Aiwam na wa za dama 're wahâimana za'ra
2
Ĩsisãnawã norĩ, Wanhib'apito Zezu Cristu wẽ uptabi na 're ihâimana mono zazei'wa na 're anomro aba mono wamhã, niwa aiwab õ na hã dama 're aihâimana za'ra wa'aba mono tõ, daba'a na hã. 2 Ãne hã: Ai'rã'õtõ aba ré, aibâ ẽtẽ waipo pré oru na isiptõmohi tétézé hã, duré i'uza iwa'âbâ za'ẽne hã sébré wamhã, duré aibâ ihâiba amo sébré wamhã, isimarĩ'õ i'uza ihâ'ratare ré duré ihâi ra ré hã, 3 ãté tawamhã, te za i'madâ'â wẽ wa'wa, aibâ i'uza iwa'âbâ za'ẽne hã. Ãne te za tãma inharĩ 'wa: “Ãme asãmra, danhamrazé iwẽ ihâimana ãma.” Tane nherẽ, niwamhã ãne te za inharĩ 'wa, isibrob'õ ma hã: “A hã õme hâiwi asa na” niwamhã “Ãme ti'ai wa asãmra, ĩpara ãma.” 4 Ãne hã 're 'manharĩ za'ra wa'aba mono wamhã, aiwab õ hã te 'râwi asima 're i'manharĩ za'ra wa'aba mo. Duré asimirosa'rata wasété zarina, te daba'a na da'ãma 're irowairébé za'ra wa'aba mo.5 Ĩsisãnawã norĩ, ĩma i'asawi pese za'ra wa'aba norĩ hã, ma'ãpé ĩwapari pese za'ra wa'aba! E 'Re ihâimana u'âsi mono hã te te pisutu za'ra ã bâ, sibrob ãna ti'ai ãma datõmo nho'a dama 're ihâimana za'ra mono hã, sibro pese na oto 're hâimana za'ra mono da, te te sina 're i'umnhasi za'ra mono zém na, duré Da'ãma 're isib'a'uwẽ mono zém na ãma 're site za'ra mono da, te te ãma iropisudu hã te te 're i'azawi pese mono norĩ ma hã. 6 Tane nherẽ, te taré na 're i'madâ'â za'ra wa'aba mo, isibrob'õ norĩ hã. E isibro pese norĩ hã te te 're aiwati pese za'ra wa'aba mono ã bâ. E duré ta norĩ hã te te 're asimroi wa'aba mono ã bâ, da'ãma rowairébézéb u hã. 7 E ta norĩ hã, Cristuhu nhisi iwẽ uptabi ãma te te 're wasété za'ra mono ã bâ, ite na tãma 're i'aihâimana za'ra wa'aba mono ãma hã.
8 Danhib'apito uptabi nhimiroti, Ibaihâ Iwazé pese na rob'ui'éré ãne inomro hã 're 'madâ'â pese za'ra wa'aba mono wamhã: “'Re da'azawi pese mono, 're i'asisawi pese mono ne”, tawamhã i'uwaibaba te za tô 're i'manharĩ za'ra wa'aba mo. 9 Tane nherẽ, aiwab õ na dama 're 'manharĩ za'ra wa'aba mono wamhã, aiwasédé hã te za 're i'manharĩ za'ra wa'aba mo. Tawamhã Wamama nhimiroti zahi hã te za te te ai'ãma 're aroti wa'wa, roti zahi hã 're upa za'ra wa'aba mono wa. 10 E marĩ wa. Ni'wa hã roti zahi te te 're ab'madâ'â pese mono nherẽ, misi na si'morõwĩrĩ wamhã, uburé te te i'a'upa na hã te za ãma upa, misi roti si te te upa nherẽ. 11 Tô õ hã: “Damro na dawi asipsaihuri tõ da” te te iroti hã, ma tô duré roti: “Da'maiwĩrĩ tõ da.” Tahawa, damro na dawi asipsaihuri õ nherẽ, da'maiwĩrĩ wamhã, i'upai'wa na te za tô aihâiba, roti zahi hã rẽme wa, da'maiwĩrĩ da. 12 Tahawa, ma'ãpé dama 're rowasu'u za'ra wa'aba mono, duré 're aihâimana za'ra wa'aba mono, 'Re ihâimana u'âsi mono nhimiroti zahi zarina, za te te wa'ãma rowairébé za'ra wa, isimiroti zahi hã wawasété wi te te 're iwa'azani mono hã. 13 'Re ihâimana u'âsi mono hã nimahã bâtâ na te te da'ãma arowairébé wamhã, ni'wam norĩ ãma siba õ di za, da'ãma 're isiba za'ra mono õ norĩ ãma hã. Tanei õ di, ni'wam norĩ hã da'ãma 're isiba za'ra mono norĩ hã. Ta norĩ hã te za pahi ãna aimasa, Da'ãma rowairébé'wa nho'remhã, Bâdâ Rowairébézé za ihâimana ãma hã.
