ wamhã, te te ãma 'madâ'â õ di za, Wanhib'apito hã. 16 Tahawa, ma'ãpé aiwasédé 're i'manharĩ za'ra wa'aba mono na, asima 're asiwasu'u za'ra wa'aba mono. Tawamhã te za duré asi'ãma 're irowaptẽrẽ za'ra wa'aba mo, Wanhib'apito hã te te 're aipese za'ra wa'aba mono da. I'uwaibaba na 're ihâimana za'ra mono norĩ nhimirowaptẽrẽ hã 'Re ihâimana u'âsi mono te te 're i'awapari mono da hã, siptete uptabi di. 17 Elias hã, wasine za'ra ti'ai ãma a'uwẽ. Ta hã ma tô sa'ẽtẽ uptabi rowaptẽrẽ nhiptete upta, tã ta'a tõ da. Tahawa tã hã ta'a õ di, si'ubdatõ wahu wãiwab u hã. 18 Taha parimhã, ma tô duré rowaptẽ. Tahawa tã hã ma tô tita'a. Duré ti'a hã ma tô amnho hã wazere wẽ.
19 Ĩsisãnawã norĩ, ni'wa asiré za'ra wa'aba hã, tô sena nherẽ, 'Re ihâimana u'âsi mono nhimiroti nhiti sipai wamhã, duré ni'wa aimawi hã apâ bâdâdi iwẽ u te te sina siri da, te te pawapto wamhã, 20 ãne na ãma 're aipo're pu'u za'ra wa'aba mono: Ni'wa tiwasété na 're imorĩ hã, bâdâdi iwasété hawi sipi'ra da, ni'wa aimawi hã te te pawapto wamhã, te za sõ'reptu ta hã, idâ'â hawi. Te za duré 'manha, iwasédé ahâ uptabi nherẽ, Wanhib'apito te te ãma 're i'ab'madâ'â mono õ zé hã oto.