3 'Re ihâimana u'âsi mono nhimizawizé iwa'âbâ õ duré rowẽ Wamama te hã duré Wanhib'apito Zezu Cristuhu te zama, asiré 're ihâimana u'âsi za'ra mono da si, iwẽ hã.

4 'Re ihâimana u'âsi mono ãma wa 're ĩwata u'âsi. Wa duré ai'ãma 're ĩpo're pu'u u'âsi, te 're rowaptẽrẽ mono sidâpâ, 5 uburé 'Re ihâimana u'âsi mono nhib'a'uwẽ norĩ, 're i'azawi pese mono zém na te 're wapari mono wa, duré Wanhib'apito Zezu Cristu hã asina 're i'umnhasi mono zém na zama. 6 'Re ihâimana u'âsi mono wi, wa te te 're waptẽrẽ, asina 're i'umnhasi mono zéb zarina, marĩ iwẽ na wama 're isõpru mono zé hã, da te 're 'madâ'â waihu'u za'ra mono da, marĩ iwẽ hã wa'ãma 're ihâimana za'ra mono hã, Cristuhu ma romhurizéb 'remhã. 7 Ĩsisãnawã, asimizawi pese na 're i'aihâimana mono zé hã, rowẽ isa'ẽne hã te te ĩma sina 're sani duré ĩnhib'ru zama. Te duré uburé 'Re ihâimana u'âsi mono nhib'a'uwẽ norĩ ma hã 're i'arowẽ zani mo.

8 Tahawa, wasiré Cristuhu zazei'wa na 're wahâimana mono wa, ĩma waihu'u pese di, te ãma aiwi iwaptẽrẽ zahi da hã, marĩ 're i'ab'manharĩ mono da hã. 9 Tane nherẽ, ĩma i'asawi zarina, marĩ misi, wa za aiwi waptẽ. Wa hã Paulu, wa tô ĩhâiba prédu duré dazazéb 're wa za, Wanhib'apito Cristu Zezusihi u'âbâ. 10 Taha wa, wa aiwi waptẽ, ĩzawi zarina Onezimuhu ma. Ta hã ma tô oto ĩ'ra na^a ĩma tihâiba, ãme dazazéb 'remhã. 11 Duréihã, aré marĩ da, aima 're hâimana mono õ di. Tane nherẽ, ãhã na hã wẽ di oto marĩ da hã duré ĩma zama.

12 Ãhã na hã, apâ wa ãma atẽme satõ. Duré isiré wa za ĩpẽ'ẽ na ĩhâiba, tame. 13 Wa aré ĩsima wẽ, Rowasu'u wẽ itéb u'âbâ, dazazéb 're ĩzab 'ré, ãme ĩ'rata a'â sãmra da, te te ĩpawaptob da, asibrob 're. 14 Tane nherẽ, ãne hã te 'manharĩ õ di za, ĩma 'rui õ nherẽ, te aiwi iwaptẽrẽzé hã aiwati zahi zarina 'manharĩ tõ da. Tazahã, asima iwẽ zéb zarina.

15 Ãté niwamhã, Onezimu hã ma tô aiwi ai'ré suru na, niwa apâ atẽme wisi wa, asiré 're hâimana u'âsi mono da oto. 16 Asiré te za apâ tihâiba za, mare di wada'uri zarina aima romhuri'wa na hã. Tazahã, wada'uri zarina romhuri'wa na 're idahâimana za'ra mono nhipai u, asisãnawã aima isawi uptabi na oto. Ĩma sawi uptabi di. Tane ĩnhipai u aima sawi uptabi di za oto, ta hã. Asiré hâimana wapsi õ di. Tazahã duré asisãnawãi wa, asiré Wanhib'apito zazei'wai wa.

17 Tahawa, asiré romhuri'wa na 're ĩ'madâ'â mono wamhã, ma'ãpé âri wẽ na Onezimu hã, wa hã aré ĩ'âri wẽ ne. 18 Marĩ hã te te aima 'manharĩ wasété wamhã, duré marĩ te te aima iwa'âbâ õ, iré wamhã, ta hã uburé ĩma hâimana, ĩte marĩ te dama 're i'awa'âbâ mono zéb 're. 19 Wa hã Paulu, ĩnhib'rata na wa za oto ãma rob'ui'éré, ĩsi'uihâ na: Uburé wa za wa'â za. (Tawamhã duré wa hã ĩnhimnhasi õ di za, te aima inharĩ da hã, azama aihâimanazém na ĩma iwa'âbâ da hã, wa hã te ai'ãwisi wa, Cristu hã saze da hã.) 20 Tahawa, ĩsisãnawã, wa ãma aiwi waptẽ, ma'ãpé 'manharĩ ã hã ĩzawi zarina, te ãma aiwi iwaptẽrẽzé hã, Wanhib'apito u'âbâ, ĩpẽ'ẽ 'remhã ĩma rowẽ da, wasiré Cristuhu zazei'wai wa.

21 Te ãma aiwi iwaptẽrẽzém na te i'ai'umnhasizéb zarina wa ãne hã ãma aima rob'ui'éré, za i'manharĩ na hã. Duré ĩma aiwaihu'u pese di, te ãma aiwi iwaptẽrẽzém nhipai u, za i'manharĩ na hã. 22 Duré taha siré hã, daza'warizé hã ĩzô 'maipisutu. E marĩ wa. Wa rob'umnhasi, ĩ'ãma irowaptẽrẽ za'ra wa'aba zéb zarina, 'Re ihâimana u'âsi mono hã te te ĩma irowairébé da si, apâ duré ãma ĩwisi da, te asabu za'ra wa'aba da.

23 Epafra hã, wasisãnawã Wanhib'apito Cristu Zezusihi u'âbâ dazazéb 're ĩsiré isa hã, te ãma asawi za'ra wa'wa. 24 Duré Marcus, Aristarcu, Demasi duré Lucas, ĩsiré Wanhib'apito ma romhuri'wa norĩ hã te duré ãma asawi za'ra wa'wa.

25 Wa hã wa duré 're ĩmreme u'âsi, Wamama ma, ai'ãma za'ra wa'aba, Wanhib'apito Zezu Cristu hã aipẽ'ẽ 're, te te 're aipawaptob u'âsi za'ra wa'aba mono da, robzei u'âsi, ãma 're anomro aba mono da.