3 'Re ihâimana u'âsi mono, wa te wasina 're i'umnhasi za'ra mono zéb zarina, wa wa te 're sadaihu'u za'ra, 'Re ihâimana u'âsi mono timreme na uburé marĩ 're ihâimana za'ra mono te te i'apoto na hã, duré marĩ datõmo na da te 're i'madâ'â waihu'u pese za'ra mono hã, 're ihâimana za'ra mono na, datõmo na da te 're i'madâ'â waihu'u za'ra mono õ na te te i'apoto na hã.

4 Abéu hã, 'Re ihâimana u'âsi mono te te sina 're i'umnhasi mono zéb zarina, ma tô tãma tinhopru, Caĩhĩ nhoprubzém nhipai u iwẽ uptabi na. Te te sina 're i'umnhasi mono zéb zarina, ma tô 'Re ihâimana u'âsi mono hã wẽsã, 're imorĩ wẽ na, 'Re ihâimana u'âsi mono hã isõprubzé te te wẽsãmri wa. Te te sina 're i'umnhasi mono zéb zarina, te zahadu Abéu ãma 're dasipo're pu'u za'ra, dâ'â nherẽ.

5 Duré Enoqui hã, 'Re ihâimana u'âsi mono te te sina 're i'umnhasi mono zéb zarina, ma tô idâ'âzé wi sõ'reptu. Ma tô sitẽme ti'â, hâiba ré. Taha parimhã ni'wa hã te te oto sõpẽtẽ õ di, 'Re ihâimana u'âsi mono hã te te sitẽme âri wa. Ibaihâ Iwazé pese na rob'ui'éré hã te nomro, ãne: “'Re ihâimana u'âsi mono hã, Enoqui te te sitẽme âri wana ré hã, ma tô ãma 're to.” 6 Ni'wai ma, 'Re ihâimana u'âsi mono te te sina 're i'umnhasi mono zé hâimana õ nherẽ, te te sina tãma 're rowẽ waihu'u mono õ di. E marĩ wa. Ni'wa itẽme morĩ da wamhã, tô i'ru zahi 're ihâimana mono na te te isaze da hã, duré te te 're waihu'u wẽ za'ra mono da, sô 're isõpré mono norĩ te te 're i'apawa'âbâ mono na hã.

7 Noé hã, 'Re ihâimana u'âsi mono te te sina 're i'umnhasi mono zéb zarina, ma tô wapa, te te ipo're pu'uzé hã, marĩ za iwairébézém na datõmo na da te i'madâ'â waihu'u za'ra õ na. Noé hã 'Re ihâimana u'âsi mono mreme ma tô wapa. Tahawa, uba're wawẽ hã ma tô 'manha, arca na isisi hã. Taha na 'Re ihâimana u'âsi mono hã ma tô sõ'reptu, duré isipoto hawi a'uwẽ norĩ zama. Ãne wa, Noé te te i'manharĩzém na ma tô dama hâi'ré, ti'ai ãma dawasété na 're idanomro mono na. Ma tô duré 'Re ihâimana u'âsi mono hã wẽsã, te te sina 're i'umnhasi mono zéb zarina.

8 Abra'ã hã, 'Re ihâimana u'âsi mono te te sina 're i'umnhasi mono zéb zarina, ma tô wapa, sô hârâ wamhã. Tahawa, ti'a hã te te tãma sõmri da, te te ãma tãma iropisutuzéb u, ma tô watobro, Abra'ã hã. Tite ti'ai wa'õtõ nho'u hã ma tô tirẽ, nimomo imorĩzé hã te te waihu'u ãna. 9 'Re ihâimana u'âsi mono te te sina 're i'umnhasi mono zéb zarina ma tô 're sãmra dasiré a'uwẽ'õ na, ti'a, 'Re ihâimana u'âsi mono te te ãma tãma iropisutuzéb ãma. Romhâ 'manharĩ na 'ri wa, ma tô 're sãmra, Izaquihi ré duré Zacoho ré zama. Ta norĩ zama, ma tô timra, 'Re ihâimana u'âsi mono te te iropisutuzé hã. 10 Abra'ã hã ma tô 're simipari, 'ri nho'u isãna'rata ré zô, ni'wa te te ipru waihu'u õ zô, 'Re ihâimana u'âsi mono te te ãma irowa'õtõ zô, duré te te i'ri nharĩ zô zama.

