3 Ma'ãpé ãma rosa'rata pese za'ra wa'aba, te te irobzépatazém na simi'ẽ na te te i'wapézém na hã, tiwasédé te te 're i'manharĩ za'ra mono norĩ, sada sahi za'ra wamhã. Ãne wap si, aiwi 're robzei'õ za'ra wa'aba mono õ di za, duré tiwi 're aiwairébé aba mono õ di za. 4 Dawasété 'wapé na hã, zahadu 'mai'wapéi wa'aba õ di atâ'âzéb u hã, Zezusihi ne. 5 E ma tô bété ãma aipo're simrami za'ra wa'wa, 'Re ihâimana u'âsi mono timreme na te te i'asiptete za'ra wa'aba zém na hã ti'ra ne te te aima inharĩ za'ra wa'aba zém na, ãne:

7 Robzépada hã 're 'wapé ze za'ra wa'aba mono asimi'ẽ sina, damama hã marĩ na i'ra te te upai wa, te te i'azârizé simi'ẽ na i'ra te te isépata ne. E marĩ wa. 'Re irobzépata za'ra wa'aba mono zé hã, te te aima 're hâi'ré za'ra wa'aba mono wa, 'Re ihâimana u'âsi mono ti'ra norĩ ma, te te 're irob'manharĩ mono zé hã. Tawamhã bété e iré bâ da'ra hã, imama niwamhã te te i'azâri õ hã, marĩ na te te upa nherẽ. 8 A norĩ wa'wa hã, 'Re ihâimana u'âsi mono, i'ra norĩ marĩ na te te 're upa za'ra mono wa, te te 're ihâ za'ra mono ne, aima 're romhâimana za'ra wa'aba mono õ wamhã, ãne wamhã, 'Re ihâimana u'âsi mono 'ra uptabi na 're aihâimana za'ra wa'aba mono õ di tô, i'ra uptabi õ na 're aihâimana za'ra wa'aba mono wa. 9 Ti'ai ãma wamama norĩ hã ma tô te te 're wahâ za'ra, marĩ na wa te 're upa za'ra mono wamhã. Tawamhã wa tô wa te 're wazéb za'ra. Tahawa, isipai u za'ra wa za Wamama hâiwa ãma 're isãmra mono hã wa te 're wapari pese uptabi za'ra. Tawapsi wa za rowẽ na 're wahâimana u'âsi za'ra! 10 Ti'ai ãma wamama norĩ hã ro'rutu na ma tô te te 're wahâ za'ra, marĩ na wa te 're upa za'ra mono wamhã, i'uwaibaba na te te 're 'manharĩ za'ra mono da, te te 're irosa'rata za'ra mono zéb zarina. Tane nherẽ, 'Re ihâimana u'âsi mono si i'uwaibaba na si te te wama 're rob'manharĩ, rowẽ na si 're wahâimana za'ra mono da, wẽ uptabi na 're ihâimana mono zém na isiré 're wahâimana za'ra mono da. 11 Wawasédé wa te 're i'manharĩ za'ra mono u'âbâ, 'Re ihâimana u'âsi mono te te 're iwahâ za'ra mono zém na wa te tô wasima 're rowẽ waihu'u za'ra mono õ di. Taha na awa'awi na hã te za tô wawi tirobzei'õ. Tane nherẽ, taha parimhã romhutu'õmhã 'Re ihâimana u'âsi mono te te 're iwahâ za'ra mono norĩ hã wa za tô iwa'â hã wa te 're waibu, dahâimanazé i'uwaibaba hã duré datoi u'âsi dahâimanazéb zama.

12 Tahawa, ma'ãpé asib'rada sadâ'â na aima ihâimana za'ra wa'wa hã hâimo sarõtõ za'ra wa'aba! Duré aihi'rãti sib'uware na aima ihâimana za'ra wa'wa hã siptete za'ra wa'aba! 13 Bâdâdi awa'awi na si 're anomro aba mono. Ãne wamhã, asiré para nhib'uware na i'maihâimana 'wa hã 're 'rãtẽi mono õ di za. Tazahã, tô ipese da si.

14 Sada 're asapẽtẽ za'ra wa'aba mono, rowẽ na si uburé dama 're aihâimana za'ra wa'aba mono da, duré aimawi 'Re ihâimana u'âsi mono ma si 're aihâimana za'ra wa'aba mono da zama. E marĩ wa. Ni'wa 'Re ihâimana u'âsi mono ma si aimawi 're hâimana mono õ wamhã, niwamhã te te 'madâ'â waihu'u õ di za, Uburé Danhib'apito hã. 15 Ma'ãpé ãma 're pibui pese za'ra wa'aba mono, ni'wa hã te te rẽme tõ da, 'Re ihâimana u'âsi mono nhimizawizé hã. Ãma 're pibui pese za'ra wa'aba mono, ni'wa hã rowede iwarĩrĩ zé ne dawazari prédup tõ da, da'ahâ na te te da'awamnarĩ tõ da, tiwarĩrĩ zé na. 16 Ma'ãpé duré ãma 're pibui pese za'ra wa'aba mono, ni'wa hã dasina dahâimana na hâimana nhiséb ãna 're hâimana mono tõ da, duré ni'wa hã marĩ wazé pese na 're ihâimana mono hã te te 're awazé mono ãna 're hâimana mono tõ da, Ezauhu ne. Ta hã dasai wa'rãmi ma tô wede da'ra ipoto'rata wa, imama uirĩ na aré tãma 're hâimana mono da, imama te te aré tãma ipisutuzé hã. 17 Ta hã aima wasu'u waihu'u pese za'ra wa'aba di. Tâibâ parimhã ma tô aré sima wẽ, imama iwẽ hã te te tãma pisutu da, 'Re ihâimana u'âsi mono wi, te te ãma rowaptẽrẽ da. Tane nherẽ, imama hã ma tô wẽ'õ, te te i'manharĩzé te te ãma isaprĩ da hã waihu'u õ wa, imama hã iwẽ hã te te ãma rowaptẽrẽ da, wawa sina sima sô rĩtĩ nherẽ.

