Damreme wasété zani wi, 're dasitété za'ra mono sina, 're idahâimana za'ra mono zé
3
Ĩsisãnawã norĩ, asiré 're i'aihâimana za'ra wa'aba mono hã, ai'ahâ na dama rowahutu'wa na 're aihâimana za'ra wa'aba mono õ di za, aima waihu'u pese za'ra wa'aba wa, wa te dama 're irowahutu za'ra mono hã, Wanhib'apito hã danhipai u pire na za te te wa'ãma i'arowairébé na hã. 2 Uburé wa norĩ hã wa wahâimanazém na wa te ãma 're upa za'ra. Ni'wa hã timreme na te te ãma 're upai mono õ wamhã, ta hã te i'uwaibaba na si 're mo. Duré siwi 're isimi'rãmi mono zé hã, tãma waihu'u pese di. 3 Awaru zadai'ré 're, ipozé hã te te 're wawapari za'ra mono da, wa te tãma 're séme mono wamhã, tawapsi wa za wa te 're simro, wa te wasima 're iwẽ za'ra mono zéb uwaibaba. 4 Duré ãma rosa'rata za'ra wa'aba, uba're isa'ẽtẽ na ãma isimiré hã: Sa'ẽtẽ uptabi nherẽ, duré rowa'u'u za'ẽne hã za te te sari nherẽ, isuru pesere na isarizé hã, lemi na isisi na, taha na te za i'mapraba'wa hã 'mapra nimomo, te te sima irowẽzéb uwaibaba. 5 Tane duré danhoto hã, dahâiba na hã surure nherẽ, te za taha na 'râwi sina tiwata, marĩ sa'ẽtẽ na te te i'manharĩzém na hã.Tane duré ma'ãpé ãma rosa'rata za'ra wa'aba, marã na hã. Sa'ẽtẽ uptabi nherẽ, te za pré si'ubuzi surure nherẽ, ãma sazu, sihõmo mono da. 6 Tane duré, danhoto hã unhama ne. Ta hã siptete uptabi di, uburé marĩ iwasédé te te 're i'ab'manharĩ mono da hã. Dahâiba na te 're hâimana. Tawamhã te za uburé dahâiba hã wamna. Duré ti'ai ãma dahâimana 'rãsutu u te za ãma sazu, unhama na marĩ, da te ãma 're isazu za'ra mono ne, tô õ hã danhoto hã ropipa hawi unhama na 're hâimana mono wa. 7 A'uwẽ norĩ hã, uburé abaze ipoto mono bâ 're ihâimana za'ra mono norĩ ma hã, siptete na 're hâimana waihu'u pese za'ra mono di, si norĩ ma, di'i na 're inomro mono norĩ ma, duré â 'rowi 're inomro mono norĩ ma zama. 8 Tane nherẽ, danhoto ma hã, ni'wa siptete na hâimana waihu'u õ di. Ta hã iwasédé, tiwi idasitété waihu'u õ. Duré wahi 'wa wa'u ne hã isé uptabi, isipãrĩ pe. 9 Wanhoto na hã wa 're wawata za'ra, Uburé Danhib'apito Wamama ãma hã. Duré taha na, wa marĩ iwasédé wa te dama 're pisutu za'ra, 'Re ihâimana u'âsi mono, tisine te te ida'apoto norĩ ma hã. 10 Tô dazadawa hawip si misi hawim nherẽ, te 're wairébé, damreme 'Re ihâimana u'âsi mono ãma 're idawata za'ra mono zé hã, duré marĩ iwasédé da te dama 're ipisutu za'ra mono zé hã. Ĩsisãnawã norĩ, ãne hã 're romhâimana mono tõ. 11 Ma'ãpé ãma rosa'rata pese za'ra wa'aba! E ub're hawimhã siré pu'u waihu'u pese zahuré di, â ise hã duré â iwarĩrĩ zé me hã. 12 Ĩsisãnawã norĩ, e rob'rã figu wede hã 'rãi waihu'u pese bâ, azeitona na hã. Duré niwamhã, e uva 'ru hã 'rãi waihu'u pese bâ, rob'rã figu na hã. Tane duré, ub're hawimhã siré pu'u waihu'u zahuré õ di, â warĩrĩ hã, â isei me hã.
'Re ihâimana u'âsi mono hawi rowaihu tô sena hã
13 E 'wa hã dahâimanazém na rowaihu iwẽ waihu'u pese 'wa, duré i'rã nhimiza're, asiré za'ra wa'aba hã. Ta hã te te hâi'ré pé, tihâimanazé iwẽ na hã, marĩ te te 're i'ab'manharĩ mono zém na, tipire na 're si'madâ'â mono ãna, rowaihu iwẽ tãma ihâimanazéb zarina hã. 14 Tane nherẽ, aipẽ'ẽ 'remhã marĩ na asiminho'ru za'ra wa'wa, duré aipẽ'ẽ 're, marĩ 're isépata za'ra wa'aba mono zé hã, duré aihâiba pisutu asima si marĩ 're iwẽ za'ra wa'aba mono zé hã aima 're hâimana za'ra wa'aba mono wamhã, taha na 'râwi asina 're aiwata za'ra wa'aba mono tõ, ãne hã rowaihu iwẽ hã aima 're ihâimana za'ra wa'aba mono na hã. Duré tô sena hã 'Re ihâimana u'âsi mono nhimiroti, 're udâ za'ra wa'aba mono tõ. 15 Ãne na “rowaihu hã” hâiwa hawib õ di. Ta hã ti'ai 're, danhimirowaihu, dasihawimhã. 'Re ihâimana u'âsi mono Pẽ'ẽzani hawib õ di. Tazahã Wa'uburé hawimhã. 16 E marĩ wa. Marĩ na danhiminho'ru, duré dahâiba pisutu dasima si marĩ wẽ hã dama 're hâimana za'ra mono wamhã, siwa'ru te za tawamhã 're dahâimana za'ra, siwa'ru uburé marĩ iwasédé, da te 're i'manharĩ za'ra mono na si. 17 Tazahã, hâiwa hawi rowaihu iwẽ na hã, uburé marĩ nhipai u ãma 're ihâimana mono hã, ã hã: Marĩ iwasédé, ãma 're ihâimana mono õ. Duré isãna'remhã romhâri'wa sena na dama ihâimana, isimizawi pe, da'ãma isiwãrĩ pe, da'ãma isiba pe, duré dama marĩ 'manharĩ wẽ 'wa, isimiba'a õ, duré sena na dama ihâimana. 18 Amnho iwẽ hã da te 're itehâri za'ra mono ne, te za rowẽ hã tãma 're hâimana za'ra, romhâri'wa sena na dama 're ihâimana za'ra mono norĩ ma hã, i'uwaibaba na si marĩ te te 're i'manharĩ za'ra mono wa'rãmimhã.