2 Ĩsisãnawã norĩ, marĩ ahâ na asada 're hâimana za'ra wa'aba mono wamhã, ato za'ẽtẽ na 're aihâimana za'ra wa'aba mono, sipu'u pese na marĩ asada 're hâimana za'ra wa'aba mono nherẽ, 're irobzépata za'ra wa'aba mono zéb da hã. 3 E marĩ wa. Aima waihu'u pese za'ra wa'aba wa, ãne hã: 'Re ihâimana u'âsi mono asina 're i'umnhasi za'ra wa'aba mono zé, sena zô, aipibuzé hã asada 're hâimana za'ra wa'aba mono parimhã, te za oto aima 're hâimana za'ra wa'wa, asiptete na 're i'aihâimana za'ra wa'aba mono zé hã, wẽ na ãma 're ro'rahâri za'ra wa'aba mono wamhã. 4 Asiptete na oto 're i'aihâimana za'ra wa'aba mono zé hã, ibâ na aima 're hâimana za'ra wa'aba mono wapsi, aiprédup sina duré i'uwaibaba na oto 're aihâimana za'ra wa'aba mono da, marĩ na 're upa za'ra wa'aba mono ãna. 5 Ni'wai wi aiwazarib za'ra wa'aba hã, dahâimanazém na rowaihu iwẽ zô tiwi rowaptâ'â wamhã, 'Re ihâimana u'âsi mono wi te te waptẽrẽ. Tawamhã te za tãma tisõ, tãma wẽ uptabi wa, da'ãma 're isiwãrĩ mono da hã. Tahawa te uburé te te dama 're anhomri, wẽ na. 6 'Re ihâimana u'âsi mono i'umnhasi sina, te za duré tiwi 're irowaptẽrẽ za'ra wa'aba mono, 're asiwawã za'ra wa'aba mono ãna. E marĩ wa. Ni'wa hã siwawãi wamhã, ta hã aiwa â sisasisi ne, rowa'u hã te te 're i'âzasisi mono ne. 7 Ni'wa hã ãne hâimana wamhã, te te rosa'rata tõ, Uburé Danhib'apito za marĩ te te tãma isõmri na hã. 8 E marĩ wa. Isimirosa'rada hã misi tãma hâimana õ wa, duré tihâimanazém na waptu na te te ãma 're saprĩ mono wa.

9 Isazei'wa hã sibrob õ wa, dama wapu na 're hâimana mono nherẽ, te za tô te te sima 're rowẽ, 'Re ihâimana u'âsi mono ma si, pire na 're hâimana mono wa. 10 Tane, ni'wa isazei'wa hã sibro pese na 're hâimana mono nherẽ, te za duré te te sima 're rowẽ, 'Re ihâimana u'âsi mono hã te te tãma 'manharĩ wamhã, dama wapu na oto 're hâimana mono da. E marĩ wa. Ni'wa hã sibro pese nherẽ, te za sô tirobaba, romnhirãrã rom na 're isimasa mono ne. 11 Bâdâ hã 'rãi watobro wamhã, duré rowa'ro uptabi wamhã, te za 'ré, rob're hã. Isu hã te za duré rere. Tawamhã 'madâ'â ze na ihâimanazé hã te za ai'utõ. Tane duré isibro pe hã. Tinhibrom na si 're 'rãza'õtõ mono ré, te za sô tirobaba.

12 Ni'wai ma 're rowẽ uptabi mono di, robzépata nherẽ, siptete u'âsi 'Re ihâimana u'âsi mono ãma 're ihâimana mono ma hã. E marĩ wa. Ipibuzé robzépata na te te ãma saprĩ wẽ wamhã, 'Re ihâimana u'âsi mono hã te za tãma pisutu dahâimanazé isi'utõrĩ õ, te te 're i'azawi pese mono norĩ ma, te te ãma iropisudu hã.

13 Ni'wa sada ipibuzé hã hâimana wamhã, niwa te te nharĩ tõ, ãne hã: “'Re ihâimana u'âsi mono hã ma ĩpibu.” E marĩ wa. Ni'wa hã te te pibui waihu'u õ di, 'Re ihâimana u'âsi mono, tiwasédé te te i'manharĩ da hã. Duré simipibui õ di ta hã, dawasédé, da te i'manharĩ da hã. 14 Dahâiba mono bâ dapibuzé hã te dama 're hâimana za'ra, 'râwi marĩ iwasédé, da te 're i'manharĩ za'ra mono zéb zarina, da te dasima 're iwẽ za'ra mono zé hã te te sitẽme 're da'wani za'ra mono wa, duré iwẽ newa te te 're da'rãiwamnarĩ za'ra mono wa. 15 Tawamhã ã hã 'râwi marĩ iwasédé, da te dasima 're iwẽ za'ra mono zé hã, dapẽ'ẽ 're sihâiba wamhã, dawasédé, da te 're i'manharĩ za'ra mono zé hã te za oto podo. Tawamhã dawasédé hã sa'ẽtẽ wamhã oto, ni'wa hã te za tiwĩ, iwasédé hã.