18 A norĩ wa'wa hã asina rotété za'ra wa'aba õ di, Sinai na ẽtẽ 'rãihâ nhisi i'upi waihu'u pese u hã, Izaraéu nhihudu norĩ te te sina irotété za'ra ne hã, ẽtẽ 'rãihâ iro'o u hã, robra u hã duré rowa'u'u za'ẽtẽ u hã, 19 danhimnhihârâzém hârâ u hã duré damreme rãrã'ã u hã. Izaraéu nhihudu norĩ hã, damreme te te wapari za'ra wamhã, ma tô sadawa uwati za'ra, te te tãma nharĩ zahu za'ra tõ da. 20 E marĩ wa. Te te 'wapéi waihu'u za'ra õ wa, 'Re ihâimana u'âsi mono roti zahi te te tãma ihiri za'ra hã, ãne: “Abaze zama, ẽtẽ 'rãihâ te te upi wamhã, te za tô dasiwi wĩrĩ ni, ẽtẽ na.” 21 Marĩ te te i'madâ'â za'ra hã pipa uptabi wa, Mozésihi zama ma tô tinha, ãne: “Wa rẽrẽ, ĩpahi te!”

22 Tazahã, a norĩ wa'wa hã ma tô aihutu 'wa ẽtẽ 'rãihâ Siã u, duré 'ri nho'u Zeruzalẽ 'Re ihâimana u'âsi mono idâ'â'õ te u, hâiwa hawi romhuri'wa norĩ ahâ uptabi na hâiwa ãma 're ihâimana za'ra mono zéb u. 23 Ma tô aihutu 'wa, 'Re ihâimana u'âsi mono 'ra poto'rata norĩ si'rã'õno ãma ito za'ẽtẽ uptabi za'ra u, hâiwa ãma isisi na rob'ui'éré ré norĩ hã. 'Re ihâimana u'âsi mono u ma aihutu 'wa, uburé Da'ãma Rowairébé'wai u. I'uwaibaba na si 're ihâimana za'ra mono norĩ pẽ'ẽzani u, ma duré aihutu 'wa, 'Re ihâimana u'âsi mono te te tãma 're iwẽ za'ra mono zéb zarina si, rowẽ uptabi ãma oto 're ihâimana za'ra mono norĩ u. 24 Zezusihi u ma duré aihutu 'wa, ropisutu zahi ité ãma i'uwaimrami'wai u, iwapru te te ãma 're ai'a'upsõi wa'aba mono da, te te isaza u, ropisudu iwẽ uptabi u, Abéuhu wapru nhipai u.

25 Tahawa, ma'ãpé ãma 're pibui pese za'ra wa'aba mono! 'Re ihâimana u'âsi mono te te aima 're inharĩ za'ra wa'aba mono zé hã asiwi 're wẽ'õ za'ra wa'aba mono tõ, 're wapari za'ra wa'aba mono tõ da hã. Ni'wam norĩ hã, 'Re ihâimana u'âsi mono nhimipo're pu'uzé ihawi ti'ai ãma te te wapari za'ra tõ da, te te 're iwẽ'õ za'ra mono hã, ta norĩ hã sisõ'reptui waihu'u za'ra õ di. Tahawa, wa norĩ zama 're wasisõ'reptui waihu'u za'ra mono õ di za tô, wapo're pu'uzé, wa te 're wẽ'õ za'ra mono wamhã, hâiwa hawi we 're ine mono hã. 26 Taha bâtâ na hã 'Re ihâimana u'âsi mono timreme na ma tô ti'a hã sãsã'ã. Tanei õ di, ãhã na hã. Ma tô oto ropisutu zahi, ãne: “Irẽme ma, ti'a hã wa za duré sãsã'ã, hâiwa zama.” 27 “Irẽme ma” ã hã timreme hã ma wama hâi'ré za'ra, uburé marĩ te te i'apoto mono hã za isirési za'ra na hã duré za isisaprĩ za'ra na hã, taha zarina isisaprĩ waihu'u za'ra õ si, õne u'âsi sisaprĩ ãna 're hâimana za'ra mono da.

28 Tahawa, wa za ãma 're wawata u'âsi za'ra, 'Re ihâimana u'âsi mono te te 're ida'a'madâ'â mono zé hã wa te waibui wa, marĩ te te irési waihu'u õ hã. Ãne wa, 'Re ihâimana u'âsi mono ãma wa za 're wawata u'âsi za'ra, wa te tãma 're irowẽ zani za'ra mono zéb uwaibaba, wa te 're wazéb za'ra mono sina. 29 E marĩ wa. Tô wate za'ra 'Re ihâimana u'âsi mono hã, uzâ rob'uprosi pese 'wai wa.