Isazei'wa norĩ hã 're ihâimana wẽ za'ra mono zé
3
Titu, ma'ãpé isazei'wa norĩ, 're apo're pu'u mono, roti'wa norĩ hã te te 're wazé pese za'ra mono da, duré dama ipire norĩ hã te te 're wapari pese za'ra mono da, duré 're sisa'ra wẽ u'âsi za'ra mono da, uburé marĩ iwẽ hã te te 're 'manharĩ za'ra mono da. 2 Duré tãma 're roti za'ra mono, timreme iwasété na te te da'ãma 're wasété za'ra mono tõ da, waimri na si 're hâimana za'ra mono da. Duré simizawi pese na 're hâimana za'ra mono. Duré uburé dama 're hâimana za'ra mono, dawazép sina. 3 Duréihã wa norĩ zama, wa'rã nhimiza'rese ãna wa aré 're wahâimana za'ra. Wanhimiwapari ãna wa aré 're wahâimana za'ra duré wawasété na. Uburé marĩ sipu'u pese na wa te wasima 're iwẽ za'ra mono zô si, wa aré 're wahâimana za'ra, tiwi 're wawairébé waihu'u mono ãna. Wahâimanazé iwasété na si, wa aré 're wahâimana za'ra duré marĩ na danho'ru na si. Te aré da te 're wa'ruiwapari za'ra. Duré wa norĩ zama wa aré da'ru na si 're wahâimana za'ra. 4 Tane nherẽ, 'Re ihâimana u'âsi mono Wa'anho'reptui'wa hã tinhoprubzé duré tinhimizawi pese zé hã te te uburé dama hâi'ré wamhã, 5 ma tô wanho'reptu za'ra, wa'ãma siwamri za'ra wa. Marĩ iwẽ hã wa te 'manharĩ za'ra wab õ di. Tipẽ'ẽzani na ma tô wanho'reptu za'ra. Ta hã ma wa'upsõ za'ra. Ma tô duré 'manha, apâ wapoto téb za'ra da. Taha na ma tô wahâimanazé ité hã wama sõmri za'ra. 6 'Re ihâimana u'âsi mono hã sõpru wa, ma tô Tipẽ'ẽzani na wa'ahâiba ubu, Zezu Cristu hã wazada idâ'â za'ra u'âbâ, Wanho'reptui'wa za'ra hã. 7 Ãne hã ma tô 'manha, tinhimipawaptobzé iwa'âbâ õ na, i'ra na 're wanomro mono da, duré dahâimanazé isi'utõrĩ'õ te te wama 're anhomri mono da, sô 're iwanhimipari za'ra mono hã. 8 Ã hã te aima irowahutuzé hã tô sena.Titu, wa ĩsima wẽ, ã hã te aima irowasu'uzém na, Re ihâimana u'âsi mono zazei'wa norĩ hã 're anhiptete u'âsi mono da, ta norĩ hã te te sima 're wẽ u'âsi za'ra mono da, marĩ iwẽ si te te 're 'manharĩ wẽ u'âsi za'ra mono da. Taha si iwẽ hã duré marĩ, da te 're i'manharĩ wẽ za'ra mono da. 9 Siwa'ru marĩ na 're idasiwasu za'ra mono wi 're asi'madâ'â pese mono, duré dahi'rata za'rada hã, ahâ na 're ihâimana za'ra mono wi duré dasi'ahâri wi duré Zudeu norĩ ma roti zahi na dasiwasui wi hã. Ã norĩ hã marĩ dai õ di. Duré wa'âbâ õ di. 10 Ni'wam norĩ hã isazei'wa norĩ 'remhã da'ãma 're sipo'o za'ra mono wamhã, ma'ãpé aimreme hã tãma 're ab'mõrõpãrĩ mono, imorĩ'rata na duré maparane ãma. Taha parimhã, asiwi wẽ'õ na, tiwi 're asi'madâ'â pese mono da. 11 Ni'wa ãne hã hâimana wamhã, te za iwaihu, i'uwaibaba õ na 're ihâimana mono na duré tiwasété si te te 're i'manharĩ mono na. Ta hã te za 'râwi si'ãwisi, rowasété u.
Paulu hã, Tituhu ma te te iroti 'rãsutu zé
12 Nimahã na, Atemasi niwamhã Tiquicu hã te ãma atẽme satõrĩ wamhã, ma'ãpé we ai'wapé na, Nicopoli u we ĩtẽme aimorĩ da, ĩnhopẽtẽ da, pire nherẽ, tame rowa'u'u wahâ 'rowi ĩnhamra da, te ĩsima rowairébé wa. 13 Ãma aime na, da'wawi isimapa'wa Zenasihi ãma hã duré Apoluhu ãma zama, uburé marĩ na aima iwapu zarina, nimomo neb zahuré wa, tiwi sô rowaptâ'â zahuré tõ da, sô isimnhasi zahuré zéb zô. 14 Wasiré isazei'wa norĩ, marĩ iwẽ si te te 're i'manharĩ za'ra mono da si iwẽ hã, si'ãma 're sina mono da, marĩ zô tiwi 're rowaptâ'â za'ra mono wamhã, ãne zarina wasiré isazei'wa norĩ hã hâimana wẽ na 're hâimana za'ra mono da.
15 Uburé ãme ĩsiré isi'ubumro norĩ hã ma ãma siwi asawi. Ma'ãpé wama sawi za'ra na, wazawi'wa norĩ, wasiré isazei'wa norĩ hã.
'Re ihâimana u'âsi mono nhimizawizé iwa'âbâ õ, asiré 're ihâimana u'âsi za'ra wa'aba mono da si, iwẽ hã.