Duréihã ma tô aibâ norĩ hã da te 're uipra za'ra, pi'õ norĩ zama, te te dama 're romhuri za'ra mono da. Taré dasa si duré i'uza si ma tô da te tãma 're sõmri za'ra. Romhuri wa'â hã da te tãma 're sõmri za'ra mono õ di. Ma tô duré da te tiwi 're rosawi za'ra, nimomo si'uihâ na 're wairébé mono tõ da. Ãne wa, ma tô robzei ãna 're hâimana za'ra, romhuri'wa norĩ hã. Tawamhã apito norĩ nimomo si'aba'ré da, te te satõrĩ za'ra õ nherẽ, sihawim na 're wairébé mono wamhã, te za sada 're sahi za'ra. Ãne wamhã, te za dama 'ru za'ra, da te sõpẽtẽ za'ra wa, apâ da te 're simroi mono da. Tawamhã apito hã te te 're hâ za'ra ãté, romhuri'wa norĩ hã si'uihâ na 're wairébé mono 'ru te.

Ãne hã tãma waihu'u pese wa, ma tô Paulu hã rob'ui'éré, Filemohõ ma. Ta hã ma tô aré uipra aibâ hã, Onezimu na isisi hã, tãma iromhuri'wa da. Tane nherẽ, ma tô tiwi watobro Onezimu hã, nimomo morĩ da. Morĩ wamhã, Pauluhu u ma tô wi. Tawamhã Zezusihi wasu'uwẽ hã ma tô tãma wasu'u, Paulu hã. Taha zarina, ma tô Onezimu hã saze. Tahawa, ma tô Paulu hã Filemohõ ma rob'ui'éré, te te ãma waihu'u da, Onezimuhu hâimanazép tém na hã. Filemo hã duré isazei'wa. Tahawa, Paulu hã ma tô tiwi rowaptẽ, Filemohõ wi, te te âri wẽ da, Onezimu hã apâ i'rata 're sãmra mono da, isiré isazei'wai wa oto.