11 Abra'ã hã, 'Re ihâimana u'âsi mono te te sina 're i'umnhasi mono zéb zarina ma tô oto sidamama, hâiba prédu pese nherẽ, duré Sara hã 'ra waihu'u õ nherẽ. Abra'ã hã ma tô saze, 'Re ihâimana u'âsi mono tinhimiropisudu za te te ãma tãma i'uwaimrami na hã. 12 Ãne wa, misi aibâ hawi idâ'âzéb u nherẽ, ma tô oto isihudu norĩ hã ahâ uptabi na 're poto za'ra, wasi norĩ hâiwa na 're isimasa mono ne, duré sa'rata waihu'u ãna â zaihâ na supara 're isimi'wara mono ne.

13 Aihĩni ã norĩ hã 'Re ihâimana u'âsi mono te te sina 're i'umnhasi za'ra mono zéb ré, ma tô tidâ'â za'ra, 'Re ihâimana u'âsi mono te te iropisutuzé hã te te waibui ãna. Tane nherẽ, ma tô romhâ na 'madâ'â za'ra. Ma tô duré 're to za'ra i'u'âbâ. Dasiré a'uwẽ õ na ma tô dama 're siwasu'u za'ra, duré hâiwip si 're inomro mono na, daro mono bâ. 14 Ãne na 're isiwasu'u za'ra mono norĩ hã te te 're hâi'ré za'ra, tirob uptabi zô sima sô 're isõpré mono na hã. 15 Te te 're rosa'rata za'ra mono õ di, tinhipti'ai u apâ te te sina isiri za'ra da hã, iwairébézém hawi. Te te sima wẽ za'ra 'wa'âhã, te aré bâdâ tãma tihâimana za'ra, apâ te te sina isiri za'ra zéb da hã. 16 Tazahã, te sima sô 're sõpré, ti'a 're isi'ubumroi mono zéb da hã ti'a danhipai u iwẽ uptabi zô, tô hâiwa ãma 're ihâimana mono zô. Tawamhã 'Re ihâimana u'âsi mono hã 're sisé waihu'u mono õ di, ite za'ra 'Re ihâimana u'âsi mono na te te siwi 're isisi mono na hã. E marĩ wa. Ta hã si'uihâ na 'ri nho'u te te sô pisutu za'ra wa.

17 Abra'ã hã, 'Re ihâimana u'âsi mono te te sina 're i'umnhasi mono zéb zarina, ti'ra Izaqui hã ma tô aré tãma tisõ, dâ'â da, tãma ãma isõprub da hã, te te pibui wa. 'Re ihâimana u'âsi mono hã ma tô ãne wana ré tãma ropisutu, Abra'ãhã ma, za isihudu i'ahâ uptabi na hã. Tane nherẽ, ma tô sisa'ra pese, ti'ra misi nherẽ, te te tãma somri da, dâ'â da. 18 'Re ihâimana u'âsi mono hã ma tô tãma tinha, ãne: “Izaquihi hawi te za asihudu ahâ uptabi na 're aihâimana mo, te aima iropisutuzéb zarina.” 19 Abra'ã hã ma tô waihu'u, 'Re ihâimana u'âsi mono iwaihu'u pese uptabi na hã, Izaqui za apâ te te ihâiwa'utu na hã. Tahawa, Abra'ã hã ãne te te nharĩ wa, ma tô dâ'â ãna apâ 'Re ihâimana u'âsi mono hã i'ra Izaqui tãma tisõ, aré dâ'â wa, apâ te te ihâiwa'utu ne.

20 Izaqui hã 'Re ihâimana u'âsi mono te te sina 're i'umnhasi mono zéb zarina, ma tô 'Re ihâimana u'âsi mono wi rowaptẽ, iwẽ hã te te tãma 're apisutu zahuré mono da, Zacoho ma duré Ezauhu ma zama.

21 Zaco hã 'Re ihâimana u'âsi mono te te sina 're i'umnhasi mono zéb zarina, dâ'âzéb u pesere hã, ma tô 'Re ihâimana u'âsi mono wi rowaptẽ, iwẽ hã te te tãma pisutu zahuré da, Zuzéhé 'ra norĩ ma. Ta hã ma tô 'Re ihâimana u'âsi mono ãma tiwata, tisiwazusizém na si'upari sina.