'Re ihâimana u'âsi mono, da te dasina 're umnhasi za'ra mono wamhã, te za da te tãma 're romhuri za'ra
14 Ĩsisãnawã norĩ, e marĩ da bâ, ni'wa hã te te nharĩ nherẽ, 'Re ihâimana u'âsi mono te te 're i'umnhasi mono na hã, tane nherẽ, marĩ iwẽ te te 're ab'manharĩ mono õ wamhã. E õne na te te 're i'umnhasi mono zé hã te te sõ'reptu da bâ. 15 Ãté niwamhã asisãnawã asiré isazei'wa duré ãté niwamhã aihidiba asiré isazei'wa zama, i'uza zô tiwi rowaptâ'â wamhã, duré niwamhã ãté dasa zô bâtâ sidâpâ ãma ihâimana da hã. 16 Tane nherẽ, tiwi sô irowaptâ'â na ãma aimei wa'aba õ wamhã, marĩ dai õ di, ãne si tãma nharĩ aba wamhã: “Rowẽ na si aimorĩ. Asi'uza na, asiwa'ro da. Duré asa na, i'mahâiwĩrĩzéb u.” Marĩ hã tãma sõmri aba ãna tãma nharĩ aba wamhã, e marĩ da bâ, tãma inharĩ aba zé hã. 17 Tane duré 'Re ihâimana u'âsi mono, da te dasina 're i'umnhasi za'ra mono zé hã, siwaprosi hã hâimana waihu'u õ di. Marĩ iwẽ da te 're i'manharĩ za'ra mono zé isiré hâimana õ wamhã, dâ'â di.
18 Ãté ni'wa hã te za ãne dama siwasu'u: “Ate iré hã 'Re ihâimana u'âsi mono asina 're i'umnhasi mono zé hã. Tazahã ĩte hã, marĩ iwẽ, wa te te 're ab'manharĩ.” Tane wamhã, ma'ãpé ĩma hâi'ré na, 'Re ihâimana u'âsi mono 're i'umnhasi mono zé hã, marĩ iwẽ 're ab'manharĩ mono õ nherẽ. Tawamhã wa hã wa za aima hâi'ré, 'Re ihâimana u'âsi mono te 're i'umnhasi mono zé hã duré isiré marĩ iwẽ te 're i'ab'manharĩ mono zéb zama. 19 E ma tô isaze, misire 'Re ihâimana u'âsi mono 're ihâimana mono na hã. We di tô. Wa'uburé norĩ zama te duré te te 're saze za'ra. Ipipa te, te duré tãma 're rẽrẽ'ẽ za'ra. 20 Aihâimana nhimiza'rese ãna 're i'aihâimana mono! E waihu'u da hã asima wẽ ã bâ, 'Re ihâimana u'âsi mono, da te 're i'umnhasi za'ra mono zé hã, marĩ iwẽ, da te 're 'manharĩ za'ra mono ãna, marĩ dai õ na hã. 21 E wahi'rada Abra'ã hã marĩ iwẽ te te i'manharĩ na 'Re ihâimana u'âsi mono hã te te wẽsãmri ã bâ, ti'ra uptabi nherẽ, Izaquihi ãma aré tinhoprubzé hã te te i'manharĩ hã, danhoprubzé da te 're isa'ra mono zé, ẽtẽ za'ra nhisiwi. 22 Ma'ãpé ãma rosa'rata pese za'ra wa'aba, 'Re ihâimana u'âsi mono te te 're i'umnhasi mono zé hã, duré marĩ iwẽ te te 're i'ab'manharĩ mono zé hã, siré te te 're iromhuri zahuré mono na hã. Marĩ iwẽ te te 're i'ab'manharĩ mono zéb zarina, ma tô 'Re ihâimana u'âsi mono te te 're i'umnhasi mono zé hã simisutu wahuré na hã oto tãma tihâiba. 23 Ãne wa, ma tô sina uwaimra, Ibaihâ Iwazé pese na ãma irob'ui'éré hã, ãne: “Abra'ã hã ma tô saze, 'Re ihâimana u'âsi mono. Tahawa 'Re ihâimana u'âsi mono hã ma tô wẽsã.” Tahawa Abra'ãhã wamri hã, 'Re ihâimana u'âsi mono siwaihu'u na. 24 Tahawa ma'ãpé waihu'u za'ra wa'aba. 'Re ihâimana u'âsi mono hã ni'wa te za wẽsã ihâimanazéb zarina, mare di, te te 're i'umnhasi mono zém na si hã.
25 Ãne ma tô tiromhâiba, Raabi pi'õ siwa'âbâ zô 're isi'rui mono ma hã. 'Re ihâimana u'âsi mono hã ma tô wẽsã, te te i'manharĩzém na, Izaraéu nhihudu norĩ wapsãi'a'wa norĩ hã tinhorõwa u te te 'mazasi wa, duré ãma sime zahuré wa, bâdâdi aimawi na pusi da, 'ri nho'õmo hawimhã.
26 Ni'wai wi ipẽ'ẽzani, ihâiba hawi watobro wamhã, dâ'â di. Tane duré marĩ iwẽ, da te 're 'manharĩ mono ãna, 'Re ihâimana u'âsi mono, da te dasina 're i'umnhasi mono zép si dama 're hâimana mono wamhã, dâ'â di. Marĩ dai õ di, 'Re ihâimana u'âsi mono, da te 're i'umnhasi mono zép si hã.