16 Ĩsisãnawã norĩ, ĩma i'asawi pese za'ra wa'aba norĩ, ãne na 'râwi asima 're rob'rã'rata za'ra wa'aba mono tõ. 17 Uburé marĩ iwẽ, duré i'uwaibaba wama 're ihâimana za'ra mono hã, ta norĩ hã hâiwa hawip si te wama 're hâimana za'ra, 'Re ihâimana u'âsi mono hâiwa na rob'uiwẽ'wa 're ihâimana za'ra mono norĩ Poto'wai hawip si. Ta hã tihâimanazém na te te saprĩ waihu'u õ di, awã isisaprĩ ahâ ne hã. 18 Te te sima iwẽzéb zarina ma tô 'manha, i'ra na 're wahâimana za'ra mono da hã, isimiroti tô sena 're ihâimana mono zéb zarina, i'ra poto'rata na 're wahâimana za'ra mono da, uburé marĩ te te i'apoto norĩ nhipai u.

19 Ĩsisãnawã norĩ, ĩma i'asawi pese za'ra wa'aba norĩ, ãma 're aipo're pu'u za'ra wa'aba mono, ãhã na hã: 'Re asisa'ra pese u'âsi za'ra wa'aba mono, a'â 're dawapari za'ra wa'aba mono da hã. Aimreme hã 're sani su'u za'ra wa'aba mono tõ, a'â. Duré 're asahi su'u za'ra wa'aba mono tõ. 20 E marĩ wa. Ti'ai ãma 're idazahi za'ra mono zé hã, te te dama 're tébré waihu'u za'ra mono õ di, 'Re ihâimana u'âsi mono te te sima 're iwẽ mono zéb zarina, i'uwaibaba na 're idahâimana za'ra mono zéb da hã. 21 Tahawa, ma'ãpé 're rẽme pese za'ra wa'aba mono, uburé senai õ na dahâimana nhiséb õ na 're idahâimana za'ra mono zé hã, duré marĩ iwasédé aima 're ihâimana za'ra wa'aba mono hã. 'Re ihâimana u'âsi mono nhimiroti si 're waibui wẽ wa'aba mono, aipire na 're asi'madâ'â za'ra wa'aba mono ãna, aipẽ'ẽ 're, te te aima 're i're za'ra wa'aba mono hã. Taha si waihu'u pese uptabi di, te te 're i'asõ'reptu za'ra wa'aba mono da hã.

22 Ma'ãpé isimiroti zarina 're aihâimana za'ra wa'aba mono. Mare di taré, iwapari'wa na hã, 'râwi asima 're rob'rã'rata za'ra wa'aba mono tõ da. 23 Ni'wa hã isimiroti te te wapari nherẽ, ãma hâimana õ wamhã, aiwa aibâ hã za isi'madâ'â ne, dasi'madâ'âzém na. 24 Si'madâ'â parimhã, te za oto mo. Tane nherẽ, te za awa'awi ti'ubu na po're ha'â, isi'madâ'âzém na hã. 25 Tazahã, ni'wa hã 'Re ihâimana u'âsi mono nhimiroti zahi iwẽ uptabi hã, rowẽ sina dasima iwẽ na 're idahâimana za'ra mono zém nhomri'wa hã, te te 're sabui pese mono wamhã, duré siptete sina ãma 're hâimana mono wamhã, mare di, taré iwapari'wa na te te ãma 're ipibui pese õ na hã, tazahã, õne u'âsi ãma 're ihâimana mono na hã, taha ma 're rowẽ uptabi mono di za, marĩ te te 're i'ab'manharĩ mono na hã.

26 Ni'wa hã, 'Re ihâimana u'âsi mono nhimiroti zahi 'madâ'â pese 'wa na 'râwi 're si'madâ'â zei mono nherẽ, timreme waptu na te te 're sani mono tõ da, 're sitété mono õ wamhã, ta hã te za 'râwi te te sima 're rob'rãmi. Tawamhã duré isimizaze hã marĩ dai õ di. 27 Danhimizaze i'uptabi hã duré tô sena hã, 'Re ihâimana u'âsi mono Wamama hã te te 're i'awẽsãmri mono hã, ã hã: Imama'õ norĩ hã duré pi'õi mrotõ norĩ hã da te 're pawaptob za'ra mono wapsi, te te 're robzépata za'ra mono ré hã, duré 're dasi'madâ'â pese za'ra mono wapsi, marĩ iwasédé ti'ai ãma 're ihâimana za'ra mono na 're dasihâiba wamnarĩ za'ra mono tõ da hã.