22 Zuzé hã 'Re ihâimana u'âsi mono te te sina 're i'umnhasi mono zéb zarina, dâ'â ma, ma tô rowasu'u, Izaraéu nhihudu norĩ Ezitu hawi za iwairébézém na hã. Ma tô duré roti, ihâiba hâ na za marĩ da te i'manharĩ za'ra zém na hã.

23 Mozésihi mama norĩ hã 'Re ihâimana u'âsi mono te te sina 're i'umnhasi zahuré mono zéb zarina, Mozési hã poto wamhã, ma tô simi'uri zahuré, si'ubdatõ a'amo na. Ta hã 'watébrémi iwẽ na ma tô 'madâ'â zahuré. Tahawa, pahi zahuré õ di, apito nhimiroti zahi te te i'madâ'â pese zahuré õ da hã.

24 Mozési hã 'Re ihâimana u'âsi mono te te sina 're i'umnhasi mono zéb zarina, oto si'aibâ wamhã, te te sima wẽ õ di, Faraoho 'ra sipi'õi 'ra na da te dasiwi 're i'mahârâ mono da hã. 25 'Re ihâimana u'âsi mono nhib'a'uwẽ norĩ siré, da te tãma 're irob'manharĩ wasété mono da si, ma tô sima wẽ, marĩ iwẽ si tãma hâimana za'ra da nherẽ, bâtâ umro na, dawasédé da te 're i'manharĩ za'ra mono zém na da te dasima 're irowẽ za'ra mono zém na hã. 26 Ma tô sima ãma rosa'rata waihu'u, Cristuhu u'âbâ te te tô robzépata da, Ezitu 're isibro wẽ na tãma 're ihâimana mono nhipai u. E marĩ wa. Te te sima 're 'madâ'â pese mono wa, romhutu'õ tipawa'â za te te i'ârizé hã.

27 Mozési hã, 'Re ihâimana u'âsi mono te te sina 're i'umnhasi mono zéb zarina, ma tô watobro Ezitu hawimhã, apito Farao za isahizé ma pahi ãna. Siptete sina ma tô ãma uzusi, 'Re ihâimana u'âsi mono i'madâ'â waihu'u'õ te te i'madâ'â ne hã. 28 Mozési hã, 'Re ihâimana u'âsi mono te te sina 're i'umnhasi mono zéb zarina, ma tô ãma sãna'rata, Pascoa na dato nhisi na romhu'u na hã. Ma tô duré ti'ru, 'ridawa hã pone'ẽrebâ wapru na da te sapré mono da, Izaraéu nhihudu norĩ nhorõwa mono na hã, Hâiwa hawi Romhuri'wa Dapãrĩ'wa hã te te simro tõ da, i'ra poto'rata norĩ hã.

29 Izaraéu nhihudu norĩ hã, 'Re ihâimana u'âsi mono te te sina 're i'umnhasi za'ra mono zéb zarina, ma tô Â pré na â poré nhisi na saprĩ za'ra, ti'ai 'ré na 're idanomro mono ne. Tawamhã Ezitu hawim norĩ hã te te aré saprĩ za'ra da nherẽ, ma tô â poré hã suwa za'ra.

30 Izaraéu nhihudu norĩ hã, Zerico te te siwi uirĩ wa, 7 bâdâ isi'utõrĩ na sisõré pese na te te nasi ropãrĩ za'ra mono wamhã, ma tô 'ri nho'õmo 'wawi wa'ra hã rere, 'Re ihâimana u'âsi mono te te sina 're i'umnhasi za'ra mono zéb zarina. 31 Raabi siwa'âbâ zô 're isi'rui mono hã, 'Re ihâimana u'âsi mono te te sina 're i'umnhasi mono zéb zarina, 'Re ihâimana u'âsi mono nhib'rata dâ'â õ di dasiré hã, isimiroti te te 're i'madâ'â za'ra mono õ norĩ siré hã. E marĩ wa. Wapsãi'a'wa norĩ hã te te mrami wẽ wa, ta hã.

32 E marĩ, wa za duré wasu'u. Bâtâ õ di, Gidiã te iwasu'u da hã, duré Baraqui hã, duré Sãsã hã, duré Zéfité hã, duré Davi hã, duré Samuéu hã, duré 'Re ihâimana u'âsi mono zadawa 'mahârâ'wa norĩ zama, te iwasu'u za'ra da hã. 33 Ta norĩ hã 'Re ihâimana u'âsi mono te te sina 're i'umnhasi za'ra mono zéb zarina, ma tô ti'ai wa'õtõ nho'õmo mono bâ 're idahâimana za'ra mono norĩ ãma hã, ai'uté za'ra. I'uwaibaba si ma tô marĩ hã te te 're 'manharĩ za'ra. Tahawa, ma tô sina uwaimrami za'ra, 'Re ihâimana u'âsi mono te te iropisutuzé hã. Hu'u zérépa norĩ hã ma tô sadawa nhitob za'ra. 34 Unhama ro'o nhiptede hã ma tô siwi tiwĩ. Ma tô duré sisõ'reptu za'ra, sib'ézé 'wapa na da te simro da nherẽ. Sib'uwa za'ra di aré. Tane nherẽ, ma tô oto 're siptete pese za'ra. Dasi'wapéi wamhã, da te ãma 're ai'uté waihu'u za'ra mono õ di. Ma tô duré te te 're ai'uté za'ra, darob amoi hawi dasi'wapéi 'manharĩ'wa norĩ ãma hã. 35 Pi'õ norĩ hã, 'Re ihâimana u'âsi mono te te sina 're i'umnhasi za'ra mono zéb zarina, ma tô tiwi 're idâ'â za'ra mono hã apâ tãma tihâiwa'utu za'ra. Nima norĩ hã ma tô da te 're hâ za'ra, 're idâ'â za'ra mono zéb u. Te te 're wẽ'õ za'ra, da te 're isani za'ra mono da hã, tinhorõwa u oto 're nomro mono da, taha upana danho'reptuzé te te sina 're i'uwaimrami za'ra mono da si, danhipai u 're ihâimana mono hã. 36 Nima norĩ ãma ma tô 're dawa'ẽ za'ra. Ma tô duré da te 're hâ za'ra, abazei hâ nhorõ 'manharĩ na dapré'ézém na. Duré nima norĩ hã ma tô da te 're pawasisi za'ra, cohẽti na. Duré dazazéb 're, ma tô da te 're sé. 37 Nima norĩ hã ma tô da te 're simro, ẽtẽ na. Duré nima norĩ hã ma tô da te 're é za'ra, iwãiwa. Duré nima norĩ hã sib'ézé 'wapa na ma tô da te 're simro. Siwa'rãmi ma tô 're nomro apâ. Pone'ẽrebâ zéré mapu hâ 'manharĩ na ma tô 're si'uza za'ra, duré pone'ẽrebâ zéré uzé hâ 'manharĩ na zama. Sibrob ãna ma tô 're nomro, da te tãma 're rob'manharĩ wasété za'ra mono sina, duré da te 're waibui wasété mono sina. 38 Hâiwip si ma tô 're nomro, rop si 're irosa'wari mono na duré ẽtẽ 'rãihâ na zama. Ẽtẽ wa ab're siromo wa, ma tô 're hâimana za'ra, duré ti'ai wa ab're siromo wab zama. Ti'ai ãma isazei'õ'wa norĩ hâimanazém nei õ di, danhipai u hâimana wẽ na 're hâimana za'ra mono wa.

39 Te te saze za'ra wa, 'Re ihâimana u'âsi mono hã ma tô uburé ã norĩ hã wẽsãmri za'ra. Tane nherẽ, ti'ab ré hã te te sima waibui õ di, te te iropisutuzé hã. 40 E marĩ wa. 'Re ihâimana u'âsi mono hã iwẽ uptabi na isipai u te te wanhowa rowa'õtõ za'ra wa. Tãma wẽ uptabi di, wawẽ na 're wahâimana za'ra mono da, te te iwa'manharĩ za'ra da hã. Ma tô duré sima wẽ, te te sina 're i'umnhasi za'ra mono norĩ, wẽ uptabi na oto 're ihâimana za'ra mono da hã. Tane nherẽ, te te pisutu õ di, wawana te te ipibu za'ra da hã, dawẽ uptabi na oto 're idahâimana za'ra mono zé hã.